Lweny mar Har–magedon Nobi Karang’o?

“Narango, to naneno oganda mang’ongo, ma dhano ok nyal kwano, moa e pinje duto, gi dhoudi duto, gi ogendini duto, gi dhok duto . . . mowuok e sand maduong’no.”​​—⁠FWENY 7:⁠9, 14.

GIK mabiro tugo lweny mar Har–Magedon nenore ayanga. E yo mane?

Nitie oganda mar piny mangima moting’o jogo matiyo ne Jehova kendo dak kaluwore gi chike mamalo mag Muma. Nikech Nyasaye riwogi lwedo, ji tara gi tara mowuok e ogendini duto koda dhok duto, riwore kanyachiel mondo gilos riwruok mar owete man gi kuwe e kindgi kendo moherore. Joneno mag Jehova gin oganda mar owete ma kamano.​​—⁠Johana 13:35.

Machiegni, Satan biro choko jolwenyne kendo monjo e yo mager moloyo oganda Nyasaye modak gi kuwe kendo ma nenore ni onge rit. (Ezekiel 38:​8-​12; Fweny 16:⁠13, 14, 16) Ang’o momiyo wanyalo bedo gadier kuom wachni? Muma lero weche moko sie ma konyowa ng’eyo kinde ma Har–Magedon biro timoree. Weche mang’eny ma Muma koro chopo gie sani.

Weche ma Okor Mwaneno ka Chopo

Jopuonjre Yesu nopenje gima ne dhi konyo ji ng’eyo ni “giko mar ndalo” osechopo. (Mathayo 24:3) Yesu nodwoko penjono kuom wuoyo e wi kinde mabiro kowacho ni “oganda noked gi oganda, kendo pinyruoth gi pinyruoth; kuonde moko kech nobedie, kendo piny noyiengini.” Kae to nowacho ni: “Magi duto gin chakruok mar masiche malit.” (Mathayo 24:⁠7, 8) Jaote Paulo bende noluongo kindego ni “ndalo mag giko” kowacho ni ginibed “kinde mag chandruok.” (2 Timotheo 3:1) Be ineno ka weche ma ne okorgo timore e ndalogi?

 Ang’o momiyo kindego ne dhi bedo matek ahinya? Jaote Johana nyiso gimomiyo. Nokoro ni Satan gi jochiendene ne dhi tiyo e piny kuom ‘ndalo matin.’ Inyiso ni Satan nigi “mirima maduong’ ” kindeni. (Fweny 12:​7-​12) Be ineno ka chuny mar mirima koda gero onya e piny mangima to ok mana kamoro achiel?

Yesu nowacho ni e kinde matek ahinyani, ne idhi tim tich moro makende. Nowacho ni: ‘Wach Maberni mar pinyruodh Nyasaye nolandre e pinje duto, mondo obed ranyis ni ogendini duto; eka giko nobi.’ (Mathayo 24:14) Kindegi, Joneno mag Jehova lando wach maber mar Pinyruodh Nyasaye e pinje mokalo 235, e dhok mokalo 500. Gasede ariyo malero Muma ma gigoyo miluongo ni Ohinga mar Jarito koda Amkeni!, e gasede mosepog e okang’ maduong’ moloyo e piny mangima. Joneno bende oseloko Muma e dhok madirom 100. Tijgi itimo gi joma ochiwore maok chul kendo pesa ma gitiyogo wuok kuom chiwo maonge achune. Be dibed ni kampen makende mar lendoni chopo wach ma Yesu ne okoro?

Muma bende nyiso achiel kachiel weche mabiro tugo lweny me kind Nyasaye kod jogo makwede. Ne ane adek kuom weche mokor mibiro neno kachopo.

Gik ma Wachiegni Neno Katimore

Wach mokor 1. Muma nyiso ni ogendini biro golo lendo maduong’ ni “kuwe nitie, kendo weche ni kare.” Gibiro paro ni gichiegni loyo chandruoge madongo. Kata kamano, gik mabiro timore bang’ lendono biro bedo mopogore ahinya.​​—⁠1 Jo Thessalonika 5:​1-3.

Wach mokor 2. Bang’ mano, sirkande mopogore opogore biro kawo okang’ mar monjo riwruoge mag dinde me piny mangima. E Muma, sirkandego iluongo ni ondiek; to dinde mag miriambo ipimo gi dhako moidho ondiegno. (Fweny 17:⁠3, 15-​18) Ondiek mar ranyisino biro ketho dinde mawuondore ni tiyo ne Nyasaye maok ong’eyo ni Nyasaye ema chwale timo kamano.

E yor ranyisi, jaote Johana lero wachno kama: “To tunge apar minenogo, kaachiel kod ondiegno, ginisin kod jaterruokno; ginikeye nono, mi giniweye duk; kendo ginicham ringre, mi giniwang’e gi mach chuth. Nikech Nyasaye oseketo e chunygi mondo gitim gi modwaro ka gin gi paro achiel.”​​—⁠Fweny 17:⁠16, 17.

Wach mokor 3. Bang’ monjno, Satan biro choko pinje mondo omonj joma tiyo ne Jehova Nyasaye.​​—⁠Fweny 7:​14; Mathayo 24:21.

Ibiro Timo Ang’o?

Kapo ni pok iyudo thuolo mar puonjori Muma e yo matut, inyalo yudo ka tek yie ni weche moler malogo biro timore. Kata kamano, inyalo geno gadier ni gik moko duto mokor biro chopo kendo ni wechego biro chopo machiegni. Weche mang’eny mosechopo ma ne okor e Muma miyo wabedo gadier ma kamano. *

Donge nyalo bedo maber ka iyango kinde mondo inon gimomiyo Joneno mag Jehova ni gadier chuth ni “lweny mar chieng’ maduong’no mar Nyasaye Manyalo Duto” osekayo machiegni kendo ine gimomiyo ok onego iluor lwenyno? We gilerni gima Muma wacho ni dwarore ni itim mondo ibed achiel kuom jogo ma Jehova Nyasaye reso. (Fweny 16:14) Gima ipuonjori nyalo konyi bedo gi paro mowinjore e wi kinde mabiro.

[Weche moler piny]

[Blab e ite mar 8]

Be dibed ni tich ma Joneno mag Jehova timo chopo wach ma Muma okoro?