Iparo ang’o kuom Desemba 21, 2012, tarik ma ji mang’eny ne wacho ni lokruok maduong’ ne dhi bedoe e piny? Joma ne nigi luoro ni piny ne dhi kethore ne mor ni onge gima notimore. Joma ne nigi siso mar neno lokruok moro manyien, ne chunygi onyosore. To joma nosebedo karito giko mar piny ne chunygi ojok. Be dibed ni mano ne en mana tarik moro machielo ma ng’ato nosiekogo ni en giko piny?

To nade “giko mar piny” ma Muma wuoyoe? (Mathayo 24:⁠3, The Bible in Luo, 1976) Jomoko luor ni ibiro wang’ piny. Jomoko nigi siso mar neno gik mabiro timore e kindeno. To jomoko ojok gi winjo ni giko chiegni. Be paro mopogore opogorego otenore kuom gima iparo apara koso kuom gima biro timore adier?

Ng’eyo gima Muma wacho gadier e wi giko mar piny nyalo kawi gi wuoro. Muma ok nyis mana gik momiyo onego wagomb giko mar piny, to bende onyiso kaka chuny ji nyalo jok kapo ni gineno ni gikono oyware. Wagweli mondo ine dwoko mag Muma ne penjo ma ji jopenjo e wi giko mar piny.

DWOKO MA MUMA CHIWO: “[Nyasaye] noloso mise mag piny, mondo kik oyiengini nyaka chieng’.”​—ZABURI 104:5.

Piny ok bi kethi, obed gi mach kata gi gimoro amora. Kar mano, Muma puonjo ni piny e kama nolos mondo dhano odagie nyaka chieng’. Zaburi 37:29 wacho kama: “Jo matir ginicham piny, mi ginidagie nyaka chieng’.”​—Zaburi 115:16; Isaiah 45:18.

Bang’ chweyo piny, Nyasaye nowacho ni piny ‘ber ahinya,’ kendo pod onene kamano. (Chakruok 1:​31) Kar bedo gi chenro mar ketho piny, osingo ni obiro ‘ketho joma ketho piny’ kendo ritogo kik kethe chuth.​—Fweny 11:18.

Kata kamano, gima 2 Petro 3:7 wacho nyalo mako dhogi. Ndikono wacho niya: ‘Polo ma kawuono kod piny ma kawuono okan ne mach.’ Inyalo penjori niya: Donge mano nyiso ni ibiro wang’ piny gi mach? Ber ng’eyo ni kinde moko Muma wuoyo kuom “polo,” “piny” koda “mach,” e yor ranyisi. Kuom ranyisi, sama Chakruok 11:1 wacho ni: “Piny duto nobedo gi dhok achiel,” oganda dhano ema iluongo ni “piny.”

Weche molworo 2 Petro 3:7 bende nyiso ni polo, piny, kod mach mowuo kuomgi kanyo gin ranyisi. Wes 5 gi 6 nyiso weche machalo gi ma ne otimore e Ataro mar pi e ndalo Noa. Ne oketh piny ma kindeno. Kata kamano, wang’eyo ni piny mwadakieni ne ok okethi. Kar mano, Ataro ne oyweyo kit oganda marach mar kindeno miluongo ni “piny.” Bende, ne oketh “polo” me kindeno matiende ni joloch mag pinyno. (Chakruok 6:11) E yo ma kamano bende, 2 Petro 3:7 koro kaka ibi keth chuth oganda mar jomaricho kaachiel gi sirkandegi ma nigi mibadhi mana kaka itieko gimoro gi mach.

DWOKO MA MUMA CHIWO: ‘Piny kadho, gi gombone: to ng’ama timo gima Nyasaye dwaro osiko nyaka chieng’.’​—1 JOHANA 2:​17.

“Piny” mabiro kadho ok en piny mwadakieni to en oganda dhano maok odak kaluwore gi dwaro mar Nyasaye. Mana kaka laktar nyalo yang’o ng’ato mogol kama oting’o tuwo mar kansa, e kaka Nyasaye “nogol oko” joma timbegi  orochore mondo jomabeyo odag e ngima maber e piny. (Zaburi 37:9) E yo ma kamano, inyalo wach ni “giko mar piny” en gimaber.

Loko moko mag Muma nyiso ni “giko mar piny” en gimaber kuom wacho ni en “giko mar ndalo.” (Mathayo 24:3) Nikech ok bi keth piny to ibi keth mana jomaricho, donge nenore ayanga ni ngima biro bedo manyien ne joma odong’? Muma nyiso ni en kamano nimar owuoyo e wi “piny mabiro.”​​—⁠Luka 18:30.

Yesu noluongo kinde mabirono ni “chuech manyien.” E kindeno, Nyasaye biro duoko dhano e ngima ma ne odwaro ni gidagie kane ochweyogi. (Mathayo 19:28) Wabiro yudo gweth maluwogi:

• Ngima e paradis me piny kama kuwe ogundhoe kendo maonge chan moro amora.​—Isaiah 35:1; Mika 4:4.

• Tije makelo ne ji ber kendo mamiyowa mor.​—Isaiah 65:21-23.

• Dak maonge tuoche.​—Isaiah 33:24.

• Neno ka joma oti bedo rowere kendo.​—Ayub 33:25.

• Neno chier mar jomotho.​—Johana 5:28, 29.

Ka watimo ‘gima Nyasaye dwaro,’ ok wabi luoro giko mar piny. Kar mano, wabiro gombo ni gikono ochopi.

DWOKO MA MUMA CHIWO: “Kuneno ka magi timore, ng’euru ni pinyruodh Nyasaye chiegni.”​—LUKA 21:31.

E buk miluongo ni The Last Days Are Here Again, Profesa Richard Kyle nondiko ni “lokruoge ma apoya koda tungni e oganda miyo ji chuogo tarige ma giko nobie.” To mano jatimore ahinya ka ji ok ong’eyo gimomiyo tungni kod lokruogego bedoe.

Jonabi mag Muma ma ne okoro wach e wi giko ne ok osieko mana gi wechegi giwegi. Kar mano, Nyasaye ne otelonegi gi roho maler mondo giler chal ma ne dhi bedoe ka giko piny okayo machiegni. Non ane moko kuom weche ma ne okorgi kendo ne iwuon kabe gichopo e kindewagi.

•   Lwenje, kech, yiengni mag piny, koda tuoche malandore makelo tho.​—Mathayo 24:7; Luka 21:11.

• Medruok e timbe mahundu.​—Mathayo 24:12.

• Kaka dhano ketho piny.​—Fweny 11:18.

• Joma oherore giwegi, ohero pesa, kendo ohero mor mar piny to ok ohero Nyasaye.​—2 Timotheo 3:2, 4.

• Udi makethore.​—2 Timotheo 3:2, 3.

• Ji ok dew ni giko piny chiegni.​—Mathayo 24:37-39.

• Lando wach maber e wi Pinyruodh Nyasaye e piny ngima.​—Mathayo 24:14.

Mana kaka Yesu nowacho, neno ‘gigi duto’ katimore miyo wang’eyo ni giko mar piny okayo machiegni. (Mathayo 24:33) Joneno mag Jehova ni gadier ni giko piny chiegni kendo gilando ne ji wechegi e pinje madirom 236.

DWOKO MA MUMA CHIWO: “Ka ji wacho ni, ‘Kuwe nitie, kendo weche ni kare,’ eka keth bironigi apoya, kaka muoch poyo dhako man gi ich; kendo ok ginitony kata matin.”​—1 JO THESSALONIKA 5:3.

Muma pimo ketho piny gi tugruok mar muoch mabiro ne dhako madwaro nyuol​—en gima ok nyal geng’ kendo obiro apoya. Mana kaka lokruoge mamedore e dend dhako man gi ich nyise ni ochiegni nyuol, e kaka kinde mochomo giko miyo wang’eyo ni giko chiegni. Laktar nyalo nyiso dhako man gi ich tarik ma odhi nyuolie; to kata kapo ni tarigno okalo, pod dhakono ni gadier ni obiro nyuol machiegni. E yo machalo kamano, kata obedo ni giko ok osebiro e kinde ma ji ne paro, mano ok nyis ni ok wadak e “ndalo mag giko.”​—2 Timotheo 3:1.

Nyalo bedo ni ipenjori niya: ‘Bedo ni ranyisi manyiso ni wadak e ndalo mag giko nenore ayanga kamano, ang’o momiyo ji mang’eny ok fweny ranyisigo?’ Muma nyiso ni sama giko okayo machiegni, ji mang’eny ok bi kawo ranyisigo gi pek. Kar neno lokruoge madongo matimore e ndalo mag giko,  gibiro ng’ayo wach niya: “Nyaka ne nindo ter kwere, gik moko duto ochwere kaka ne gibet nyaka a chakruok mar chuech piny.” (2 Petro 3:3, 4) Tiende niya, kata obedo ni ranyisi mag ndalo giko biro nenore maler, ji mang’eny ok bi dewo.​—Mathayo 24:38, 39.

Sulani owuoyo mana kuom weche manok mayudore e Ndiko manyiso ni giko chiegni. * Be diher ng’eyo weche momedore? Ka en kamano, donge dibed maber kitudori gi Joneno mag Jehova mondo gitim kodi puonjruok mar Muma maonge chudo? Puonjruokno inyalo tim e odi, kamachielo mihero, kata mana kokalo kuom simo. Onge chudo moro amora madwarore mak mana thuoloni, to ber mibiro yudo ogundho.