Ne onyuola Moundsville, taon mokuwe man but aora mar Ohio yor nyandwat mar West Virginia, e piny Amerka. Ne an nyathi mar ariyo e kind nyithindo ang’wen; yawuoyi adek gi nyako achiel, kendo odwa ne osiko opong’ gi mor. Jonyuolwa ne gin joma tiyo matek kendo mohero ji. Ne waonge pesa mang’eny, kata kamano, ne wayudo gik mochuno. Bedo ni jonyuolwa ne gin Joneno mag Jehova, ne gitemo matek mondo girwak puonj mag Muma e chunywa kapod wan nyithindo.

Kata kamano, kane abedo rawera, piny ne osechako ywaya kagola kuom gik ma ne opuonja. Ne achako neno ni ngima michiko gi Muma ok nyal bedo ngima ma nigi mor. Ne aparo ni adhi bedo mamor gadier ka abedo thuolo timo gimoro amora ma adwaro. Matin nono, ne aweyo dhi e chokruoge mag Jokristo. Nyithindwa ariyo ma ne luwo bang’a bende ne oluwo timna mar ng’anjono. Jonyuolwa ne otimo gimoro amora mondo gikonywa, to ne watamore winjogi.

Ne ok ang’eyo ni thuolo ma ne agombono ne dhi loka misumba. Chieng’ moro kane wawuok e skul, osiepna moro ne omiya ndawa mondo amadhi. Ne ok atamora. Chakre chieng’no kadhi nyime, ne ayie donjo e timbe mang’eny maricho. Mapiyo nono, ne achako tiyo gi yedhe mamero koda kong’o, kendo ne achako dak e ngima mar anjawo. Kaka higini ne kadho, e kaka ne amedo tiyo gi yedhe mamero ma tekogi ng’eny moloyo kendo ne abedo misumbagi. Bedo misumba yedhego nomiyo achako usogi mondo ayud pesa mang’iewogo yedhena awuon.

Kata obedo ni ne atemo chayo kaka chunya ne nyisa ni adak e ngima marach, pod chunya ne chanda achanda. Kata kamano, ne aneno ni pi oseduwore kendo ne ok anyal dok chien. Kata obedo ni ne asiko an gi ji mang’eny e nyasi ma ne wajodhie, kinde mang’eny ne awinjo ka an kenda kendo chunya ne ool. Kinde moko, ne anyalo paro kaka jonyuolna ne gin jomabeyo, to mano ne weya ka awuoro nono kaka ne asebaro mabor.

Kata obedo ni ne aneno ni ne asebedo ng’at manono, jomoko to ne pod neno gimaber kuoma. E higa mar 2000, jonyuolna ne ogwela mondo adhi e chokruog-distrikt mar Joneno mag Jehova. Ne adhi kata obedo ni chunya ne tek. To gima ber ne en ni nyithiwa ariyo ma be nong’anjo, ne obiro e chokruogno.

Kane an e chokruogno, ne afwenyo ni kanyo ema ne watimoe nyasi moro mar thum higa achiel mokalo. Pogruok ma ne aneno e kind nyasino kod chokruogno ne omulo chunya ahinya. E nyasi mar thum, yugi koda much ndawa ne opong’o kamoro amora. Thoth joma ne nie thum ne gin jomager kendo thumbe ma ne igoyo ne nigi weche manyoso chuny. Mopogore gi mano, e chokruog Joneno, ne olwora gi joma mor gadier​—ne girwaka gi mor kata obedo ni ne aselalnegi kuom higini mogwaro. Kanyo ne ler, kendo weche ma ne iwacho kuno ne gin makelo geno. Neno nyak maber mag adiera mag Muma ne omiyo apenjora gimomiyo ne atamora luwogi.​—Isaiah 48:17, 18.

Bang’ a e chokruogno ni i, ne ang’ado mar dok e kanyakla mar Jokristo. Nyithiwa ma ne ong’anjoka bende nong’ado mar duogo e kanyakla nikech gik ma ne gineno e chokruogno. Karwa ji adek, ne wayie mondo otim kodwa puonjruok mar Muma ng’ato ka ng’ato.

Ndiko mar Muma ma ne omulo chunya ahinya ne en Jakobo 4:⁠8, mawacho niya: “Suduru ir Nyasaye, to nosud iru.” Ne afwenyo ni mondo asud machiegni gi Nyasaye, nyaka ne aket ngimana obed maler. Moko kuom lokruoge ma ne onego atim ne gin weyo madho ndawa, tiyo gi yedhe mamero koda mer.​—2 Jo Korintho 7:1.

Ne aweyora gi osiepena machon kendo ne amako osiep gi joma tiyo ne Jehova. Jaduong’-kanyakla ma ne puonja Muma ne okonya ahinya. Ne ojagoyona simo kendo ne ojarawo mosa. Nyaka chil kawuono, pod en achiel kuom osiepena madongo.

E higa mar 2001, ne anyiso chiwruokna ne Nyasaye kane obatisa e pi, kendo nyithiwa ariyoka ne obatisi bende. Parie mor mogundho ma jonyuolwa kaachiel gi owadwa matin ma bende ne en Janeno nowinjo ka koro waduto wariwore e lamo Jehova!

Chon ne aparo ni chike mag Muma ridona ngima ahinya, to sani anenogi kaka rit maduong’. Muma ne omiya teko mar weyo tiyo gi yedhe mamero kod usogi kendo ne omiyo abedo ng’at maber.

An gi thuolo majaber mar bedo e riwruok mar owete me piny ngima matiyo ne Jehova. Jogi oherore gadier, kendo ginie achiel e tiyo ne Nyasaye. (Johana 13:34, 35) E riwruok mar oweteni ema ne ayudoe gweth moro makende ahinya, Adrianne, chiega ma ahero ahinya. Wamor ahinya tiyo ne Jachwechwa kanyachiel.

Kar luwo mana ngima ma mora an awuon, gie sani, achiwora tiyo ne Nyasaye kuom thuolona duto ka apuonjo ji neno kaka Wach Nyasaye nyalo konyogi bende. Tijni e tich mosekelona mor maduong’ moloyo. Anyalo wacho gadier chuth ni Muma noloko ngimana. Sani, oseketa thuolo gadier.