Nineve e ma ne en dala maduong’ mar piny Ashuru. Ne en dala maduong’ ma ne nigi ute mabeyo mag ruodhi, hekalu, ndeche malach koda ohingni madongo dongo. Janabi ma Ja-Yahudi miluongo ni Nahum noluongo dalano ni “dala motimo remo.”—Nahum 3:1.

Mano ne en adier nikech piche ma ne opa e kor od Sennakerib e piny Nineve nyiso kaka Jo-Asuria ne gin jo mahundu. Achiel kuom gorogo nyiso ka ng’ato odiyo jatwech piny kendo ywayo lewe oko. Goro moko nyiso kaka joma ne itero twech ne iywayo gi tonde motwe kata moruw e olow mochwogo um-gi kata dhogi. Jotend pinje ma ne oselo, ne ilieronegi wiye ruodhigi ma ne osenegi mondo ochal kaka tigo.

Archibald Henry Sayce, ma nono histori mar Asuria nolero timbe mahundu ma Jo-Asuria ne jotimo bang’ loyo taon moro. Owacho niya: “Ne iketo wiye dhano e wang’ yo ma jalo lweny ne dhi kaloe; yawuoyi gi nyiri ne iwang’o ka ngima, ka moko kuomgi ne iketo tenge mondo otimnegi mahundu mokalo kanyo; chwo to ne iguro e yien, moko to ne ipoko pien-gi duto ka gingima, moko ne itucho wangegi, moko ne ing’ado oko lwetegi gi tiendegi, moko to ne ing’ado itgi kata umgi oko.”

Nyasaye nochiko Jo-Yahudi niya: ‘Kigero ot manyien, mondo iriw rageng’ e wi tati, ni kik imi buch remo omak odi, kapo ni ng’ato ogore piny a kanyo.’ (Rapar mar Chik 22:8) Keto rageng’ ne dwarore nikech Jo-Yahudi ma ne odak kinde ma ne ondikie Muma, ne timo gik mang’eny e wi tat utegi.

Thoth ut Jo-Israel ne wigi opamore. Tado ne en kama owinjore gi oyo chieng’, yueyo, kata timo tije matindo tindo mag ot. Kinde oro, ne en kama owinjore gi nindo. (1 Samuel 9:26) Japur ne moyo cham e wi tado kapok odhi reggi.—Joshua 2:6.

Joma ne lamo Nyasaye madier kata joma ne lamo nyiseche manono, ne jotiyo gi wi tado kaka kar lamo. (Nehemia 8:16-18; Yeremia 19:13) Jaote Petro nodhi e wi tado sa auchiel odiechieng’ mondo olem. (Tich Joote 10:9-16) Kapo ni yiend mzabibu kata othidhe e ma ne oumgo wi tado, mano ne kelo tipo maber.

Buk miluongo ni The Land and the Book wacho ni ute Jo-Israel ne nigi ngas kata kama iidhogo tado. Ngasno ne nyalo bedo “oko mar ot maok bor gi laru.” Omiyo wuon ot ne nyalo lor a e wi tado maok odonjo e i ot. Ma konyowa winjo tiend siem ma Yesu nochiwo mar wuok mapiyo e dala miketho, niya: “Ng’a manie tat ot kik olor mondo ogol gik moko manie ode.”—Mathayo 24:17.