PAR ane ni in-gi osiepni moro ma igeno ahinya. Kata kamano, otimo gimoro ma nenore ni ok ber. Jomoko kwedo timneno ka giwacho ni oonge hera. Be ibiro rikni yie kodgi, koso ibiro rito mondo osiepni olerni wachno? Kapo ni osiepnino onge sechego mondo oler wachno, be ibiro hori mos kirite maok ing’adone bura?

Kapok ing’ado wach, nyalo bedo ni diher ng’eyo weche momedore e wi osiepnino. Inyalo penjori niya, ‘Be nitie gima ok ang’eyo e wi osiepnani, to en ang’o ma ahero kuome?’ Mago gin penjo mowinjore. E yo ma kamano bende, kapok wang’ado ni Nyasaye onge hera, wanyalo penjore penjogo e wiye?

Nyalo bedo ni samoro ineno ni gimoro ma Nyasaye otimo kata oweyo mondo otimre ok owinjore. Ji mang’eny nyalo nyisi ni Nyasaye onge hera kendo ginyalo temo ywayi ibed gi paro machalo gi margi. Be ibiro hori mos maok ing’ado wach mapiyo kendo temo ng’eyo weche momedore e wi Nyasaye? Penjri ane kama, ‘Gin gik mage mabeyo ma Nyasaye osetimona?’

Kapo ni isebedo gi chandruok mang’eny e ngimani, yot mondo iwach ni onge gima ber ma Nyasaye osetimoni. Kata kamano, ng’e ni Nyasaye timonwa mana maber to ok marach. Par ni ne waseneno ni Satan e “jaloch pinyni,” to ok Jehova. (Johana 12:31) Omiyo, Satan e ma kelo chandruok gi gik maricho matimore e piny. E wi mano, wan dhano morem kendo gik mayudowa apoya bende kelonwa chandruok.

To komachielo, gik ma Nyasaye timo gin mage? Ne ni Muma wacho ni Nyasaye e ma “nochweyo polo gi piny;” to mano oriwo dhano mochweyo e yo ‘malich’ miwuoro; kendo Muma nyisowa ni Jehova e ‘Nyasaye ma muchwa ni e luete.’ (Zaburi 124:8; 139:14; Daniel 5:23) Wechego duto nyisowa ang’o?

Wechego nyisowa ni Jachwech e momiyo wangima. (Tich Joote 17:28) Mano nyisowa ni mich mar ngima, chwech mabeyo molworowa, mor mwayudo nikech bedo gi osiepe kod joma wahero, nyalo mopogore opogore ma wan-go kaka mar ng’weyo kata winjo gin mich mowuok kuom Nyasaye. (Jakobo 1:17) Donge gigo duto nyiso ni Nyasaye en ng’at ma jahera mowinjore wagen?

En adier ni inyalo yudo ka geno Nyasaye tekni. Samoro en kamano nikech pok ing’eye maber. Mano en gima nyalo timore. E sula machiekogi, ok wanyal dwoko penjo duto ma ji penjo e wi gimomiyo giparo ni Nyasaye onge hera. Kata kamano, donge nyalo bedo maber kitimo kinda mar ng’eyo Nyasaye matut moloyo? * Wan gadier ni kitimo kamano ibiro ng’eyo adiera e wi Nyasaye. Be en adier ni Nyasaye onge hera? Ooyo, ngang’ Muma wacho ni: “Nyasaye en hera”—1 Johana 4:8.