Michelle: Kawuono wamiyo ji duto e alworau traktni. Wiye penjo ni Bende Diher Ng’eyo Adiera? Mae mari.

Sophia: Dibed ni en mar din?

Michelle: Ee. Ne ane penjo auchiel monyis kae. En penjo mane kuomgi ma di—

Sophia: We ang’adi gikanyo. Kik iketh secheni nono wuoyo koda.

Michelle: Ang’o momiyo iwacho kamano?

Sophia: Ok apar kata kabe Nyasaye nitie.

Michelle: Erokamano kuom nyisa gima nie chunyi. Yie apenjie, Mano e paro misebedogo kinde duto?

Sophia: Ooyo, ne apon ka adhi e kanisa. Kata kamano, ne aweyo dhi e kanisa nene.

Michelle: Aa! Mos, pok anyisi nyinga. Iluonga ni Michelle.

Sophia: An to iluonga ni Sophia.

Michelle: Erokamano, Sophia.

Sophia: Arwaki.

Michelle: Sophia, daher penji penjo moro, to kik ine ni atemo chuno wechena kuomi. Gima daher penji en ni: Be nitie gimoro sie ma ne omiyo ichako keto kiawa kabe Nyasaye nitie?

Sophia: Ee, nitie. Mamawa ne oyudo masira mar ndara higni 17 mokalo.

Michelle: Mos ahinya kuom wachno. Ne ohinyore?

Sophia: Ee, a kanyo dende ne otho maonge gimoro amora ma onyalo timo.

Michelle: Mano gima lit manade! Ang’eyo ni wachno litni ahinya.

Sophia: Ee, mano adier. Asiko apenjora niya, Ere kaka Nyasaye ne nyalo weyo gima kama otimre, ka entie adier? Ang’o momiyo oweyo mondo wachandre kama?

Michelle: Onge rach penjo penjo ma kamago. Kuom adier, sama wachandore, wanyalo bedo gi penjo ma kamago. Kata mana chwo koda mon ma ne tiyo ne Nyasaye kinde Muma be ne openjo penjo ma kamago!

Sophia: Adier?

Michelle: Ee. Be diher mondo anyisi achiel kuomgi e Muma?

Sophia: Ee, nyisa.

Michelle: Ne ane gima janabi Habakkuk nopenjo Nyasaye e bug Habakkuk, sula mokwongo, kwan matindo 2 gi 3: ‘Yaye Jehova, anayuag nyaka ndalo adi, maok iwinji? Ayuakni nikech chandruok, to ok ikonya. Nang’o inyisa gima mono?’ Donge penjogo chalo gi penjo misebedo kipenjo?

Sophia: Ee, en kamano.

Michelle: Nyasaye ne ok okwero Habakkuk ni ne openjo penjo maricho kata nyise ni ne en gi yie matin.

Sophia: Kare ok rach penjo Nyasaye wach ma kamano!

Michelle: Muma puonjo ni Nyasaye neno chandruoge ma dhano yudo kendo owinjo malit.

Sophia: Itemo wacho nang’o?

Michelle: We anyisie ranyisi moro achiel e bug Wuok 3:7. Diher somo ndikono?

Sophia: Anyalo some. Owacho kama: “Kendo  Jehova nowacho, Adieri aseneno sand mar joga ma ni e Misri, kendo asewinjo yuakgi nikech joritgi; niwira ang’eyo chandruokgi.”

Michelle: Erokamano. Kaluwore gi ndikono, be Nyasaye neno ka joge chandore?

Sophia: Ee, nenore kamano.

Michelle: Kendo ok one aneya. Dog ane kama ndikono rumogo. Nyasaye nowacho niya: ‘Ang’eyo chandruokgi.’ Be wechego nyalo wuok kuom Nyasaye maok ohero kata maok dew joge?

Sophia: Ooyo, ok apar.

Michelle: En adier ni nitie pogruok maduong’ e kind neno anena ka jomoko chandore kod winjo malit nikech gichandore.

Sophia: Mano en adier.

Michelle: Kapod in gi wachno e paro, we wane ane kaka Nyasaye ne owinjo kinde moro machielo ma ne joge chandore. Bug Isaiah 63:9 nyiso wachno. Ndikono chako gi wechegi: ‘Weche duto ma ne thagogi en bende ne githage.’ Donge ndikono nyisowa ni Nyasaye winjo malit sama joge chandore?

Sophia: Ee, ema koro anenoni.

Michelle: Sophia, adiera en ni Nyasaye odewowa ahinya kendo ok omor kata matin neno ka wachandore. Sama wawinjo malit, en be owinjo malit.

Michelle: Kapok adhi, nitie paro moro ma daher weyigo.

Sophia: Onge wach.

Michelle: Ne ane gima Muma wacho e wi teko ma Nyasaye nigo. Ndiko ma adwaro wuoyoe en Yeremia 10:12. Akwayi mondo isome.

Sophia: We asome. Owacho kama: “Nochweyo piny gi tekone, noketo piny gi riekone, noyaro polo gi lony mare.”

Michelle: Erokamano. We wanon ane ndikoni matin. Donge en adier ni nyaka bed ni Nyasaye ne otiyo gi teko mang’eny ahinya e chweyo gik moko duto e piny gi polo?

Sophia: Mano adier.

Michelle: Omiyo, ka Nyasaye nigi teko mar chweyo gik moko duto, donge nyaka bed ni en gi teko mar chiko chwechne?

Sophia: Mano en adier.

Michelle: We wadog ane e wach mamani. Ang’o momiyo iwinjo malit neno ka ochandore?

Sophia: Nikech en mamana, kendo ahere.

Michelle: To dabed ni in gi teko mar change sani, donge ditimo kamano?

Sophia: Datimo kamano.

Michelle: Nitie gimaduong’ mwanyalo puonjore kuom wachno. Muma puonjowa ni Nyasaye neno chandruogewa, owinjo malit sama wachandore, kendo en gi teko mang’eny. Donge mano nyiso ni ok osebedo ne Nyasaye mayot neno ka dhano chandore to en gi teko mar tiekonegi chandruogegi dichiel?

Sophia: Ne pok aparo wachno e yo ma kamano.

Michelle: Dibed ni nitie gimomiyo Nyasaye pok otiekonwa chandruogewa chop sani? *

Sophia: Hmm, nyaka bed ni nitie gimomiyo.

Michelle: Ero awinjo ka simbi ywak, we wawe gikanyo, abiro duogo chieng’ machielo mondo wamed wuoyo kuom wachno.

Sophia: Erokamano. Arwaki kendo. *