KINDE moro mokalo, gaset moro miluongo ni The Chosun Ilbo e piny Korea ne nigi wich ma lombo ji. Ne en gi penjo ma penjo niya: “Be ‘Nyako ma Kite Ber Miluongo ni Shim Cheong,’ ma ne Otho ka Ok Ong’eyo Yesu ne Odhi e Mach ma Ok Tho?”

Mano ne en wich ma chiewo pach ji nikech Shim Cheong ne en nyako moher ahinya e singendni mag Jo-Korea nikech iwacho ni nochiwore ahinya mondo okony wuon-gi ma ne en muofu. Kuom higni mang’eny, osebed kipwoye. Adier, e piny Korea, ji osebedo ka neno Shim Cheong kaka nyako ma ne oketo ranyisi mar chiwruok.

Ji mang’eny neno ni sando nyako ma kite berno e mach ma ok tho nikech ne ok obatise kaka Jakristo, ok en gima owinjore kendo ok kare kata matin. Kendo siganano wuoyo kuom gik ma ne onego obed ni ne osetimore chon ka pok wach moro amora e wi Kristo owinjore e gweng’gi.

Gasedno ne wuoyo kuom weche ma ne openj jatend din moro. Ne openje kabe jogo duto ma ne otho ma ok opuonjore kuom Yesu ne dhi e mach ma ok tho. Ne odwoko nang’o? “Wakia. Waparo apara ni nyaka bed ni nitie gima Nyasaye biro timonegi.”

Buk miluongo ni The New Catholic Encyclopedia wacho niya: “Batiso en gima dwarore mondo ng’ato oyud warruok. Mana kaka Kristo nowacho, ka ng’ato ok oyudo nyuol manyien mar pi gi Roho Maler, ok onyal donjo e Pinyruodh Nyasaye (Jn 3.5).” Nikech mano, jomoko paro ni joma ne otho ka pok obatisi iwito e mach ma ok tho kata ni isandogi e yo moro bang’ tho.

Kata kamano, nitie jomoko bende ma neno ni yie ma kamano ok en puonj ma donjo. Ji milionde osetho ma ok ong’eyo wach moro amora e Muma. Be onego osand joma kamago nyaka chieng’? Muma to wacho ang’o e wi wachni?

Muma nyiso maler ni Nyasaye ok kwed joma ne otho ka pok ong’eyo dwache. Tich Joote 17:30 wacho niya: “To ndalogo mag kiya, Nyasaye noweyo.” Ka en kamano, en geno mane ma nie Muma ne jogo ma ne otho ka pok ong’eyo dwach Nyasaye?

Dwoko yudore e weche ma Yesu ne owacho ne achiel kuom jomahundu ma ne ogur e bathe. Ng’atno nowacho ne Yesu niya: “Para chieng’ midonjo e pinyruodhi.” Yesu nodwoke nang’o? ‘Adier awachoni tinende, inibed koda e Paradiso.’—Luka 23:39-43.

Be Yesu ne singo ni ng’atno biro dhi e polo? Ooyo. Ne ok onywol ng’atno gi “nywol manyien” mar pi gi roho, ma gin gik ma ne dwarore mondo ng’ato odonj e Pinyruodh polo. (Johana 3:3-6) Mopogore gi mano, Yesu ne singo ni jamahunduno ne biro dak kendo e Paradiso. Nikech ne en Ja-Yahudi, nyaka bed ni ng’atno nong’eyo wach Paradiso me piny, ma ne en puodho mar Eden ka luwore gi buk mokwongo mar Muma. (Chakruok 2:8) Singo mar Yesuno nomiye geno ni ne idhi chiere mondo odag kendo ka olos piny obedo Paradiso.

En adier ni Muma singo ni “nobedie chier mar jo makare kod jo ma ok kare.” (Tich Joote 24:15) “Jo ma ok kare” gin jogo ma ne ok oluwo chike Nyasaye nikech ne gikia dwach Nyasaye. Yesu biro chiero jamahundu ma ok kare ma ne owuoyo kode kaachiel gi milionde kata bilionde mag joma ne otho ma ok ging’eyo dwach Nyasaye. Kae to ka gin e Paradiso e piny ka, ibiro puonjgi dwaro mag Nyasaye, kendo ka gihero  Nyasaye, gibiro nyiso mano kuom timo dwache.

Ka chieng’ ochier jo ma ok kare, be ibiro ng’adnegi bura ka luwore gi timbegi machon? Ooyo. Jo Rumi 6:7 wacho niya: “Nikech ng’at mosetho osegonye oa e richo.” Jo ma ok karego ne ochulo richo ka ne githo. Omiyo, ibiro yalgi ka luwore gi gik ma gibiro timo bang’ chier, to ok ka luwore gi gik ma ne gitimo e i kia kinde machon ka pok githo. Gibiro yudo gueth mage?

Bang’ chier, jo ma ok kare biro bedo gi thuolo mar puonjore chike Nyasaye ma ibiro el e kitepe modol mag ranyisi. Kae to ibiro ng’adnegi bura ka luwore gi ‘gik ma ne gitimo,’ bed ni ne giluwo chike Nyasaye kata ooyo. (Fweny 20:12, 13) Mano e ma biro bedo thuolo mokwongo ne ng’eny joma ok kare mibiro chier mondo oyud ngima mochwere e piny ka gipuonjore kendo gitimo dwach Nyasaye.

Puonj mar chierni osekonyo ji mang’eny mondo obed gi yie kuom Nyasaye. Yeong Sug ne en achiel kuomgi. Ne opon kaka Ja-Katholik ma tene. Joodgi ne gin jodolo. Nikech ne odwaro bedo sista mar Jo-Katholik, ne odhi e skul mar tiego josista. Bang’e, ne oweyo skundno nikech gik ma ne timore kuno ok ne more. E wi mago, ok ne onyal yie kod puonj mar mach ma ok tho nikech ne oneno ni timo kamano ok nyis hera kendo ok kare kata matin.

Janeno achiel mar Jehova ne osomo ne Yeong Sug wechegi ma yudore e Muma: “Jo mangima ging’eyo ni gibiro tho: to jo motho ok ging’eyo gi moro, mi pok giongego kendo.” (Eklesiastes 9:5) Janenono ne okonye ng’eyo ni ok sand kwerene machon e mach ma ok tho. Kar mano, ginindo e liel ka girito chier.

Nikech Yeong Sug nong’eyo ni ji mang’eny ne pok ong’eyo adiera ma Muma puonjo, noketo weche ma Yesu nowacho e Mathayo 24:14 e chunye: “Wach Maberni mar pinyruoth nolandre e pinje duto, mondo obed ranyis ni ogendini duto; eka giko nobi.” Sani en bende olando wach maber konyiso jomoko geno ma en-go majaber manie Muma.

Muma nyisowa ni ‘Nyasaye ok dew wang’ ji; to kuom ogendni duto ng’at moluore, kendo ma timo tim makare, e moyiego.’ (Tich Joote 10:34, 35) Ma e tim matir chuth ma wageno neno kuom Nyasachwa ma “ohero tim matir gi rieko mipogogo wach kare.”—Zaburi 33:5.