E KIND ji ariyogo ng’ano mowacho paro machal gi mari? Ji mang’eny neno ni weche ma Saulo ma ja Tarso ma bende iluongo ni Paulo nowachogo jiwo chunygi ahinya. (Tich Joote 17:26, 27) Muma bende nigi weche mamoko kaka mago ma jiwo ji. Kuom ranyisi, Yesu nolemo kotiyo gi weche ma nyiso ni ne en gadier ni jolupne ne nyalo ng’eyo Nyasaye kendo yudo gueth mage.—Johana 17:3.

Kata kamano, jorieko moko kaka Philo to ne neno wachno mopogore. Ne giwacho ni ok wanyal ng’eyo Nyasaye kata matin. Ere kaka wanyalo ng’eyo adiera e wi wachni?

Muma nyisowa maler ni nitiere weche moko ma dhano ok nyal ng’eyo e wi Nyasaye. Kuom ranyisi, ok wanyal ng’eyo ni Jachuech osebedoe kuom higni adi, oriek marom nade, kendo ok wanyal pimo riekone gi gimoro amora. Weche ma kamago oloyo pach dhano mabor ahinya. Kata mano, wechego ok nyal monowa ng’eyo Nyasaye. Kuom adier, paro matut kuom wechego konyowa ‘sudo machiegni gi Nyasaye.’ (Jakobo 4:8) Koro wane ane moko kuom gik ma ok wanyal ng’eyo e wi Nyasaye. Kae to wabiro neno gik ma moko ma wanyalo ng’eyo e wi Nyasaye.

HIGNI MA NYASAYE OSEBEDOE: Muma puonjowa ni Nyasaye osebedoe “nyaka nene kendo nyaka chieng’.” (Zaburi 90:2) Tiende ni Nyasaye onge chakruok kendo oonge giko. Dhano ok nyal fwenyo “kar romb hike.”—Ayub 36:26.

Kaka wachno konyowa: Nyasaye singo ngima mochwere ne joma ong’eye. (Johana 17:3) Ere kaka wanyalo geno singo ma kamano kapo ni Nyasaye ok en ng’at mantie nyaka chieng’? En mana “Ruodhwa mochwere” e ma nyalo singonwa wachno.—1 Timotheo 1:17.

PACH NYASAYE: Muma puonjowa ni “rieko mare odhiero ng’eyo” nikech pache oyombo pachwa mabor. (Isaiah 40:28; 55:9) Mano e gimomiyo Muma penjowa kama: “Ere ng’ama ong’eyo paro mar Ruoth, ma dimi ong’ad ni Ruoth rieko?”—1 Jo-Korintho 2:16, The Bible in Luo, 1976.

Kaka wachno konyowa: Nyasaye nyalo winjo lamo mag ji mang’eny mopogore opogore dichiel. (Zaburi 65:2) Ong’eyo kata sama oyundi achiel olwar piny. Be nitie chieng’ ma pach Nyasaye biro pong’ thich mochop kama ok onyalo ng’eyo sama ilemo kendo winjo kwayoni? Ooyo ng’ang, nikech pache ok orem. E wi mano, e wang’ Nyasaye ‘nengowa duong’ ahinya moloyo oyundi mang’eny.’—Mathayo 10:29, 31.

YORE MAG NYASAYE: Muma puonjowa ni dhano ok nyal “fwenyo tich ma Nyasaye osetiyo nyaka chakruok nyaka gikone.” (Eklesiastes 3:11) Kuom mano, ok wabi ng’eyo weche duto e wi Nyasaye. Rieko ma yudore e yore Nyasaye “tek nono chuth.” (Jo-Rumi 11:33) Kata kamano, Nyasaye oikore elo yorene ne jogo ma dwaro more.—Amos 3:7.

Kaka wachno konyowa: Ka isomo Muma kendo puonjri weche me iye ibiro medo ng’eyo weche mang’eny e wi Nyasaye kod yorene. Mano nyiso ni wanyalo sudo machiegni gi Wuonwa manie polo nyaka chieng’.

Kata obedo ni ok wanyal ng’eyo chuth weche moko e wi Nyasaye mano ok nyis ni koro ok wanyal ng’eye kata matin. Muma oting’o weche mang’eny ma nyalo konyowa ng’eyo Nyasaye e yo maber. Ne ane ranyisi ma luwogi:

NYING NYASAYE: Muma puonjowa ni Nyasaye nigi nyinge. Nyasaye wacho kama: “An Jehova; ma e nyinga.” Nying Nyasaye yudore nyadi 7,000 e Muma, kendo nyingeno kende e ma yudore kuonde mang’eny e Muma.—Isaiah 42:8.

Kaka wachno konyowa: Yesu ne owacho kama e Lamo mar Ruoth: “Wuonwa manie polo, nyingi mondo obed maler.” (Mathayo 6:9) Donge in bende inyalo tiyo gi nying Nyasaye sama ilemo? Jehova oikore reso ng’ato ang’ata ma miyo nyinge luor mowinjore.—Jo-Rumi 10:13.

KAMA NYASAYE ODAKIE: Muma puonjowa ni nitie kuonde ariyo ma ji odakie, e piny kama dhano odakie kod e polo kama chuech mag roho odakie. (Johana 8:23; 1 Jo-Korintho 15:44) Kinde mang’eny, ka Muma otiyo gi wach mar polo mano owuoyo kuom kama joma nigi del mar roho odakie. ‘Kar dak’ mar Jachuech ni e “polo.”—1 Ruodhi 8:43.

Kaka wachno konyowa: Wanyalo ng’eyo maber kaka Nyasaye chal. Jachuech ok en teko moro ma yudore kamoro amora, kendo e i gimoro amora.  Jehova en Ng’at madier kendo modak kamoro sie. To e ma pod, “onge kata mana chuech moro amora ma opondo ma wang’e ok nyal neno.”—Jo-Hibrania 4:13.

KIDO MAG NYASAYE: Muma puonjowa ni Jehova nigi kido mabeyo. “Nyasaye en hera.” (1 Johana 4:8) Ok onyal riambo. (Tito 1:2) Nyasaye ok buon ng’ato, okecho ji, ong’won, kendo iye ok wang’ piyo. (Wuok 34:6; Tich Joote 10:34) To bende gima ji mang’eny ok ong’eyo en ni Jachuech gombo mako “osiep” gi joma miye luor.—Zaburi 25:14, Luo, 1976.

Kaka wachno konyowa: Wanyalo bedo osiep Jehova. (Jakobo 2:23) Kae to, kaka wamedo puonjore kido mage e kaka wabiro medo winjo maler tiend weche manie Muma.

Muma nyisowa ni Jehova Nyasaye en ng’at machalo nade. Jachuech dwaro ni mondo wang’eye. Wachne ma en Muma singonwa kama: “Kidware, iniyude.” (1 Weche mag Ndalo 28:9) Donge inyalo medo ng’eyo Nyasaye kuom somo Muma kendo paro matut kuom weche misomo? Kitimo kamano to Muma wacho ni Nyasaye biro ‘sudo iri.’—Jakobo 4:8.

Kata kamano, samoro inyalo penjori kama: ‘Be anyalo bedo osiep Jachuech kata obedo ni ok anyal ng’eyo weche duto e wiye?’ Par ane wachni: Ka osiepni moro en laktar be ochuno ni in bende nyak ibed laktar? Ooyo ngang’! Ng’ato nyalo bedo osiep laktar to en owuon otiyo tich mopogore. To mano ok mon-gi bedo osiepe. Gima duong’ en ni ng’atno ong’eyo kido mag laktarno, kachiel gi gik mohero kod ma ok ohero. Kamano bende, inyalo puonjori e Muma ni Jehova en ng’at machalo nade. To mano e gima dwarore ahinya mondo imak osiep gi Nyasaye.

Muma oting’o weche ma dwarore ni wang’e e wi Nyasaye kendo ok onyiswa wechego awiye awiye. Be diher ng’eyo weche momedore e wi Jehova Nyasaye? Joneno mag Jehova timoga puonjruok mar Muma gi ji ma onge chudo. Wakwayi mondo iwuo gi Joneno mag Jehova man e alworau kata ilim websait marwa mar jw.org/luo.