WACH MADUONG’ MA GASET WUOYOE
Nyasaye Neno Nade Lweny?
Inyalo dwoko nade penjono? Ji mang’eny paro ni Nyasaye riwo lwedo lweny. Giparo kamano nikech e kinde machon Muma wacho ni Nyasaye nochiko mondo jotichne odhi oked e lweny. Kata kamano, jomoko to ong’eyo ni Yesu ma Wuod Nyasaye nopuonjo jolupne ni giher jowasikgi. (Mathayo 5:43, 44) Kuom mano, giwacho ni nitie kinde ma Nyasaye noloko pache kuom kaka noneno lweny, kendo ni e kindegi ok oyie gi lweny.
In to ineno nade wachno? Be Nyasaye oyie gi wach lweny? Ka en kamano, sama ji kedo e lweny oriwoga jomage lwedo? Dwoko mag penjogo nyalo konyi bedo gi paro mowinjore e wi lweny. Kuom ranyisi, king’eyo ni Nyasaye riwo lwedo joma ihero e lweny moro, donge ibiro bedo gadier ni jogo e ma dhi locho? To nade ka ifwenyo ni Nyasaye riwo lwedo joma ok iheroka, ibiro winjo nade? Mano nyalo miyo ilok paro ma in-go kuom lwenyno.
Nitie gima duong’ ma dwarore ni wang’e. Ng’eyo paro ma Nyasaye nigo kuom lweny, nyalo konyi bedo gi paro mowinjore kuom Nyasaye. Kapo ni in gi lit e chunyi nikech gima lweny moro notimo e ngimani, nyaka bed ni diher ng’eyo dwoko mar penjoni, Be en adier ni Nyasaye e ma thuwo ji, kendo okelo chandruoge motudore gi lweny, kata ok odewo joma sandore nikech gik ma lweny osekelo?
Nyalo kawi gi wuoro kipuonjori ni Muma wacho gima opogore gi paro ma ji nigo. E wi mano, paro ma Nyasaye ne nigo chon e wi lweny pok olokore nyaka chil kawuononi. Wanon ane gima Muma wacho e wi kaka Nyasaye ne neno lweny e kinde machon, kod e kinde Jokristo mokwongo ka ne Yesu nie pinyka. Mano biro konyowa ng’eyo kaka Nyasaye neno lweny e kindegi, kod kabe dhano biro siko ka kedo e lweny nyaka chieng’.
