WACH MADUONG’ MA GASET WUOYOE | KAKA SOMO MUMA NYALO KONYI MOLOYO
Ang’o Momiyo Onego Isom Muma?
Jovy wacho kama: “Naparoga ni winjo tiend weche manie Muma ne ok yot.”
Queennie wacho kama: “Naparo ni somo Muma ne dhi joga.”
Ezekiel wacho kama: “Ka ne aneno anena kaka Muma duong’, nawinjo mana ka aseol gi some.”
Be nitie kinde mane isegombo somo Muma kae to iweyo timo kamano nikech niwinjo mana kaka joma owuo kuomgi malo kae? Ji mang’eny neno ni somo Muma tek ahinya. To nade ka ifwenyo ni somo Muma nyalo konyi mondo ibed gi ngima maber? To nade ka ifwenyo ni nitie yore mamoko ma nyalo konyi mondo isom Muma e yo maberie moloyo? Be diher ng’eyo ber minyalo yudo kuom somo Muma?
Ne ane ber ma jomoko oseyudo bang’ kane gichako somo Muma.
Ezekiel, ma jahigni 20 kama wacho niya: “Chon nachal gi ng’at ma riembo mtoka to ok ong’eyo kama odhiye. Kata kamano, somo Muma osekonya bedo gi ngima maber. Oting’o puonj ma anyalo tiyogo e ngimana.”
Frieda, ma bende ja higni 20 kama lero niya: “Iya ne jawang’ga ahinya. Kata kamano, somo Muma osekonya kweyo mirimba. Tinde awinjora gi ji, kendo sani an-gi osiepe mang’eny.”
Dhako moro miluongo ni Eunice ma jahigni 50 kama wacho niya: “Muma osekonya bedo ng’at maber kendo osekonya mondo awe timbe moko ma ok beyo.”
Somo Muma nyalo miyo ng’ato obed mamor e ngimane mana kaka joma wasewuoyo kuomgi malo kae. (Isaiah 48:17, 18) Mopogore gi mano, Muma bende nyalo konyi timo yiero mabeyo, bedo gi osiepe mabeyo, nyagruok gi parruok, to maberie moloyo, onyalo konyi ng’eyo adiera e wi Nyasaye. Puonj manie Muma wuok kuom Nyasaye. Omiyo, luwo puonjgo biro konyi e ngimani nikech Nyasaye ok nyal miyowa puonj maricho.
Gima duong’ en chako somo Muma. Ang’o minyalo timo mondo ichak somo Muma kendo some obedni mamit?
