Samuel Mokwongo 10:1-27
10 Samuel nokawo chupa mar mo mi oolo e wi Saulo.+ Nokwake* mowachone kama: “Donge Jehova oseketi jatend joge?+
2 Ka wasewere kodi kawuono, idhi romo gi ji ariyo Zelza but liend Rahel+ e alwora mar Benjamin. Gibiro wachoni kama: ‘Punde ma imanyo oseyudi, to wuonu wiye osewil gi wachgi,+ kendo in e ma koro omanyi ka openjore niya, “Ma koro wuoda pok oduogoni, atim nang’o?”’
3 Kiwuok kanyo, dhi adhiya nyaka ka ma nitie yath maduong’ man Tabor, kanyo ibiro romo gi ji adek ma dhi Bethel+ lamo Nyasaye madier, ka achiel kuomgi oting’o nyidiek adek, moro makate adek, to machielo njagi maduong’ mar divai.
4 Gibiro mosi kendo gibiro miyi makate ariyo, ikaw makatego.
5 Bang’ mano, ibiro chopo e got mar Nyasaye ka ma nitie kambi mar jolweny mag Filistia. Sa michopo e dala, ibiro romo gi jonabi moko ka ridore koa kar lamo moting’ore ka gikoro wach. To jo ma goyo gik thum molos gi tonde, gi jo ma goyo oyieke, gi asili, kod nyatiti biro telo e nyim jonabigo.
6 Roho mar Jehova biro miyi teko+ mar koro wach kaachiel gi jonabigo mibed ng’at mopogore.+
7 Ka gigo duto osetimore, tim duto minyalo nimar Nyasaye ni kodi.
8 Bang’ mano, telna Gilgal,+ to abiro luwi kuno mondo achiw misengni miwang’o kod misengni mag kuwe. Bed kuno kuom ndalo abiriyo nyaka abi, kae to abiro wachoni gima onego itim.”
9 Ka ne Saulo owere gi Samuel ni i, Nyasaye nochako loko chuny Saulo, kendo gik ma ne Samuel onyise duto ne otimore chieng’no.
10 Omiyo, ne gia kanyo ma gichomo got, kendo jonabi moko ne oromo kodgi. Eka roho mar Nyasaye ne obiro kuome+ mi ochako koro wach+ kodgi.
11 Ka ne jo ma ong’eye oneno ka okoro wach kaachiel gi jonabigo, ne gipenjore niya: “Ang’o ma timo wuod Kish-ni? Dibed ni Saulo bende tinde en janabi?”
12 Ng’at moro ma ne nitie kanyo ne openjo kama: “To en wuod ng’a?” Kanyo e ma ji ne ochako wachoe* ni, “Dibed ni Saulo bende tinde en janabi?”+
13 Ka ne osetieko koro wach, ne odhi kar lamo moting’ore.
14 Owadgi wuon-gi ne openje gi jatije niya: “Ne ulal kanye?” Saulo ne odwoke ni, “Ne wadhi manyo punde+ ma ne olal, to ka ne ok wayudogi, ne wadhi ka Samuel.”
15 Owadgi wuon-gino ne openje kendo kama: “Wachnae, ang’o ma Samuel ne owachonu?”
16 Saulo ne odwoke niya: “Ne owachonwa ni pundego oseyudi.” Kata kamano, Saulo ne ok onyise ni Samuel nowacho ni obiro bedo ruoth.
17 Bang’e, Samuel ne ochoko oganda duto Mizpa e nyim Jehova+
18 monyisogi kama: “Ma e gima Jehova Nyasach Israel owacho: ‘An e ma ne agolo Israel e piny Misri ma aresou e lwetgi+ kendo ne aresou e lwet ruodhi duto ma ne sandou.
19 Kata kamano, kawuono usedagi Nyasachu+ ma ne oresou e masiche kod chandruoge kuwacho niya: “Ooyo, ketnwa ruoth.” Koro pogreuru mondo uchung’ e nyim Jehova kaluwore gi dhoudi kod anyuola muwuokie.’”
20 Kuom mano, Samuel ne oluongo dhoudi duto mag Israel moro bang’ machielo+ kendo dhood Benjamin e ma ne oyier.+
21 Eka ne oluongo anyuola mag Benjamin moro bang’ machielo, kendo anyuola mar Matri e ma ne oyier. Gikone, Saulo wuod Kish e ma ne oyier.+ To ka ne gidhi manye, ne ok giyude.
22 Omiyo, ne gipenjo Jehova niya:+ “Be ng’atno osebiro kae adier?” Jehova ne odwokogi niya: “Opondo e osike.”
23 Kuom mano, ne giringo mi giome kuno. Ka ne ochung’ e dier oganda, ne orabora moloyo ji duto kendo ne onge ng’at ma ne kalo goke.+
24 Samuel nonyiso oganda duto niya: “Donge uneno ng’at ma Jehova oseyieronu?+ Donge onge ng’at machal kode e kind oganda?” Mi ji duto nokok niya: “Ruoth odag aming’a.”
25 Samuel ne owacho ne oganda gik ma ruoth biro dwaro ni gitim,+ kendo ne ondikogi e buk mi oketogi e nyim Jehova. Kae to Samuel ne ogonyo oganda mondo ng’ato ka ng’ato odog e ode.
26 Saulo bende ne odok Gibea dalagi, kendo jolweny ma Jehova ne omulo chunygi ne odhi kode.
27 Kata kamano, chwo moko ma nono ne owacho niya: “Be ng’atni direswa adier?”+ Ne gichaye kendo ne ok gikelone mich moro amora.+ Kata kamano, Saulo ne ok odwokogi.*
Weche Moler Piny
^ Kata, “Ne onyodhe.” E ndalo ma ne indiko Muma, ji ne nyiso ni gin osiepe ka ginyodhore.
^ Kata, “goyoe ngero.”
^ Hibrania, “ne oling’ mana ka momo.”
