Ayub 1:1-22
1 Ne nitie ng’at moro ma nyinge Ayub*+ ma ne odak e piny Uz. Ne en ng’at ma onge ketho kendo ma timne tir.+ Ne oluoro Nyasaye kendo ne otang’ gi richo.+
2 Ne onyuolo yawuoyi abiriyo gi nyiri adek.
3 Ne en gi jamni mang’eny. Rombe 7,000, ngamia 3,000, dhok 1,000,* kod punde 500.* E wi mago, ne en gi jotich mogundho. Mano nomiyo obedo ng’at momewie mogik e pinje man yo wuok chieng’.
4 Moro ka moro kuom yawuote ne yiero odiechieng’ mar timo nyasi e ode owuon. Yawuoyigo ne luongoga nyiminegi adek mondo obi ochiem kendo ometh kodgi e nyasigo.
5 Ka ne gisetimo nyasigo e utegi duto, Ayub ne luongogiga mondo opwodhgi. Nomondo chiewo gokinyi mang’ich mondo ogol misango miwang’o+ ne moro ka moro kuom nyithindego. Nimar Ayub ne wachoga niya: “Di po ka nyithinda oseketho kuom wacho gimoro marach e wi Nyasaye e chunygi.” Kamano e kaka Ayub ne timoga.+
6 Chieng’ moro ka yawuot Nyasaye madier*+ nobiro e nyim Jehova,+ Satan+ bende ne ochopo kanyo.+
7 Jehova nopenjo Satan niya: “Ia kanye?” Satan nodwoko Jehova kama: “Aa dundora e piny ka alworora koni gi koni.”+
8 Eka Jehova nochako openjo Satan niya: “Be iseneno Ayub jatichna, koso? Onge ng’at ma chal kode e piny. En ng’at ma onge ketho kendo ma timne tir,+ oluoro Nyasaye kendo otang’ gi richo.”
9 Satan nodwoko Jehova niya: “Be iparo ni Ayub diluori ka onge gima oyudo kuomi?+
10 Donge iseketo chiel molwore+ kaachiel gi joode kod gimoro amora ma en-go? Iseguedho tich lwete+ kendo jambe opong’o piny?
11 To koro, rie lweti ikaw gik moko duto ma en-go mondo ine ka ok obi yanyi e wang’i.”
12 Eka Jehova nowacho ne Satan niya: “Ne! Gik moko duto ma en-go ni e lweti. Mak mana ni en owuon e ma kik imule!” Bang’ mano, Satan nowuok e nyim Jehova.+
13 Koro chieng’ moro ka noyudo nyithind Ayub timo nyasi e od owadgi maduong’+ ka gichiemo kendo gimetho,
14 ng’at moro nobiro ir Ayub mokelone wach niya: “Dhok ne puro to punde bende ne kwayo machiegni kodgi,
15 to apoya nono Jo-Sabea nomonjowa ma gikawo jamnigo duto kendo ginego jotich gi ligangla. An kenda e ma atony, omiyo akeloni wach.”
16 To ka ne pod owuoyo, jatich machielo nobiro mowacho niya: “Mach mowuok kuom Nyasaye* noa e polo mowang’o rombe duto gi jokwath monegogi te. An kenda e ma atony, omiyo akeloni wach.”
17 Ka ne pod owuoyo, jatich machielo nobiro mowacho niya: “Grube adek mag Jo-Kaldea+ nende omonjowa mokawo ngamia te kendo ginego jotich duto gi ligangla. An kenda e ma atony, omiyo akeloni wach.”
18 To ka ne pod owuoyo, jatich mar ang’wen nobiro mowacho niya: “Nyithindi ne madho divai kendo ne gichiemo e od wuodi maduong’,
19 to apoya nono yamo mager nokudho koa e thim mogoyo ot piny monego nyithindi duto te. An kenda e ma atony, omiyo akeloni wach.”
20 Ka ne Ayub owinjo mano, nochung’ moyiecho lepe kendo nolielo wiye, kae to nopodho piny auma
21 mowacho niya:
“Ne awuok duk e i minwa,Kendo nadog ma onge gimoro.+
Jehova e ma nochiwo+ kendo Jehova e ma osekawo.
We mondo opak nying Jehova.”
22 E wechego duto, Ayub ne ok oketho kata wacho ni Nyasaye otimo marach e yo moro amora.
Weche Moler Piny
^ Tiende nyalo bedo “Ng’at ma Isando.”
^ Hibrania, “dhok ariyo ariyo e jok 500.”
^ Hibrania, “punde ma mon.”
^ Yo machielo ma Jo-Hibrania ne luongogo malaike.
^ Kata nyalo bedo ni polo e ma nogoyogi.
