Fweny mar Johana 1:1-20
1 Mae en fweny mar Yesu Kristo ma Nyasaye nomiye+ mondo onyis wasumbnine+ gik ma nyaka timre e kinde mokayo machiegni. Kendo nooro malaikane ma ne ochiwo fwenyno kotiyo gi ranyisi ne misumbane ma Johana,+
2 jal ma nochiwo neno e wi wach ma Nyasaye nochiwo kod neno ma Yesu Kristo nochiwo, ee, jalo nochiwo neno e wi gik moko duto ma noneno.
3 Ng’at mamor en ng’at ma somo weche mokorgi gi dwol maduong’, kod jo ma winjogi, kendo ma timo kaluwore gi weche mondik e iye,+ nimar kinde ma ne oseket chiegni.
4 An Johana, andiko ne kanyakla abiriyo+ manie alwora mar Asia:
Mad ubed gi ng’wono mogundho kod kuwe moa kuom “Jal ma nitie, kendo ma ne nitie, kendo ma biro,”+ kod moa kuom roho abiriyo+ man e nyim kom-lochne,
5 kendo moa kuom Yesu Kristo “Janeno Migeno,”+ “jal ma ne okwongo chier a kuom jo motho,”+ kendo “Jaloch e wi ruodhi mag piny.”+
Ne jalno moherowa+ kendo ma nogonyowa waa e richo kokalo kuom rembe owuon+—
6 kendo ne omiyo wabedo pinyruoth+ kendo jodolo+ ma tiyo ne Nyasache kendo Wuon mare—ee, duong’ kod nyalo obedne nyaka chieng’. Amin.
7 Neuru! Obiro e boche polo,+ kendo wenge duto biro nene, kod jo ma ne ochwoye; kendo dhoudi duto mag piny biro goyo korgi gi kuyo maduong’ nikech en.+ Ee, Amin.
8 Jehova* Nyasaye wacho kama: “An e Alfa kendo an e Omega,*+ Jal ma nitie, kendo ma ne nitie, kendo ma biro, Jal Manyalo Duto.”+
9 An Johana owadu kendo jal ma riwore kodu e masiche,+ e pinyruoth,+ kendo e nano,+ ka wan e winjruok achiel gi Yesu.+ Ne oyudo an e chula miluongo ni Patmo nikech ne ayalo wach Nyasaye kendo chiwo neno kuom Yesu.
10 Roho ne omiyo abedo e odiechieng Ruoth, kendo ne awinjo dwol moro maduong’ ka mar turmbeta ka wuok gi ka ng’eya,
11 ka wacho niya: “Ndik gik mineno e buk modol, kendo iorgi ne kanyakla abiriyo: man Efeso,+ Smurna,+ Pergamo,+ Thuatira,+ Sarde,+ Filadelfia,+ kod Laodikia.”+
12 Ne alokora mondo ane ni en ng’a ma ne wuoyo koda, to ka ne aselokora, ne aneno gige chungo teyni abiriyo mag dhahabu,+
13 to e dier gige chungo teynigo ne nitie ng’at moro ma chal gi wuod dhano,+ morwakore gi nanga ma chopo nyaka piny e tiendene, kendo notueyo nanga moro mar dhahabu kolworo kore.
14 E wi mano, wi ng’atno kod yie wiye ne rachar ka yie rombo ma rachar kendo kaka pe, kendo wengene ne chal kaka ligek mach ma liel,+
15 kendo tiendene ne chal gi mula mosepwodh maler,+ ma rieny e kendo mar mach mager, kendo dwonde ne chal gi mor mar pige mang’eny.
16 To e bade korachwich ne nitie sulwe abiriyo;+ bende, ligangla mabith kendo mabor ma dhoge ariyo+ ne wuok koa e dhoge, kendo lela wang’e ne rieny ka chieng’ ma ng’ang’ni gi tekone duto.+
17 Ka nanene, ne apodho piny e tiendene ka ng’at motho.
Eka noketo lwete korachwich kuoma, mi nowachona kama: “Kik iluor. An e Jal Mokwongo+ kendo Mogik,+
18 bende an e jal mangima;+ kendo ne atho,+ to koro ne! sani angima nyaka chieng’,+ kendo an gi ofungu mag tho kod mag Liel.*+
19 Omiyo, ndik piny gik miseneno, gi gik ma nitie, kod ma biro timore bang’ mago.
20 To ma e tiend wach maler moum e wi sulwe abiriyo ma iseneno e bada korachwich kod gige chungo teyni abiriyo mag dhahabu: Sulwe abiriyogo gin malaike mag kanyakla abiriyo, to gige chungo teyni abiriyogo, gin kanyakla abiriyo.+
Weche Moler Piny
^ Som Apendiks A5.
^ Kata, “An e A kendo Z.” Alfa e nyukta mokwongo e dho Grik, to Omega e nyukta mogik.
^ Grik, “Hades.” Som Tiend Weche.
