Jeremia 29:1-32
29 Magi e weche ma ne nie barua ma janabi Jeremia nondiko ka en Jerusalem, mi oore ne jodongo, jodolo, jonabi, kod ji duto ma Nebukadnezar nogolo Jerusalem motero e tuech Babulon.
2 Ne ondiko baruano bang’ ka Ruoth Jekonia,+ min mare,+ jodongo mag od ruoth, jotend Juda gi Jerusalem, jotheth,* kod jo ma nolony e tije mag lwedo nosewuok Jerusalem.+
3 Ne oketo baruano e lwet Elasa wuod Shafan+ kod Gemaria wuod Hilkia, ma noyudo Zedekia+ ruodh Juda ooro ir Nebukadnezar ruodh Babulon. Baruano ne wacho niya:
4 “Ma e gima Jehova Nyasach oganda lweny, Nyasach Israel, osewacho ne ji duto ma ne agolo Jerusalem mi atero e tuech Babulon,
5 ‘Geruru udi mondo udagie. Pururu puothe kendo ucham gik ma ginyagonu.
6 Kenduru, mondo unyuol yawuoyi gi nyiri; bende, nyomburu ne yawuotu kendo uchiw nyiu, mondo gin bende ginyuol nyithindo. Nyuolreuru kuno mondo ubed mang’eny.
7 Daguru gi kuwe e piny ma aseteroue, kendo lemuru mondo Jehova okony dalano, nimar ka dalano nigi kuwe to unubed gi kuwe.+
8 Nikech ma e gima Jehova Nyasach oganda lweny, Nyasach Israel owacho: “Kik uwe mondo jonabi kod jokor wach manie kindu owuondu.+ Kik uchik itu ne lek maggi.
9 Nimar, ‘gikoro miriambo gi nyinga, to an ok aorogi,’+ Jehova owacho.”’”
10 “Ma e gima Jehova owacho, ‘Bang’ higni 70 e piny Babulon, abiro parou+ mi anaduoku e pinyu mondo achopgo singona.’+
11 “‘Nimar an awuon ang’eyo gima aparo kuomu,’ Jehova owacho, ‘adwaro ni ubed gi kuwe to ok masira,+ mondo amiu gima unyalo geno bang’e.+
12 Unuluonga, unubi ira mondo ulama, kendo anawinju.’+
13 “‘Unudwara mi unuyuda,+ nikech ubiro dwara gi chunyu duto.+
14 Anawe mondo uyuda,’+ Jehova owacho. ‘Abiro golou e pinje duto ma asekeyoue mi anachoku,’+ Jehova owacho. ‘Anaduoku e piny ma ne agoloue ka ne aterou e tuech.’+
15 “Kata kamano, usewacho ni, ‘Jehova osemiyowa jonabi e Babulon.’
16 “Ma e gima Jehova wacho ne ruoth mobet e kom-loch mar Daudi,+ kod ji duto modak e dalani, tiende ni oweteu ma ne ok oter e tuech,
17 ‘Ma e gima Jehova Nyasach oganda lweny owacho: “Abiro oronegi ligangla, kech, gi tuoche malich.+ Abiro miyo gichal ka ng’owo motop, ma ok nyal cham.”’+
18 “‘Abiro lawogi gi ligangla,+ kech, kod tuo malich. Pinjeruodhi duto manie piny+ biro bwok nikech gima timorenegi. Ka moro amora ma akeyogie ji biro bwok kendo liyo+ konenogi, gibiro kuong’ogi kendo yanyogi.+
19 Nikech ne gidagi winjo weche ma ne aoronegi kokalo kuom jotichna ma jonabi ma ne aoronegi nyadinwoya,’ Jehova owacho.+
“‘To usedagi winja,’+ Jehova owacho.
20 “Kuom mano, winjuru wach Jehova un ji duto moter e tuech, jo ma ne agolo Jerusalem mi atero Babulon.
21 Ma e gima Jehova Nyasach oganda lweny, Nyasach Israel owacho kuom Ahab wuod Kolaya, kod Zedekia wuod Maaseya ma koronu miriambo gi nyinga,+ ‘Abiro chiwogi e lwet Nebukadnezar* ruodh Babulon, mi enoneggi kuneno.
22 Kendo ka Jo-Juda ma noter e tuech Babulon dwaro kuong’o ng’ato, to gibiro wacho niya: “Jehova Nyasaye mondo otimni kaka notimo ne Zedekia kod Ahab, ma ne ruodh Babulon owang’o e mach!”
23 Nikech ne gitimo fuwo kuom Israel,+ ne giterore gi mond jowetegi, kendo ne giwacho miriambo gi nyinga to ne ok aorogi.+
“‘“An e ma ang’eyo wachno, kendo an janeno,”+ Jehova owacho.’”
24 “Iniwach ne Shemaya+ Ja-Nehelam ni,
25 ‘Ma e gima Jehova Nyasach oganda lweny, Nyasach Israel owacho: “Nikech iseoro barupe gi nyingi ne ji duto man Jerusalem, kendo ne Zefania+ wuod Maaseya, ne jadolo, kaachiel gi jodolo duto, kiwacho ni,
26 ‘Jehova oseketi mondo ibed jadolo kar Jehoyada, kendo ichung’ ne od Jehova. Kendo oseketi mondo imak ng’ato ang’ata ma janeko ma wuondore ni en janabi kendo itueye e lodi, initue ng’ute e lodi molos gi chuma.+
27 To ang’o momiyo pok ikwero Jeremia Ja-Anathoth+ ma wuondore ni en janabi?+
28 Nimar oseoronwa wach ka wan Babulon niya: “Ubiro dak kuno aming’a! Geruru udi mondo udagie. Pururu puothe kendo ucham gik ma ginyagonu,+—”’”’”
29 Ka ne jadolo Zefania+ osomo baruano ka janabi Jeremia winjo,
30 wach Jehova ne obiro ne Jeremia niya:
31 “Or wach ne ji duto manie tuech ni, ‘Ma e gima Jehova owacho kuom Shemaya Ja-Nehelam: “Nikech Shemaya osekoronu weche to ne ok aore, kendo osemiyo ugeno miriambo,+
32 ma e gima Jehova owacho, ‘Abiro kumo Shemaya Ja-Nehelam gi nyikwaye. Onge kata ng’ato achiel e ode ma biro tony, kendo ok obi neno gik mabeyo ma natim ne joga,’ Jehova owacho, ‘nimar osemiyo ji ong’anyo ne Jehova.’”’”
Weche Moler Piny
^ Kata nyalo bedo, “kod jo ma ne gero ohingni mag jorito.”
^ Iluonge bende ni Nebukadereza.
