Ne Jo-Galatia 4:1-31
4 Koro awacho ni, nikech jal ma biro yudo mwandu wuon-gi kaka pok pod en nyathi matin, ochal gi misumba kata obedo ni en e wuon gik moko duto,
2 to obedo e bwo rit mar jo ma taye kod jo ma ochung’ ne mwandu mag wuon-gi, nyaka chop kinde ma wuon-gi noseyangone motelo.
3 Kamano bende, ka ne wan nyithindo, wan bende ne wan wasumbni mag gik ma chiko yore kod paro mag pinyni.+
4 Kata kamano, ka kinde ma noket nochopo chuth, Nyasaye nooro Wuode ma dhako nonyuolo+ kendo nobedo e bwo chik,+
5 mondo eka ogony jo ma ni e bwo chik kong’iewogi,+ mondo mi wan bende oketwa wabed yawuot Nyasaye.+
6 Koro nikech un yawuot Nyasaye, oseoro roho+ mar Wuode ei chunywa+ kendo rohono kok niya: “Abba,* Wuora!”+
7 Omiyo, koro ok in misumba, to in nyathi Nyasaye, to ka in nyathine, Nyasaye miyo ibedo bende ng’at mabiro yudo pok mare.+
8 Kata kamano, e kinde ma ok nung’eyo Nyasaye, ne un wasumbni mag gik ma kuom adier ok gin nyiseche.
9 To koro nikech useng’eyo Nyasaye, kata ni Nyasaye oseng’eyou, obet nade ni udok e gik ma nyap+ kendo manono ma gin gik ma chiko yore kod paro mag pinyni, ka udwaro tiyonegi kaka wasumbni kendo?+
10 Uketo chunyu ahinya e rito odiechienge moyiedh, gi dweche,+ gi ndalo, kod higni.
11 Aluor ni tich matek ma asetimo nikech un nyalo bet kayiem nono.
12 Owetena, ahombou ni ubed kaka an, nimar an bende ne achal kodu.+ Onge ketho ma ne utimona.
13 To ung’eyo ni tuo moro mar ringruok e ma ne omiya thuolo mokwongo mar yalonu wach maber.
14 To kata obedo ni tuonano ne okelonu chandruok, ne ok uchaya kata ne ok ujara; to ne urwaka kaka malaika mar Nyasaye, kaka Kristo Yesu.
15 Kare ere mor ma ne un-go chonno? Nimar an gadier ni ka da nyalore, dikoro usegolo wengeu mi uchomonagi.+
16 Omiyo, dibed ni aselokora jasiku nikech awachonu adier?
17 Gitimo kinda ahinya ni mondo giloku, to ok nikech gin gi paro moro maber; gidwaro mana ketou mabor koda mondo ugomb luwogi.
18 Kata kamano, kinde duto en gima ber ka ng’ato luwore kodu gi kinda nikech odwaronu ber, ok mana e kinde ma antiere kodu to kinde duto.
19 Un nyithinda,+ muoch kaya kendo nikech un nyaka chop ubed gi kido mar Kristo kuomu.
20 Agombo bedo kodu sani, mondo awuo kodu e yo mopogore, nikech wachu omako dhoga.
21 Nyisauru ane, un mudwaro bedo e bwo chik, be uwinjo gima Chik wacho?
22 Kuom ranyisi, iwacho ei Ndiko ni, Ibrahim ne nigi yawuoyi ariyo, moro nonyuolo gi jatichne ma nyako+ to machielo gi dhako man thuolo;+
23 kata kamano, wuoyi ma jatichne ma nyako nonyuolo, ne onyuol e yo mapile,*+ to machielono dhako man thuolono e ma ne onyuolo kokalo kuom singo mar Nyasaye.+
24 Wechegi inyalo tigo kaka ngero; nimar mon-go ochung’ ne singruoge ariyo, achiel en moa e Got Sinai+ to onyuolo nyithindo ma bedo e bwo tuech, kendo en Hagar.
25 Koro Hagar ochung’ ne Sinai,+ ma en got moro e piny Arabia, to ochal gi Jerusalem ma nitiere sani, nimar en e bwo tuech kanyachiel gi nyithinde.
26 To Jerusalem man malo ni thuolo, kendo en minwa.
27 Nimar ondik niya: “Bed moil in dhako ma migumba ma ok nyuol; bed mamor kendo moil in dhako ma muoch ok ka, nimar nyithind dhako ma chwore oweyo ng’eny moloyo nyithind dhako man gi dichwo.”+
28 Owetena, wan koro wan nyithind singo mana kaka Isaka ne en.+
29 To mana kaka jal ma ne onyuol e yo mapile* nochako sando jal ma ne onyuol kokalo kuom roho,+ kamano bende e kaka timore sani.+
30 Ndiko to wacho ang’o? Owacho niya: “Riemb jatich ma nyakoni gi wuode, nikech wuod jatich ma nyakono ok bi chamo mwandu kaachiel gi wuod dhako man thuolo.”+
31 Omiyo, owetena, ok wan nyithind jatich ma nyako, to wan mag dhako man thuolo.
Weche Moler Piny
^ En dho Hibrania kata dho Aram ma tiende en “A Wuora.”
^ Grik, “ne onyuol kuom ringruok.”
^ Grik, “ne onyuol kuom ringruok.”
