Ne Jo-Rumi 12:1-21
12 Kuom mano, owetena, asayou kokalo kuom ng’wono mar Nyasaye ni uchiw ringreu+ kaka misango mangima, maler+ kendo ma Nyasaye oyiego, ka utiyone gi nyalou mar paro.+
2 Kendo weuru luwo kit pinyni,* to lokreuru kuom miyo pachu obed manyien,+ mondo ung’e gadier+ dwaro maber mar Nyasaye, dwaro mowinjore, kendo malong’o chuth e wang’e.
3 Nimar kokalo kuom ng’wono mogundho mosemiya, awacho ne ji duto manie kindu kanyo ni, kik ng’ato opar ni olong’o moloyo kaka ochal, to mondo opar e yo ma miyo obedo gi paro malong’o,+ ka ng’ato ka ng’ato timo kamano kaluwore gi okang’ ma Nyasaye osepogonego yie.+
4 Mana kaka ringruok achiel nigi fuonni mang’eny,+ to fuonnigo duto ok ti tich achiel,
5 e kaka wan bende, kata obedo ni wang’eny, wan ringruok achiel e winjruok gi Kristo, kendo waduto wan fuonni moriw kanyachiel.+
6 Omiyo, nikech wan gi mich mopogore opogore kaluwore gi ng’wono mogundho mosemiwa,+ ka en mar koro wach, wakor wach kaluwore gi yie mosepognwa;
7 kata ka en tich moro, wasik ka watime; kata ng’at ma puonjo, osik ka opuonjo;+
8 bende, ng’at ma jiwo ji mondo otim kamano;+ ng’at ma chiwo mondo otim kamano gi chuny moikore;+ ng’at ma tayo mondo otim kamano gi kinda;+ ng’at ma kecho jomamoko otim kamano gi mor.+
9 Herau mondo obed ma onge wuondruok.+ Sinuru gi gik maricho;+ makreuru gi gik mabeyo.
10 Herreuru kaka owete. Kuom wach miyo jomamoko duong’, beduru motelo.+
11 Beduru jokinda, to ok jo samuoyo.+ Kindau mondo oliel ka mach nikech roho.+ Tiuru kaka wasumbni mag Jehova.*+
12 Moruru nikech geno. Nanuru e masira.+ Lamuru ma ok uwe.+
13 Poguru gigu ne jo maler kaluwore gi gik ma gichando.+ Beduru jo ma rwako welo.+
14 Dhiuru nyime guedho jo ma sandou;+ kwauru ne jomoko gueth, to kik ukuong’gi.+
15 Moruru kanyachiel gi jo mamor; ywaguru kanyachiel gi jo ma ywak.
16 Gik ma uparo kuom jomamoko obed ma chal gi ma uparo kuomu; kik ubed gi paro mong’awore malo, to luwuru gik ma nenore ni ni piny.+ Kik ubed mariek e wang’u uwegi.+
17 Kik uchul richo kar richo ne ng’ato.+ Temuru timo gik ma ji duto neno ni beyo.
18 Ka nyalore, to temuru matek mondo udag gi kuwe gi ji duto.+
19 Owetena ma ahero, kik uchul kuor, to weuru thuolo ne mirimb Nyasaye;+ nimar ne ondik niya: “Jehova* owacho ni, ‘Chulo kuor en mara; abiro chulo.’”+
20 To “ka kech kayo jasiki, miye chiemo; ka riyo oloye, miye gimoro omadhi; nimar kitimo kamano to ibiro biwo chuk mach e wiye.”+
21 Kik iyie mondo gima rach oloyi, to sik kiloyo gima rach kuom timo gima ber.+
Weche Moler Piny
^ Kata, “chenro mar ndaloni.” Som Tiend Weche.
^ Som Apendiks A5.
^ Som Apendiks A5.
