Ne Jo-Rumi 15:1-33
15 Kata kamano, wan jo motegno onego wating’ nyawo mag jo ma yom yom,+ kendo kik watim mana gik ma morowa wawegi.+
2 Ng’ato ka ng’ato kuomwa mondo otim gik ma moro nyawadgi kendo gere.+
3 Nikech kata mana Kristo ok notimo mana gik ma more en owuon,+ to mana kaka ondik niya: “Jo ma ne yanyi koro yanya.”+
4 Nimar weche duto ma ne ondik chon, ne ondikgi mondo gipuonjwa,+ mondo kokalo kuom sinani ma watimo,+ kendo kokalo kuom hoch moa e Ndiko, wabed gi geno.+
5 Koro, Nyasaye ma konyowa bedo gi sinani kendo ma hoyowa, mondo omiu paro machal gi ma Kristo ne nigo,
6 mondo e winjruok achiel,+ umi Nyasaye ma Wuon Ruodhwa Yesu Kristo duong’, ka un gi dwol achiel.
7 Omiyo, rwakuru joweteu+ mana kaka Kristo bende norwakowa,+ mondo umigo Nyasaye duong’.
8 Nimar awachonu ni, Kristo nobedo jatich jogo duto moter nyangu+ mondo onyis ni Nyasaye en ja adiera, eka osirgo singo ma Nyasaye nomiyo kweregi,+
9 kendo mondo ogendni mamoko omi Nyasaye duong’ kuom kechne.+ Mana kaka ondik niya: “Mano e momiyo anapaki e lela e kind ogendni kendo anapak nyingi gi wer.”+
10 Owacho kendo kama: “Moruru un ogendni, gi joge.”+
11 Owacho bende niya: “Pakuru Jehova,* un ogendni duto, kendo ji duto mondo opake.”+
12 Isaya kendo nokoro kama: “Tiend yadh Jesse nobedie,+ jal ma noloch e wi ogendni;+ ogendni duto biro keto genogi kuome.”+
13 Nyasaye ma chiwo geno mondo opong’u gi mor kod kuwe mogundho nikech geno ma useketo kuome, mondo genou omedre kokalo kuom teko mar roho maler.+
14 Owetena, an awuon koro ang’eyo chuth, ni un bende upong’ gi gik mabeyo, nikech osepong’u gi ng’eyo duto, kendo ng’ato ka ng’ato kuomu nigi nyalo mar puonjo nyawadgi.
15 Kata kamano, asendikonu weche moko e yo moriere, mondo aparnugo wach moro nikech ng’wono mogundho mosemiya koa kuom Nyasaye
16 mondo abed jatich Kristo Yesu ma tiyo ne ji moa e ogendni.+ Sani atimo tich maler mar yalo wach maber mar Nyasaye,+ mondo ogendnigo obed kaka misango ma Nyasaye oyiego, ma roho maler osepwodho.
17 Omiyo, koro anyalo bedo mamor kuom Kristo Yesu nikech weche motudore gi Nyasaye.
18 Nikech ok abi ketora ni awacho gima opogore, mak mana gigo ma Kristo osetimo kokalo kuoma, mondo ogendni mamoko owinj Nyasaye kokalo kuom wechena kod timna,
19 ranyisi gi tije madongo,+ kendo kokalo kuom teko mar roho mar Nyasaye, nimar asetieko yalo wach maber e wi Kristo e okang’ malong’o chuth, kochakore Jerusalem ka alworo nyaka Iliriko.+
20 Kuom adier, asetemo ahinya mondo kik ayal wach maber kuonde ma ne oseyalie nying Kristo, mondo kik aged e mise mar ng’at machielo;
21 to mana kaka ondik niya: “Jo ma ne pok owinjo humbe biro neno, kendo jo ma pok owinjo weche nodonjnegi.”+
22 Mano e momiyo ne ogeng’a nyading’eny ni kik abi iru.
23 To koro sani onge ka ma pok ayaloe wach maber e alwora man kaegi, kendo kuom higni mang’eny,* asegombo mondo abi iru.
24 Kuom mano, ageno ni abiro nenou sa ma akadho ka adhi Spania, kendo ka asebedo kodu moromo ubiro kowa.
25 To sani achiegni wuok ka adhi Jerusalem mondo ati ne jo maler.+
26 Nimar jo ma ni Makedonia kod Akaya noneno ni ber mondo gigol chiwo ne jo maler modhier man Jerusalem.+
27 En adier ni ne gimor timo kamano, kendo kuom adier ne gin jogop jo malergo; nimar ka ogendni mamoko oseyudo ber motudore gi weche Nyasaye koa kuom jo malergo, gin bende dwarore ni gikony jo malergo gi gigegi mag ringruok.+
28 Omiyo, bang’ ka asetieko, kendo ka asetero chiwogo mochoponegi maber, abiro wuok kendo kalo iru ka achomo Spania.
29 E wi mano, ang’eyo ni ka abiro iru, abiro biro ka apong’ gi gueth moa kuom Kristo.
30 Owetena, koro asayou kokalo kuom Ruodhwa Yesu Kristo kendo kokalo kuom hera ma roho nyago, ni utim kinda ahinya kuriworu koda e kwayona Nyasaye e lamo,+
31 mondo oresa+ e lwet jo ma ok oyie man Judea, kendo mondo tich ma atimo ne Jerusalem obed ma jo maler oyiego,+
32 kendo ka en dwach Nyasaye, to abi iru ka amor mondo waduto wajiwre kanyachiel.
33 Nyasaye ma chiwo kuwe mondo obed kodu uduto.+ Amin.
