Joshua 6:1-27
6 Jo ma ne odak Jeriko ne olorore matek e i dalano nikech Jo-Israel. Onge ng’at ma ne wuok oko, kendo onge ng’at ma ne donjo e iye.+
2 Jehova nowacho ne Joshua niya: “Ne, aseketo Jeriko gi ruodhe kaachiel gi jolwenje ma roteke e lweti.+
3 Un jolweny, lworuru dalano dichiel pile ka pile. Timuru kamano kuom odiechienge auchiel.
4 Ket jodolo abiriyo mondo owuoth e nyim Sandug Singruok ka moro ka moro kuomgi oting’o tung yim. To e odiechieng’ mar abiriyo lworuru dalano dibiriyo, kendo jodologo onego ogo tungego.+
5 Ka gigoyo agoya tungego ni i, jolweny duto onego okog matek ka gigoyo milome mar lweny. Bang’ mano, ohinga mar dalano biro ruombore piny,+ kae to jolweny omonj dalano achiel kachiel.”
6 Omiyo, Joshua wuod Nun noluongo jodolo kaachiel monyisogi niya: “Kawuru sandug singruok, kendo jodolo abiriyo oting’ tunge abiriyo mondo giwuoth e nyim Sandug Singruok mar Jehova.”+
7 Kae to nowacho ne jolweny niya: “Dhiuru ulwor dalano ka jolweny ma omanore gi gigegi mag lweny+ otelo ne Sandug Singruok mar Jehova.”
8 Ne gitimo mana kaka Joshua ne ochikogi. Jodolo abiriyo ma ne oting’o tunge abiriyo e nyim Jehova ne otelo ka gigoyo tungegi ka sandug singruok mar Jehova to luwo bang’gi.
9 Jolweny ma ne omanore gi gige lweny ne otelo ne jodolo ma ne goyo tunge ka jolweny mamoko luwo bang’ Sandug Singruok. Tunge ne siko ywak ma ok ling’.
10 Koro Joshua nochiko jolweny niya: “Kik ugo koko, kendo kik winj dwondu. Ling’uru thi nyaka chieng’ ma abiro nyisoue ni, ‘Koguru!’ Eka unugo koko matek.”
11 Ne ogolo chik mondo gilwor dalano dichiel ka giting’o Sandug Singruok mar Jehova. Bang’ mano, ne gidok ma ginindo e kambi otienono.
12 Kinyne gokinyi, Joshua ne omondo chiewo, kendo jodolo nokawo Sandug Singruok+ mar Jehova.
13 Jodolo abiriyo ma ne nigi tunge abiriyo ne otelo ne Sandug Singruok mar Jehova ka gigoyo tungegigo ma ok giling’. Jolweny momanore gi gige lweny ne otelo e nyim jodologo. To jolweny mamoko ne luwo bang’ Sandug Singruok mar Jehova.
14 Odiechieng’ mar ariyo bende ne gilworo dalano dichiel kae to ne gidok e kambi. Ne gitimo kamano kuom ndalo auchiel.+
15 Odiechieng’ mar abiriyo, ne gimondo chiewo kogwen, kendo ne gilworo dalano kaka ne gisebedo ka gitimo, mak mana ni ne gilwore dibiriyo. Odiechieng’no kende e ma ne gilworoe dalano dibiriyo.+
16 To ka ne gilworo dalano mar abiriyo, jodolo nogoyo tungegi kae to Joshua nowacho ne jolweny niya: “Koguru matek+ nikech Jehova oseketo dalani e lwetu!
17 Ketheuru gi gik moko duto manie iye+ nikech gigo gin mag Jehova. Rahab+ dhako ma ochot kaachiel gi ji duto manie ode kende e ma uwe, nikech ne opando joote ma ne waoro mondo odhi onon dalano.+
18 To kik umul gik mowinjore okethi+ nimar di po ka chunyu ogombogi mi ukawogi.+ To kutimo kamano, ubiro kelo masira ne Jo-Israel ma umi okethgi.+
19 Kata kamano, gik moko duto molos gi fedha, dhahabu, mula, gi nyinyo gin gik mowal ne Jehova,+ omiyo onego otergi kar keno mar od Jehova.”+
20 Ka ne ogo tung’, jolweny ne okok matek.+ Ka ne giwinjo awinja ka tung’ ywak ni i, ne gikok matek gi milome mar lweny mi ohinga ne oruombore piny.+ Bang’ mano, ne gidhi achiel kachiel ma gimonjo dalano mi gikawe.
21 Ne ginego gimoro amora manie dalano gi ligangla, bed ni en dichwo kata dhako, ng’at moti kata nyathi, rwath, rombo, kata punda.+
22 Joshua nowacho ne chwo ariyo ma ne odhi nono piny Jeriko niya: “Dhiuru e od dhako ma ochotcha, kendo ukaw dhakono gi joge duto, mana kaka ne usekuong’orune.”+
23 Omiyo, chwo ariyogo nodhi mokawo Rahab, gi wuon mare, gi min mare, gi nyithindgi, kaachiel gi joge duto; ee, ne gikawo joodgi duto+ ma giterogi oko mar kambi Jo-Israel.
24 Bang’ mano, ne giwang’o dalano gi gimoro amora manie iye. Kata kamano, fedha, dhahabu, gi gik molos gi mula, gi gik molos gi nyinyo to ne gitero kar keno mar od Jehova.+
25 Jo ma Joshua ne ok onego ne gin Rahab dhako ma ochot gi joge duto kaachiel gi od wuon mare.+ Ne ok onegogi nikech Rahab ne opando joote ma ne ooro mondo onon dala mar Jeriko;+ kendo Rahab pod odak e piny Israel nyaka kawuononi.+
26 Gie kindeno, Joshua ne okuong’ore niya: “Ng’ato ang’ata motemo gero dala mar Jeriko kendo, nobed ng’at mokuong’ e nyim Jehova. Koketo mise mar dalano, wuode makayo notho, kendo kochungo rangeye dalano, wuode ma chogo notho.”+
27 Omiyo, Jehova ne nigi Joshua,+ kendo humb Joshua nolandore e piny mangima.+
