Malaki 2:1-17
2 “To koro, un jodolo, ma e chik ma omiyou.+
2 Ka utamoru chiko itu kendo miyo nyinga duong’ koa e chunyu,” Jehova Nyasach ogendni owacho, “Abiro oronu kuong’+ kendo abiro loko gueth magu mondo obed kuong’.+ Adier, aseloko gueth magu mobedo kuong’ nikech chunyu osetamore rwako wechena.”
3 “Neuru! Abiro ketho kodhi ma usechuoyo nikech timbeu,+ kendo abiro rwadho wengeu gi owuoyo, mana gi owuoch sewni magu, mi ibiro teru kuno.*
4 Eka unung’e ni asemiyou chikni mondo singruok ma ne atimo gi Lawi odhi nyime,”+ Jehova Nyasach oganda lweny owacho.
5 “Singruok ma ne atimo kode ne en mar ngima, gi kuwe, kaachiel gi luoro. Ne oluora, ee, ne oluoro nyinga.
6 Chik mar adiera ne nie dhoge,+ kendo onge wach moro amora ma ok kare ma ne oyud e dhoge. Ne owuotho koda gi kuwe kod tim makare,+ kendo ne oloko ji mang’eny mi giweyo richogi.
7 Nimar dho jadolo onego orit rieko, kendo ji onego omany puonj* moa e dhoge,+ nikech en e jaote mar Jehova Nyasach oganda lweny.
8 “To un uwegi usebaro muweyo yo. Usemiyo ji mang’eny ochwanyore e chik.*+ Useketho singruok ma ne atimo gi Lawi,”+ Jehova Nyasach oganda lweny owacho.
9 “Anami ji ochau kendo ojaru nikech utamoru luwo yorena, kendo ne utiyo gi chikna e dewo wang’ jomoko.”+
10 “Donge waduto wan gi wuoro achiel,+ koso? Donge Nyasaye e ma ne ochueyowa waduto, koso? To ang’o momiyo undhogoru,+ kendo udwanyo singruok ma ne kwerewa otimo?
11 Juda osetimo andhoga, kendo nitie gimoro modwanyore mosetim e Israel gi Jerusalem. Nimar Juda dwanyo ler* mar Jehova+ mohero ahinya. Kendo osekendo nyar nyasaye moro manono.+
12 Jehova biro nego ng’ato ang’ata ma timo kamano mi nogole e hembe mag Jakobo, kata bed ni ng’atno en ng’at manade, kendo kata obedo ni ng’atno chiwo mich ne Jehova Nyasach oganda lweny.”+
13 “Bende, nitie gima chielo ma usetimo mi umiyo kendo mar misango mar Jehova opong’ gi pi wang’, gi ywagruok, kod chur, Omiyo, ok odew mich muchiwone kendo ok omor gi gimoro amora moa e lwetu.+
14 To upenjo ni, ‘Nikech ang’o?’ En nikech Jehova osebedo janeno e kindi kod chi tinni ma isetimone andhoga, kata obedo ni en jabathi kendo chiegi ma ne itimogo singruok.+
15 To nitie ng’at achiel ma ne ok otimo mano nikech pod ne en gi roho ma ne odong’. Ang’o ma ng’atno ne gombo ahinya? Koth Nyasaye. Omiyo, rituru chunyu kendo ng’ato kik ndhog chi tinne.
16 Nimar asin gi wach ketho kend chuth,”+ Jehova Nyasach Israel owacho, “kendo asin gi ng’at ma ohero timbe gero,”* Jehova Nyasach oganda lweny owacho. “Rituru chunyu kendo kik undhog joweteu.+
17 “Usejogo Jehova gi wecheu.+ Kata kamano upenjo ni, ‘Wasejoge nade?’ Kuom wacho ni, ‘Ng’at ma timo gik maricho en ng’at maber e wang’ Jehova, kendo ohero ng’at ma kamano,’+ kata kuom wacho ni, ‘Ere Nyasaye ma ng’ado bura kare?’”
Weche Moler Piny
^ Tiende ni, ibiro tergi kama ne ipukoe owuoch le mosetimgo misango.
^ Kata, “chik.”
^ Kata nyalo bedo, “nikech puonj magu.”
^ Kata nyalo bedo, “ka maler.”
^ Kata, “ng’at ma umore gi gero.”
