Wuok 15:1-27
15 Gie kindeno, Musa gi Jo-Israel nowero ne Jehova wendni:+
“Anawer ne Jehova nikech oseyudo duong’ ahinya.+
Osewito faras gi ng’at moidhe e i nam.+
2 Jah* e tekona, nikech en e ma oresa.+
Ma e Nyasacha, kendo abiro pake;+ en e Nyasach wuonwa,+ kendo abiro miye duong’.+
3 Jehova en jalweny ma ratego.+ Jehova e nyinge.+
4 Osewito geche Farao kod jolweny mage e nam,+Kendo jolwenyne molony mogik osenimo e Nam Makwar.+
5 Apaka madongo noumogi; ne ginyumore e bwo nam ka kidi.+
6 A Jehova, lweti ma korachwich nigi teko mang’eny.+
A Jehova, lweti ma korachwich nyalo ng’injo wasiki matindo tindo.
7 Inyalo loyo jo ma piem kodi+ nikech tekoni maduong’;Mirimbi ma liel ka mach wang’ogi ma tiekgi ka tiang’.
8 Kuom much umi nimiyo pi ogingore kamoro achiel;Pi ma ringo ne ochung’ kaka ohinga;Apaka madongo nolokore pi mopoto e chuny nam.
9 Jasigu nowacho niya: ‘Analawgi mi anajukgi!
Anayak gikgi duto ma adwaro!
Anawuodh liganglana, mi natiekgi!’+
10 Ne ikudho muya mi nam oimogi;+Ne gilwar ka chuma mi ginimo e nam matut.
11 A Jehova, be nitie nyasaye moro amora ma chalo kodi?+
Ere ng’a maler moloyi?+
In e Ng’at monego omi luor kendo opak gi wer, Ng’at ma timo honni miwuoro.+
12 Nirieyo lweti ma korachwich, mi piny omuonyogi pep.+
13 Herani mosiko osemiyo itelo ne jogi ma ne ireso;+Ibiro tiyo gi tekoni mondo itelnegi nyaka kar dakni maler.
14 Ogendni nowinj+ mi ginitetni gi luoro;Ywagruok* maduong’ nomak jo modak Filistia.
15 E kindeno, luoro maduong’ nomak jodong Edom,Kendo jotelo mag Moab notetni gi luoro.+
Jo modak Kanaan duto ok nobed gi chir.+
16 Luoro gi bwok maduong’ biro makogi.+
Lweti ma nigi teko nomi gichung’ achung’a ka kidiNyaka jogi okal, A Jehova,Nyaka jogi miseyiero+ okal.+
17 A Jehova, ibiro kelogi mi ipidhgi ka yien e godi iwuon,+Ka ma iseiko mondo obed kar dakni,Ka maler misegero gi lweti, A Jehova.
18 Jehova biro bedo ruoth nyaka chieng’.+
19 Ka ne jolwenj Farao moidho gechene gi faresene odonjo e nam,+Jehova nodwoko pi nam moimogi,+Jo-Israel to nong’ado nam ka giwuotho e lowo motwo.”+
20 Kae to Miriam janabi ma dhako ma nyamin Harun nokawo oyieke, kendo mon duto noluwo bang’e ka gigoyo oyieke kendo ka gimiel.
21 Jo ma chwo ne wer, to Miriam ne olo niya:
“Weruru ne Jehova nikech oseyudo duong’ ahinya.+
Osewito faras gi ng’at moidhe e nam.”+
22 Bang’e, Musa ne ogolo Jo-Israel e dho Nam Makwar. Ne gichopo e thim mar Shur kendo ne giwuotho e thimno kuom ndalo adek, to ne ok giyudo pi.
23 Ne gichopo ka miluongo ni Mara.*+ Kata kamano, ne ok ginyal modho pi ma yudore kuno nikech pigno ne kech. Mano e momiyo noluongo kanyo ni Mara.
24 Mi ji nochako ng’ur ne Musa+ ka giwacho niya: “Koro wabiro modho ang’o?”
25 Eka Musa noywak ne Jehova+ mi Jehova nosiemone yath moro. Ka ne obolo yadhno e pi, pigno nobedo mamit.
Kanyo e ma Nyasaye nomiyogie chikene kod buchene, kendo kanyo e ma notemogie.+
26 Nyasaye nowachonegi niya: “An e Jehova Nyasachu. Ka uwinjo wachna chutho kendo utimo gik makare e wang’a, kendo kuwinjo chikena duto+ muluwogi, ok nakelnu tuoche ma ne akelo ne Jo-Misri.+ An e Jehova ma changou.”+
27 Bang’ mano, ne gichopo ka miluongo ni Elim ka ma ne nitie sokni 12 mag pi kod yiend othidhe 70. Ne gigoyo kambi but soknigo.
Weche Moler Piny
^ “Jah” en nying Jehova e yo machuok.
^ Hibrania, “muoch ma kayo dhako ma dwaro nyuol.”
^ Tiende ni, “Makech.”
