E dwe mar Oktoba tarik 9, higa mar 2024, riwruok mar World Wildlife Fund nochiwo ripot moro. Ripodno nonyiso kaka timbe dhano osemiyo kwan mag le mag bungu odok piny. Nowacho ni “kuom higni 50 kama mokalo (1970-2020), kwan mag le mag bungu osedok piny gi pasent 73.” Ripodno nomedo wacho kama: “Wanyalo wacho gadier ni gik ma biro timore kuom higni 5 mabiro, e ma biro nyiso kaka piny biro chalo.”

 Ripode kaka mago kawoga ji mang’eny gi wuoro. Wahero pinywa ma jaberni kendo ok wamor neno ka le modak e iye isando kendo inego. To mano en nikech Nyasaye ne dwaro ni dhano e ma orit le.​—Chakruok 1:27, 28; Ngeche 12:10.

 Omiyo, inyalo penjori niya, ‘Be wabiro rito le mag bungu e yo maber? Ang’o ma Muma wacho?’

 Kata watim duto ma wanyalo mondo warit le, pod ok wabi ritogi maber kaka Nyasaye dinotimo. Ka luwore gi Fweny 11:18, Muma nokoro ni Nyasaye biro “ketho joma ketho piny.” Ndikono puonjowa weche ariyo ma luwogi:

1.  1. Nyasaye ok bi weyo mondo dhano oketh piny chuth.

2.  2. Machiegnini, Nyasaye biro kawo okang’ mar loso weche. Wang’eyo mano nade? En nikech e kindegi, dhano nego le okang’ ma malo moloyo kinde moro amora mosekalo.

 Ang’o ma Nyasaye biro tiyogo e tieko chandruogno chuth? Obiro tiyo gi sirkal mare manie polo kata Pinyruodhe, kendo obiro locho e wi piny duto. (Mathayo 6:10) Kokalo kuom sirkandno, obiro puonjo dhano kendo tiegogi kaka ginyalo rito piny kod le mag bungu e yo maber.​—Isaya 11:9.