“Luor wuoru gi meru mondo idag aming’a e piny ma Jehova Nyasachi biro miyi.”​—Wuok 20:12, Loko mar Piny Manyien.

 “Luor wuoru gi meru, eka mondo idag aming’a e piny ma Ruoth Nyasaye ma Nyasachu biro miyou.”​—Wuok 20:12, The Bible in Luo, 1976.

 Nyasaye nochiko Jo-Israel machon ni giluor jonyuolgi. Chikno nigi singo ma nyiso ber mamoko ma winjo jonyuol kelo. Kata obedo ni Jokristo ok ni e bwo chike ma nomi Musa, chike ma Nyasaye nochiwogo to pok olokore. Chike mag Nyasaye otenore kuom puonj madongo, kendo pod gikonyo nyaka e kindegi.​—Jo-Kolosai 3:20.

 Nyithindo duto, bed ni gitindo kata gidongo, nyisoga ni gimiyo jonyuolgi luor sama giwinjogi. (Tim Jo-Lawi 19:3; Ngeche 1:8) Kata ka nyithindo osebedo joma dongo ma gin bende gibedo gi joutegi, pod giheroga jonyuolgi kendo gikonyogiga. Kuom ranyisi, gitemoga matek mondo jonyuolgi orit e yo maber ka giseti, to mano nyalo riwo konyogi e weche mag pesa sama mano dwarore.​—Mathayo 15:4-6; 1 Timotheo 5:4, 8.

 Nyithind Jo-Israel nonego omi wuonegi kaachiel gi minegi luor, kendo mano ne konyogi ng’eyo migawo ma mine ne nigo e ot. (Ngeche 6:20; 19:26) E kindegi bende, dwarore ni nyithindo omi jonyuolgi duto luor.

 Luor monego nyithindo omi jonyuolgi nigi tong’. Ka po ni janyuol, kata ng’at machielo, ne dwaro ni nyithind Jo-Israel otim gima tuomore gi chik Nyasaye, ne ok onego giwinjgi. (Rapar mar Chik 13:6-8) E kindegi bende, Jokristo nyaka ‘winj Nyasaye nikech en e jalochwa, kar winjo dhano.’​—Tich Joote 5:29.

 E chik ma Nyasaye nomiyo Jo-Israel, nosingo ni nyithindo ma miyo jonyuolgi luor ne ‘dhi dak aming’a kendo ngimagi ne dhi dhi maber e piny ma Nyasaye ne dhi miyogi.’ (Rapar mar Chik 5:16) Nyithindo ma nomiyo jonyuolgi luor ne ok dhi yudo kum ma nyithindo ma ne ochayo jonyuolgi ne yudo. (Rapar mar Chik 21:18-21) Kata obedo ni kinde malach osekalo, puonj ma wayudo kuom wechego pok olokore. (Jo-Efeso 6:1-3) Bed ni wan joma tindo kata joma dongo, nyaka wawinj Jachuechwa. Kendo mana kaka nosingo, nyithindo ma winjoga Nyasaye kod jonyuolgi biro dak aming’a. To bende gin gi geno mar dak nyaka chieng’.​—1 Timotheo 4:8; 6:18, 19.

 Nitie gik ma wanyalo puonjore ka luwore gi kama oketie chik ma yudore e Wuok 20:12. (Wuok 20:1-17) Chike moket mokwongo ne chikni nyiso ting’ ma Jo-Israel ne nigo mar lamo Nyasaye kende. Chike ma noluwo chikno nyiso gik ma dwarore ni dhano otim ne jowetegi, moriwo nyaka bedo ja adiera e kend, kod chik ma ne kwerogi ni kik gikwel. Kuom mano, chik ma wacho ni nyathi ‘oluor wuon-gi gi min-gi’ ineno kaka chik ma tudo chike ma nokwongo ne chikni kod ma noluwe.