Ji mang’eny mosepenjore penjogo osechandore ahinya kendo ok gidwar mana dwoko mag penjogo kende, to gidwaro hoch. Jomoko neno nek maduong’ mar Jo-Yahudi kaka gima rach ahinya ma dhano osetimo, omiyo ok yotnegi yie kuom Nyasaye.

Adiera: Joma nigi yie motegno osepenjore gimomiyo Nyasaye oweyo gik maricho mondo otimre. Kuom ranyisi, janabi Habakuk nopenjo Nyasaye kama: “Ang’o momiyo timbe gero kod kethruok nie nyima? Ang’o momiyo dhawo gi lweny medore ameda?” (Habakuk 1:3) Kar kwero Habakuk, Nyasaye noyie mondo ondik penjogo e Muma mondo ji duto osom.

Adiera: Nyasaye osin gi gik maricho kod chandruoge ma gik marichogo kelo. (Ngeche 6:16-19) E kinde Noa, Nyasaye “nowinjo malit e chunye” nikech timbe gero ma ne onya e piny. (Chakruok 6:5, 6) Onge kiawa ni Nyasaye nowinjo malit ahinya ka ne oneg Jo-Yahudi mang’eny.​—Malaki 3:6.

Adiera: Nyasaye noweyo mondo Jo-Rumi oketh Jerusalem e kinde Jokristo mokwongo. (Mathayo 23:37–24:2) Kata kamano, chakre kindeno, Nyasaye ok yier oganda moro mondo okumgi kata oguedhgi. E wang’ Nyasaye, “onge pogruok e kind Ja-Yahudi gi Ja-Grik.”​—Jo-Rumi 10:12.

Adiera: Kata obedo ni Nyasaye ok kel chandruok, seche moko oweyoga mondo chandruok obedie kuom kinde matin.​—Jakobo 1:13; 5:11.

Nyasaye noweyo mondo nekno otimre mana kaka oseweyo mondo dhano duto ochandre e kindegi. Osetimo kamano mondo wayud dwoko e wi gik moko ma ne otimore higni mang’eny mokalo. Muma nyisowa maler ni gie sani, Satan e ma locho e pinyni to ok Nyasaye. (Luka 4:1, 2, 6; Johana 12:31) Muma nyisowa adiera moko ariyo ma konyowa ng’eyo gimomiyo Nyasaye noweyo mondo nekno otimre.

1. Nyasaye nochueyo dhano gi nyalo mar timo yiero. Nyasaye nonyiso Adam gi Hawa gik ma ne odwaro ni gitim, kata kamano, ne ok ochunogi mondo giluw chikene. Gin giwegi e ma ne giyiero gik makare monego gitim kod ma ok onego gitim, to yierogino kaachiel kod yiero ma ji mang’eny osetimo machalo kamano, osekelo chandruoge mang’eny ne dhano. (Chakruok 2:17; 3:6; Jo-Rumi 5:12) Buk miluongo ni Statement of Principles of Conservative Judaism wacho kama: “Chandruoge mang’eny nitie e piny nikech ji tiyo marach gi mich mar timo yiero ma ne Nyasaye omiyogi.” Kar mayowa michno, Nyasaye osemiyo dhano thuolo mar timo gik moko kendgi ma ok odonjoree.

2. Nyasaye biro tieko chandruoge duto te ma ne okel gi nek mar Jo-Yahudi. Nyasaye singo ni obiro chiero ji milionde mosetho moriwo nyaka Jo-Yahudi ma ne onegi. Bende, obiro golo lit ma joma ne otony e nekno winjo nikech gik maricho ma ne gineno e kindeno. (Isaya 65:17; Tich Joote 24:15) Hera ma Nyasaye oherogo dhano miyo wabedo gadier ni obiro chopo singono.​—Johana 3:16.

Ji mang’eny ma ne otony e kinde ma ne inego Jo-Yahudi nodhi nyime bedo gi yie kendo yudo mor e ngima, nikech ne ging’eyo gimomiyo Nyasaye oweyo gik maricho mondo otimre kod kaka ochano tieko chandruoge ma gik maricho osekelo.