Masira Maduong’ En Ang’o?
Dwoko ma Muma Chiwo
Kinde masira maduong’ biro bedo kinde matekie moloyo kinde moro amora mosegabetie. Kaluwore gi weche ma nokor e Muma, masira maduong’ biro tugore “e ndalo mag giko.” (2 Timotheo 3:1; Daniel 12:4) Obiro bedo “masira ma pok ne otimore a chakruok mar chuech Nyasaye nyaka chop sani, to ok nochak otimre kendo.”—Mariko 13:19; Daniel 12:1; Mathayo 24:21, 22.
Gik mabiro timore e kinde masira maduong’
Ibiro keth dinde mag miriambo. Dinde mag miriambo ibiro keth mapiyo ahinya. (Fweny 17:1, 5; 18:9, 10, 21) Riwruoge mag siasa ma otelne gi Riwruok mar Pinje (United Nations) e ma biro timo mano.—Fweny 17:3, 15-18. *
Ibiro monj din madier. E fweny ma ne Ezekiel oneno, Gog mar Magog, ma ochung’ ne pinje ma biro nywako mondo gimonj jotich Jehova e kinde masira maduong’. Kata kamano, Nyasaye biro rito joge mondo kik hinygi.—Ezekiel 38:1, 2, 9-12, 18-23.
Ibiro ng’ad bura ne joma odak e piny. Yesu biro ng’ado bura ne ji duto kendo “obiro pogo ji koketogi e kidienje ariyo mana kaka jakwath pogo rombe gi diek.” (Mathayo 25:31-33) Yesu biro ng’ado bura ne ji kaluwore gi kaka ng’ato ka ng’ato ne otimo ne ‘owetene’ tiende ni jogo ma biro locho kode e polo.—Mathayo 25:34-46.
Ibiro chok joma biro locho e polo. Jokristo moseyier mondo obi oloch gi Kristo ibiro chier mondo gidhi e polo.—Mathayo 24:31; 1 Jo-Korintho 15:50-53; 1 Thesalonika 4:15-17.
Har–Magedon. Ma en “lweny mar odiechieng’ maduong’ mar Nyasaye Manyalo Duto” ma bende iluongo ni ‘odiechieng’ mar Jehova.’ (Fweny 16:14, 16; Isaiah 13:9; 2 Petro 3:12) Joma ong’adne buch tho ibiro keth chuth. (Zephania 1:18; 2 Thesalonika 1:6-10) Bende ibiro keth ondiek ma nigi wiye abiriyo tiende ni sirkande duto mag siasa.—Fweny 19:19-21.
Gik mabiro timore bang’ masira maduong’
Ibiro twe Satan kaachiel gi Jochiendene. Malaika moro maduong’ biro wito Satan kaachiel gi jochiendene “e abiso,” kama gibiro chaloe mana ka gima githo. (Fweny 20:1-3) Bedo mar Satan e abiso inyalo pim gi bedo e jela nikech ok obi bedo gi nyalo mar timo gimoro amora.—Fweny 20:7.
Higni 1000 mar loch Kristo chakore. Pinyruodh Nyasaye biro chako lochne mar higni 1000 kendo obiro kelo gueth mogundho ne dhano. (Fweny 5:9, 10; 20:4, 6) “Oganda mang’ongo” biro tony “e masira maduong’,” kendo gibiro neno ka Pinyruoth chako lochne mar higni 1000.—Fweny 7:9, 14; Zaburi 37:9-11.
^ par. 2 E bug Fweny, Babulon Maduong’ kata “dhako ma ndhaga” ochung’ ne din mar miriambo. (Fweny 17:1, 5) Ondiek makwar ma rieny, ma biro ketho Babulon Maduong’, en kido mochung’ ne riwruok ma tije en choko ogendni mag piny. Chon niluongo riwruogno Riwruok Matudo Pinje (League of Nations) to sani iluonge ni Riwruok mar Pinje (United Nations).
Samoro Inyalo Hero Magi Bende
DWOKO PENJO MA JI NIGO E WI MUMA
Har-Magedon En Ang’o?
Har-Magedon en wach motigo mana dichiel e Muma, kata kamano nitie ndiko mang’eny ma wuoyo e wi lwenyno.
OHINGA MAR JARITO
Ang’o Mabiro Timore Chieng’ Bura?
ESSENTIAL BIBLE TEACHINGS
Ang’o Momiyo Nyasaye ne Ochueyo Piny?
Piny opong’ gi gik mabeyo. Ok okete mabor ahinya kata machiegni ahinya gi chieng’, oleng’ore e yo mowinjore, kendo owinyore kolworo chieng’ e spid makare. Ang’o momiyo Nyasaye notimo kinda ahinya e loso piny?
