Ere Kaka Misango mar Yesu Nobedo “Rawar ne Ji Mang’eny”?

TUGE

Dwoko ma Muma Chiwo

Misango mar Yesu e yo ma Nyasaye tiyogo e waro dhano kuom richo kod tho. Muma wacho ni remb Yesu ma ne ochuer e nengo mar rawar. (Jo-Efeso 1:7; 1 Petro 1:18, 19) Omiyo, Yesu ne owacho ni nobiro mondo “ochiw ngimane obed rawar ne ji mang’eny.”—Mathayo 20:28.

Ang’o momiyo misango mar “rawar ne ji mang’eny” ne dwarore?

Dhano mokwongo Adam, ne en ng’at makare chuth ma onge richo. Ne onyalo dak nyaka chieng’ kata kamano, ne olalo ngimano ka ne otamre winjo Nyasaye. (Chakruok 3:17-19) Kane onyuolo nyithindo, nomiyogi alama kata mbala mar richo. (Jo-Rumi 5:12) Kuom timo mano Muma wacho ni Adam ne obedo “jal ma richo oseng’iewo” kaachiel gi nyithinde ma gibedo wasumbni mag richo kod tho. (Jo-Rumi 7:14) Nikech ne gibedo joricho, onge ng’ato kuomgi ma ne nyalo waro gima Adam ne olalo.—Zaburi 49:7, 8.

Nyasaye ne okecho nyikwa Adam nikech ne gidak e ngima maonge geno. (Johana 3:16) Kata kamano, kaluwore gi chikene, Nyasaye ne dwaro ni owene dhano richogi gi gimomiyo. (Zaburi 89:14; Jo-Rumi 3:23-26) Nikech Nyasaye ohero dhano, nochiwo gima dwarore ma ne dhi miyo owene dhano richogi chuth. (Jo-Rumi 5:6-8) Gino en misango mar Yesu.

Rawar konyo nade?

E Muma wach molok ni “rawar” oriwo weche adekgi:

En chudo.—Kwan 3:46, 47.
En gima ichiwo mondo ogony, kata owargo ng’ato.—Wuok 21:30.
Nyaka obed maromre kod gima ichulo. *

Ne ane kaka wechegi otudore gi misango ma ne Yesu ochiwo.

Chudo. Muma wacho ni Jokristo “nong’iew gi nengo.” (1 Jo-Korintho 6:20; 7:23) Nengono en remb Yesu ma ne otigo e ‘ng’iewo ne Nyasaye ji koa e dhoudi duto, gi dhok duto, gi dhano mopogore opogore duto, kod ogendni duto.’—Fweny 5:8, 9.
Gonyo. Misango mar Yesu nomiyo ‘ogonywa’ a e richo.—1 Jo-Korintho 1:30; Jo-Kolosai 1:14; Jo-Hibrania 9:15.
Kaka ochalo gi gima ne olal. Misango mar Yesu chalre ahinya gi gima Adam nolalo tiende ni ngima makare chuth. (1 Jo-Korintho 15:21, 22, 45, 46) Muma wacho niya: “Mana kaka kokalo kuom tim ng’ato achiel [Adam] mar tamruok luwo chik, ji mang’eny nobedo joricho, e kaka bende kokalo kuom tim ng’ato achiel [Yesu] mar luwo chik, ji mang’eny ibiro kwan kaka joma kare.” (Jo-Rumi 5:19) Mano emomiyo tho mar ng’ato achiel nyalo waro joricho mang’eny. Omiyo, misango mar Yesu en “kaka rawar” ne jogo duto ma kawo okang’ madwarore.—1 Timotheo 2:5, 6.

^ par. 7 E Muma wach molok ni “rawar” itiyogo kiwuoyo kuom nengo mar gimoro kata nengo maromre gi gima iwaro. Kuom ranyisi, wach ma itiyogo e dho Hibrania ni ka·pharʹ, tiende en “umo.” (Chakruok 6:14) Itiyoga kode e nyiso ni iumo richo. (Zaburi 65:3) Koʹpher bende e dho Hibrania nyiso nengo mochul mondo oum kata owar gimoro. (Wuok 21:30) E dho Grik lyʹtron, ma en wach milokoga ni “rawar” inyalo lok bende ni “nengo michulo mondo owar” gimoro. (Mathayo 20:28; The New Testament in Modern Speech, by R. F. Weymouth) Jondiko ma Jo Grik notiyo gi wachno sama giwuoyo kuom chudo ma imiyo misumba mogony.