Mondo oguyo ofu, liet mar chieng’ nyaka kwong mur leche mag buombene. Sama boche ogeng’o chieng’, oguyo miluongo ni cabbage white kwongoga ne oguyo mamoko fuyo. Ang’o momiyo?

Par ane: Ka pok oguyo mamoko ofuyo, nyaka gio chieng’ komondi ka giumo buombegi kata ka giyarogi ariwa. Cabbage white to ketoga buombene olos V. Jotim nonro osefwenyo ni ka buomb oguyo oloso V, okwanyo liet mang’eny kaka nyalore. Chung’ kamano miyo lechene mag fuyo murore piyo, to mano miyo ofuyo ma piyo.

Jotim nonro moko ma ni e University of Exeter e piny England notemo nono kaka ginyalo kopo buomb oguyo miluongo ni cabbage white mondo gilos solar panels ma kwanyo liet piyo. Ka ne gitimo kamano, ne giyudo ni teko mar solar panels ma ne gilosogo nomedore gi pasent 25.

Jotim nonrogo nofwenyo bende ni buomb oguyono rieny ahinya ka chieng’ ogoye. Ka ne gikopo yo ma buomb oguyono olosogo V kod kaka orieny, ne giloso solar panels ma yot ting’o kendo ma golo sitima mang’eny moloyo ma pile. Nyak ma nobetieno nomiyo Profesa Richard ffrench-Constant ma ne en achiel kuom jotim nonrogo owacho ni oguyo miluongo ni cabbage white “olony e choko teko mar chieng’.”

Ineno nade? Be yo ma oguyo miluongo ni cabbage white chung’go ka buombene oloso V nosieko kende, koso nitie ng’ama nochueye?