Mꞹ kja gi ñʼekjebi dʼa tsʼimbane bʼꞹma me ri mⱥjⱥbi, pe xo ra søxꞹ in mꞹbʼꞹgebi nange dya i pa̱rgebi ja rgi chezhebi in tsʼimbane. Nudya ri tsjogꞹbi na punkjꞹ ora ke ri pjørꞹgebi, bʼꞹma ra zⱥdʼⱥ nu paa kʼꞹ ra mboo in kuebi. In tsʼimbane dya ra jyɇskʼibi ri i̱ji̱ na joo, ra bʼꞹbʼꞹ paa kʼꞹ me ri mⱥjⱥbi ñe ra bʼꞹbʼꞹ paa kʼꞹ in tsʼimbane ra tsjakʼꞹ ri mbɇkuɇbi. Zo rga kjanu, ri ñubi pje ri tsjabi ngekʼua ri pjørꞹbi in tsʼimbane, pe xo ri ñuu pje nesta ni suu o ni xira. ¿Ja rga mbøxkʼꞹbi kʼo mama ne Biblia ngekʼua dya ri chu̱bi?

NE BIBLIA MAMA GA KJABA: “Ma ra sʼiyaji yo nin minteji, [...] dya ra jodʼꞹji ja rga pjøsʼꞹtsjɇji; ra jodʼꞹji ja rga pjøsʼꞹji yo nin minteji. Ma ra sʼiyaji yo nin minteji, dya ra ꞹngoji ma kjo pje ra tsjakꞹji ” (1 Corintios 13:4, 5). Ma kja gi musʼꞹ na tsʼilele, bʼꞹma ngextrjo kʼꞹ gi nee ri pjørꞹ. Pe ma ra jñanrrakʼo ni xira, ra zoʼo kʼꞹ dya kja gi sʼiyagekʼꞹ, ngekʼua xo ri juajnꞹ na nrrajme ke ri bʼꞹnkʼe ko ni xira, akjanu dya ra soʼo kʼꞹ bʼꞹntsjɇ. Ri pɇspʼi paciencia ni xira, xipji kʼꞹ me ki soge na joo ma pjøxkʼꞹ ri pjørꞹ in tsʼimbane, ri xipji me ti pøkjꞹ kʼꞹ ga mbøxkʼꞹ, ga kjanu ra unꞹ nguenda kʼꞹ me gi sʼiya.

“Nutsʼkʼeji in bʼɇzoji, ri minkʼeji na joo ko yo nin suji, ri respetaoji.” (1 Pedro 3:7.) Ma in suge ra musʼꞹ na tsʼimbane, dya ri jyombeñe kʼꞹ angeze pama pama ra mbørꞹ in tsʼimbane. Nudya ra mbɇsʼi na punkjꞹ bʼɇpji, ra bʼꞹbʼꞹ paa ma dya ra zoʼo na joo, ra mboo o kuee o ra søxꞹ o mꞹbʼꞹ. Bʼꞹma ra sⱥjⱥ nu paa ma ra mbɇkuɇ, ma pje ra xitsʼi dya pje ri chjꞹrꞹ, dya ri jyombeñe ke “texe yo bʼɇzo yo [trjꞹmbeñe] na joo, [...] ra mezhe kja ra ꞹdʼꞹ” (Santiago 1:19, NTD). Ri ñuu ja rgi pjøsʼꞹ ni suge (Proverbios 14:29).

TSJAGE KʼO MAMABA:

• Nutsʼkʼe tata: Ma nrrempa ñe ma xomꞹ ri pjøsʼꞹ in suge ra mbørꞹ in tsʼimbane. Zo ri pɇsʼi na punkjꞹ pje ri tsjaa, ri ñuu ja rgi tsjapꞹ ngekʼua ri søø ri pjøsʼꞹ ni male ri pjørꞹbi in tsʼimbane

• Nutsʼkʼe nana: Ma ni xira ra xitsʼi ra mbørꞹ ne tsʼimbane, ri jyɇspi. Ma dya ra tsjaa na joo, ri pjøsʼꞹ ñe ri xipji ja rga tsjaa, pe dya ri guɇnchʼi

NE BIBLIA MAMA GA KJABA: “Ra natrjo ntee nza ga yejebi” (Génesis 2:24). Zo a i sʼikjebi dʼa tsʼimbane, pe nutsʼkʼebi xi gi “natrjo ntee nza ga” yetsʼkui. Pama pama ri ñubi pje ri tsjabi ngekʼua ri mimibi na joo.

Nutsʼkʼe nrrinxu ma ra mbøxkʼꞹ ni xira ri unꞹ pøjø. Ma ri tsjagekʼo, ni xira na joo rga zoʼo ñe xi ra nee ra mbøxkʼꞹ (Proverbios 12:18). Nutsʼkʼe bʼɇzo, ri xipji ni suge kʼꞹ me ki sʼiyage, kʼꞹ me na joo kʼo kjaa ñe ri unꞹ pøjø kʼꞹ pjørꞹ in pjamilia (Proverbios 31:10, 28).

“Dya kjo ra jyodʼꞹtsjɇ kʼꞹ ra bʼꞹbʼꞹ na joo. Nu kʼꞹ ni jyodʼꞹ ngeje kʼꞹ ra mbøsʼꞹ kʼꞹ ra bʼꞹbʼꞹ na joo yo o dyoji.” (1 Corintios 10:24, NTD.) Pama pama ri ñuu ja rgi pjøsʼꞹ ni suge o ni xira. Ri xipji na joo kʼo kjaa ma ga mbøxkʼꞹ. Ri juajnꞹbi na nrrajme kʼꞹ ri ñabi, ri dyⱥrⱥ kʼo ra xitsʼi in suge o in xira. Ma ra bʼꞹbʼꞹ dʼa paa ke ni suu o ni xira dya ra nee ke ri dyobʼꞹbi, dya ri mbɇkuɇ. Ri unꞹ ni suu o ni xira yo ni jyodʼꞹ. Dya ri jyombeñe kʼo mama ne Biblia: “Nutsʼkʼeji in bʼɇzoji, dya ri tsⱥnbⱥji in kuerpoji yo in suji. Xo ñetsʼkʼeji in ndinxuji, dya xo ri tsⱥnbⱥji in kuerpoji yo nin xiraji. Ra søø ri potki tsⱥdⱥbi a kjanu, ngextjo ma ri ñatsjɇbi in nza yejui” (1 Corintios 7:3-5). Ma ri ñagebi, ri tsejmebi na joo pje ri tsjagebi. Ri pɇspʼi na punkjꞹ paciencia in suge o in xira, akjanu ri minkʼebi na joo.

TSJAGE KʼO MAMABA:

• Zo ra bʼꞹbʼꞹ na punkjꞹ pje ri tsjage, pe dya ri jyombeñe ri bʼꞹnkʼe ko ni suu o ni xira

• Søø ri chʼatrʼpʼꞹ dʼa tsʼiregalo ni suu o ni xira, ma iyo ri chʼatrʼpʼꞹ na tsʼixiskuama ri jñusʼꞹ kʼꞹ me ki sʼiyage ko texe in mꞹbʼꞹge

NE BIBLIA MAMA GA KJABA: “Xo i pa̱ra̱ge o jitsʼkʼeji o jñaa Mizhokjimi ndeze ma kja mi tsʼitʼige. Ngekʼua i pa̱ra̱ge ja ga kjaa e Cristo Jesús. Nukʼꞹ, ra sido ra jokꞹtsʼꞹ in mꞹbʼꞹ, nange i enchʼe in mꞹbʼꞹkʼꞹ” (2 Timoteo 3:15). Ri ñabi ni suge o ni xira ngekʼua ri ñubi pje ri jichibi in tsʼimbane. Dya ri jyombeñebi kʼꞹ in tsʼimbane ma oʼo amboo a mbeme o nana søø ra pjechi na punkjꞹ, ra dyⱥtkʼⱥbi ma ri zopjꞹbi, ra mba̱ra̱ kjo ngetsʼkʼebi, ra zoʼo na joo ma ra dyⱥrⱥ ke me ki mⱥjⱥbi. Ri xøtrpꞹbi in tsʼimbane, zo kja tsʼikʼe ra tendio, ma ra teʼe ra nee ra xørꞹ yo skuama.

Zo kja tsʼikʼe ri jichi o Jñaa e Mizhokjimi. Ri dyøtꞹ e Jehová ko in tsʼimbane (Deuteronomio 11:19). Ma ri eñebi ri xipji kʼꞹ e Mizhokjimi go dyⱥtrʼⱥ yo ri janrrgoji (Salmo 78:3, 4). Ma in tsʼimbane ra nokꞹ ra unꞹ nguenda i kjage kʼo mama e Jehová, angeze xo ra nee ra tsjaa kʼo i kjage.

TSJAGE KʼO MAMABA:

• Dyøtꞹ Mizhokjimi ra mbøxkʼꞹ ngekʼua ri chezhe na joo in chʼige

• Ri yepe yo ri jichi in tsʼimbane ngekʼua ra ngejme kja o pjeñe