Ma a ni paa ja nzi kjɇɇ kʼꞹ gui chjꞹntꞹge kja ra e̱kʼua yo paa ke ri chu̱bi. Kjogꞹ ga kjanu nangeje kʼe ntee kʼꞹ bi chjꞹntkui dya nge nzakjatsʼkʼe, kʼua ja gi nee ri minkʼe dya nge kʼo nee angeze, dya soʼo kʼua ja gi soge, dya kjijñi kʼua ja gi kjijñige. Xo ra bʼꞹbʼꞹ paa kʼꞹ ri pɇsʼibi nrrumꞹ ko in minte, bʼꞹma ra kjogꞹtsʼꞹbi kʼo na sʼoo kʼꞹ ra tsjakʼꞹbi ra søxꞹ in mꞹbʼꞹgebi.

Ne Biblia mama kʼꞹ ma ri pɇsʼibi nrrumꞹ kja in pjamilia ri jokꞹbi, dya ri jyɇstjogebi ga kjanu (Mateo 5:23, 24). Ma ri tsjagebi kʼo mama ne Biblia ri minkʼebi na joo.

NE BIBLIA MAMA KE: Bʼꞹbʼꞹ nrrajme ma ri søø ri ñage (Eclesiastés 3:1, 7). Ma pje go tsjakʼꞹge ni suge o ni xira ke dya gi soge na joo, dya ri jyɇzi ga kjanu, ri jyodʼꞹ nu nrrajme kʼꞹ ri ñagebi ri xipji ja gi soge, ri mamagebi “kʼo na kjuana” ja gi sogebi (Efesios 4:25). Zo ri soge me na sʼoo kʼꞹ go tsjakʼꞹ, dya ri mapjꞹ rgi ñage. Ne Biblia mama ke ma pje ra xitsʼi ri chjꞹrꞹge na joo ngekʼua dya ri chu̱gebi (Proverbios 15:4; 26:20).

Zo dya gi nee kʼo mama in suge o in xira, dya ri ꞹdʼꞹ, dya ri xipji kʼo na sʼoo, ri respetao ñe ri xipji ke me ki nege (Colosenses 4:6). Ma ri pɇsʼibi nrrumꞹ dya ri jyɇzi ra kjogꞹ yo paa, ri ñabi pje ri tsjagebi, pe dya ri jyɇzi ri zopjꞹ ni suu o ni xira (Efesios 4:26).

TSJAGE KʼO MAMABA:

• Ri ñagebi ma dya kja ri mbɇkuɇbi

• Ma ni suu o ni xira ra xitsʼi ja ga zoʼo, ri jyɇzi ra ñaa, ma ra nguarꞹ kja ri xipji ja gi soge

NE BIBLIA MAMA GA KJABA: “Ri potki sʼiyaji nangeje nde in kjuarmaji in texeji. Dya ri envidiaji yo nin kjuarmaji. Pero ri tsjijñiji kʼꞹ xe nda na joo nzi naja angezeji ke na ngetsʼkʼeji” (Romanos 12:10). Ri dyⱥrⱥ na joo kʼo xitsʼi ni suge o ni xira, “ri potki sentio[bi], y ri potki mⱥkje[bi], [...] dya ri tsjapꞹ na notsʼꞹ[bi]” (1 Pedro 3:8; Santiago 1:19). Ma ni suu o ni xira ra nee ra ñaa ko nutsʼkʼe ri tsjapꞹ nguenda. Nzakja ma gi pɇpjitrjo ri jyɇzi kʼo i kjage ri dyⱥrⱥ pje ra xitsʼi, ma jiyo ri dyønꞹ ma søø ra nrrepkʼe, ri ñabi ma ri kjuarꞹ. Ni suge o ni xirage dya ꞹnkʼꞹ, dya ri jyombeñe gui chjꞹntꞹ ko angeze, ngekʼua dya tsʼi rgi mbɇkuɇ ma pje ra xitsʼi (Eclesiastés 7:9).

TSJAGE KʼO MAMABA:

• Ma ra xitsʼi ja ga zoʼo ni suge o ni xira ri dyⱥrⱥ na joo kʼo mama zo dya gi nuu na joo kʼo na xitsʼi

• Ma ra ñaa in suge o in xirage, ri unꞹge nguenrra ja ga kjaa kʼo nee angeze ma ri jñanrrba na joo a jmii, ma ri jñanrra ja ga ñaa ñe ja ga tsjaa

NE BIBLIA MAMA KE: Kʼe ntee ke pɇpji ra ndo̱njo̱. Pero kʼe ntee kʼꞹ ñabi ko o dyojui mama pje ra tsjaa pe dya pɇpji, ra pobrekʼꞹ (Proverbios 14:23). Ngekʼua mꞹ gi ñage ko in suge o in xirage gi kejmebi pje ri tsjagebi, pɇski ri pɇpjibi na zɇzhi ngekʼua ri tsjagebi kʼo gui mangebi (Proverbios 10:4). Nza ga yetsʼebi ri pɇpjibi na zɇzhi, ga kjanu ndexe yo ri tsjagebi ra mbedye na joo (Eclesiastés 4:9).

TSJAGE KʼO MAMABA:

• Ri ñugebi pje nge kʼꞹ ri tsjagebi ngekʼua ri jokꞹbi in nrrumꞹ

• Ma ra kjogꞹ yo paa a ri ñugebi mꞹ go mbedye na joo kʼo gui tsjagebi