Yo ri testigojme e Jehová ri pɇsʼijme ngumꞹ ja ri jmurgojme, nunu ri xørgojme ne Biblia ngekʼua ra pa̱ra̱jme pje ra tsjaa o Reino Mizhokjimi kja ne Xoñijomꞹ, e Jesús o jichi yo ntee ja ga kjaa kʼe Reino (Lucas 8:1, TNM).

Kja yo ngumꞹ ja ri jmurgojme jitsʼkojme kʼo mama Mizhokjimi Jehová. Xo jitsʼkojmenu ja rga zopjꞹjme yo ntee o Jñaa e Mizhokjimi (Mateo 24:14). Kʼo ngumꞹkʼo dya nrra na nojo, pe jyⱥnji na joo. Bʼꞹbʼꞹ ngumꞹ ja jmurꞹji na punkjꞹ congregación. Yo kjɇɇ yo ri ka̱ra̱jidya, texe nu Xoñijomꞹ a jyⱥnji na punkjꞹ ngumꞹ ja ri jmurꞹjme (pama pama jⱥbʼⱥji tsichʼa ngumꞹ), nangeje na punkjꞹ ntee poji ja ri jmurgojme. ¿Ja mbedye nu merio kʼꞹ ri jⱥbʼⱥjme ngumꞹ nu ja ri jmurgojme? (Mateo 19:26, NTD.)

Yo ri testigojme e Jehová ri unꞹjme merio ngekʼua ra jyⱥbʼⱥji ngumꞹ nu ja ri jmurgojme. Yo merio ke jñutrʼꞹji kja yo tsʼicaja, penpeji kja yo sucursal yo testigo e Jehová. Angezeji pesʼpeji merio yo kjuarma kʼo nee ra jyⱥnji na ngumꞹ o nee ra jokꞹji na ngumꞹ ja jmurꞹji.

Na punkjꞹ kjuarma pjøsʼꞹji ra jyⱥnji yo ngumꞹ, dya cobraji merio. Kja na punkjꞹ país bʼꞹbʼꞹ Grupos de Construcción de Salones del Reino. Angezeji poji kja yo congregación kʼo me na je̱e̱ kja o país, pjøsʼꞹji o dyoji ra jyⱥnji yo ngumꞹ ja ra jmurꞹji, dya cobraji. Xo bʼꞹbʼꞹ país nu ja juajnꞹji kjuarma kʼꞹ pa̱ra̱ji ra tsjaji o bʼɇpji ngekʼua ra nuji ja nge nu ra jyⱥnji kʼo ngumꞹ ñe pje ma ngumꞹ ra jokꞹji, unꞹji janzi jñiñi nu ja ra tsjaji bʼɇpji. Bʼꞹbʼꞹ kjuarma kʼꞹ bʼɇxtrjo bʼꞹnjinu, pa̱ra̱ji ra tsjaji na bʼɇpji, angezeji pjøsʼꞹji yo kjuarma ra jyⱥbʼⱥji nu ngumꞹ nu ja ra jmurꞹji, pe nge yo kjuarma kʼo ra jmurꞹjinu kʼꞹ mazi ra pɇpjiji ra jyⱥbʼⱥji kʼe ngumꞹ. O espíritu e Jehová pjøsʼꞹ texe yo kjuarma ngekʼua ra tsjaji kʼe bʼɇpji (Salmo 127:1; Colosenses 3:23).

• ¿Pje ri kjagojme kja yo ngumꞹ ja ri jmurgojme?

• ¿Pje ri kjagojme ngekʼua ra jⱥbʼⱥjme yo ngumꞹ ja ri jmurgojme kja texe nu Xoñijomꞹ?