YO RA NUJI KʼO A GO CHJꞸNTꞸJI
3. Ri tʼekañomꞹbi
¿PJE NEE RA MAMAYO?
Yo ya chjꞹntꞹ ke potka tʼekañomꞹbi nee ra mba̱ra̱bi pje kʼꞹ kjijñi nu suu o nu xira, xo kjabi akjanu zø dya chjenjui ja ga kjijñibi. Ne skuama Diez claves para transformar tu matrimonio mama: “Yo kjaji akjanu dya mamaji ke dya ra pøtꞹji jaga kjijñiji, ¿Pje kjajima? Ñaji pje nge kʼo kjijñiji, ⱥrⱥji na joo pje kjijñi nu suu o nu xira, kjanu ra nuji pje søø ra tsjaji na joo ke ra mbøsʼꞹ nzayejui“.
NE BIBLIA JIZHI: “Ma ra sʼiyaji yo nin minteji [...] dya ra jodʼꞹji ja rga pjøsʼꞹtsjɇji, ra jodʼꞹji ja rga pjøsʼꞹji yo nin minteji” (1 Corintios 13:4, 5).
“Ke ri tʼekañomꞹ in suu ne ra mama ke me ri sʼiyagø, ngekʼua dya pje ri kjagø ke ra zøø na ꞹꞹ o mꞹbʼꞹ o ke ra tsjakꞹbʼe dya kja ra mⱥjⱥbʼe” (Micah).
¿PJENGA ME NA MUBIYO?
Ma yo ya chjꞹntꞹ dya tʼekañomꞹbi, ma ñabi me kjapꞹ ra søxi o mꞹbʼꞹ nu suu o nu xira, xo xipji pje nge kʼo dya na joo ga tsjaa o me trjembe.Manji yo nzhamba̱rꞹ ke ma yo ya chjꞹntꞹ ñaji akjanu, dya kja ra mezhe ra jyambꞹji.
“Ma na sʼoo gi zopjꞹ, xo ma gi trjembe ni suu ra tsjaa ke ra ndo̱gꞹ o mꞹbʼꞹ, akjanu dya kja ri potka ñagebi na joo” (Brian).
¿PJE SØØ RI TSJAA?
ÑUU JA GA NGETSʼKʼE
Pjøtpꞹ nguenda pje i kjage ñe ja gi zopjꞹge ni suu o ni xira. Tsjapꞹ nguenda janzi paa nge kʼua ri chjꞹrꞹ yo trʼønꞹ ke junsʼꞹba:
¿Ne ngodya pje gui xipji ni suu o ni xira ke dya bo zøø na joo ñe pje gui xipji ke o mⱥpⱥ o mꞹbʼꞹ?
¿Pje gui tsjaa ke ro ñetse ke gi tʼekañomꞹ angeze?
RI ÑAGEBIYO KO NI SUU O NI XIRA
¿Ja rga ñabi ñe pje ra kjabi ngekʼua ra ñetse ke ri potka tʼekañomꞹbi?
¿Pje ma jñaa ñe pje ri kjabi ke ñetse ke dya ri tʼekañomꞹbi?
NU KʼO SØØ RI TSJAA
Nzi natskʼebi ri dyopjꞹbi jñii kʼꞹ gi nee ke ra tsjaa ni suu o ni xira ngekʼua ra ñetse ke respetaotsʼꞹ. Kjanu ri jñandabi pje søø ri tsjagebi ngekʼua ri potka to̱jiagebi.
Dyopjꞹ kʼo na joo ga tsjaa ni suu o ni xira, kjanu ri xipji ke gi nuu na mubi kʼo kjaa.
“Kʼo ri kjagø ñetse ke ri tʼekañomꞹ in xiragø, ñe ke ri nugø na mubi angeze xo ri negø ke ra mⱥjⱥ. Zø tsʼiketrjo, ri jyodʼꞹ pje ri tsjaa ngekʼua ra ñetse ke gi tʼekañomꞹ ni xira o ni suu” (Megan).
Kʼo nrra ni mubi, dya nge ke ri mange gi tʼekañomꞹ ni suu o ni xira, kʼo me ni mubi nge ke angeze ra zøø ke gi tʼekañomꞹ.
NE BIBLIA JIZHI: “Ngekʼua xo ri juentseji yo nte. Ri tsjageji na jonte. Nutsʼkʼeji, dya ri tsjatsjɇgeji kʼꞹ me na notsʼꞹji. Tsjapꞹji kʼꞹ xenda na jonte kʼo dyaja ke na ngetsʼkʼeji. Dya ri nzhopkꞹji kʼꞹ kjakʼꞹji kʼꞹ na sʼoo yo nin minteji” (Colosenses 3:12).
