1. Vaira neganai bae vara ḡaudia be edeseniai baita dibadiamu?

NEGA ta redio ai nius o kamonai eiava TV ai o ita neganai ini do lalo toma, ‘Vaira neganai tanobadai be dahaka be varamu?’ Dika na e vara haraḡamu bona e vara kavamu dainai, taunimanima na asi dibadia vaira neganai be dahaka be varamu. (Iakobo 4:14) To, Iehova na mai dibana vaira neganai be dahaka bae vara. (Isaia 46:10) Idaunegai, Baibul ese iseda negai bae vara ḡau dikadia bona vaira neganai bae vara ḡau namodia na e perovetalai.

2, 3. Hahediba ese Iesu be edena henanadai e henia, bona Iesu ena haere be dahaka?

² Iesu Keriso ese Dirava ena Basileia e herevalaia, una Basileia ese kara dika baine haorea bona tanobada na paradaiso ai baine halaoa. (Luka 4:43) Taunimanima na e urava bae diba una Basileia be edena negai bainema. Iesu ena hahediba na e henanadai: “Hari ḡau be edena nega ai bae vara? Oi ba lou mai, bona tanobada dokona danu, toadia be dahaka?” (Mataio 24:3) Iesu ese e hamaorodia Iehova Dirava sibona mo mai dibana ina tanobada oromana be edena negai baine ore. (Mataio 24:36) To Basileia ese  maino korikorina bona noho namona do se havaradia neganai, Iesu ese tanobadai bae vara ḡaudia na e perovetalai. E perovetalai ḡaudia na hari e varamu!

³ “Tanobada dokona” ai ta nohomu ihamomokanina ḡaudia do asita herevalai neganai, taunimanima ese asie itaia tuarina ta aita herevalaia. Una tuari na gubai e vara, bona ita edai una na mai anina bada.

4, 5. (a) Iesu gubai e Pavapava neganai dahaka e vara? (b) Apokalupo 12:12 ena hereva heḡereḡerena, gubai e vara tuarina dainai dahaka e vara?

⁴ Ina buka ena karoa 8 ese e hahedinaraia Iesu na laḡani 1914 ai gubai e Pavapava. (Daniel 7:13, 14 ba duahi.) Una murinai ia na ḡau haida e kara. Baibul na e gwaumu: “Guba ai tuari e vara, Mikael [Iesu ladana ta] mai ena aneru ida ese huala [Satana Diabolo] e tuari henia. Huala mai ena aneru ida e tuari.” * Satana bona ena aneru dikadia, demoni, na e darere bena guba amo e tahodia dobi. Dirava ena kamonai anerudia na e moale, badina gubai Satana bona ena demoni na lasi. To, tanobada taudia na basie moalemu. Baibul na e gwaumu: “Tanobada . . . madi ihabaimui! Badina be diabolo vada e vasi, e badu dikadikamu; badina be ia dibana ena nega eme kwadogi.”​—Apokalupo 12:7, 9, 12.

⁵ Gubai e vara tuarina dainai e varamu ḡaudia mani aita lalodia. Satana na e badu dikadikamu dainai, hisihisi idauidau tanobadai e havaramu. Hari ita na una hisihisi neganai ta nohomu. To una na basine daudaumu​—‘nega kwadogina’ mo. Satana danu mai dibana. Baibul ese una nega na e gwauraia “dina gabedia.” (2 Timoteo 3:1) Ta moalemu badina Dirava ese kahirakahira Diabolo  ena siahu tanobada amo be kokiamu! Hari e varamu ḡaudia na Baibul ese e perovetalai, mani haida aita herevalai. Unu ese e hamomokanimu ita na dina gabediai ta nohomu, bona Dirava ena Basileia ese kahirakahira Iehova e lalokau heniamu taudia daidiai mia hanaihanai hahenamodia be havaramu. Ḡau ginigunana na, Iesu ese ta noholaiamu negana toadia hani e gwaurai aita lalodia.

6, 7. Edena dalai Iesu ena hereva tuari bona doe ai na hari e ḡuḡurumu?

⁶ “Bese ta bese ta ida bae heala-ala heheni, bona basileia ta basileia ta ida bae tuari.” (Mataio 24:7) Laḡani 100 gunadiai, taunimanima milioni momo na tuari ai e mase. Britain edia histori tore tauna ta na e gwa: “Histori lalonai laḡani 1901 ela 2000 lalodiai taunimanima momo e mase. . . . Unu laḡani lalodiai tuari na e hesiriuva, to tano haidai tuari na nega ta ta mo e varava.” Orea ta (Worldwatch Institute) na e gwa: “Laḡani 1901 ela 2000 tuaridia ai e mase taudia edia namba ese Iesu ena nega amo ela laḡani 1899 tuaridia ai e mase taudia edia namba na nega toi e hereaia.” Laḡani 1914 amo e vara tuaridia ai taunimanima 100 milioni mai kahana e mase. Taunimanima  milion momo na e hisihisi badina edia lalokau taudia na tuari ai e mase. Reana emu lalokau tauna ta danu tuari ai e mase.

⁷ ‘Gabu idau-idau ai doe bae vara.’ (Mataio 24:7) Hetahu ḡaukara e karamu taudia na e gwaumu, laḡani 30 gunadiai aniani na momo e vara. To, doe na doini e varamu badina taunimanima edia moni na dia heḡereḡere aniani bae hoi eiava asi edia tano aniani bae hado. Taunimanima milioni momo na hitolo dainai e masemu. Orea ta (World Health Organisation) na e gwaumu, laḡani ta ta lalodiai maraḡidia milioni ima mai kahana na asie aniani namonamomu dainai e masemu.

8, 9. Dahaka ese e hahedinaraiamu Iesu ena peroveta herevana tano laga bona dai-hanai goreredia ai na e ḡuḡuru?

⁸ “Gabu idau-idau ai tano baine laga.” (Luka 21:11) Orea ta (U.S. Geological Survey) ese e hahedinaraiamu, laḡani ta ta ai tano laga badadia 19 heḡereḡerena bae vara diba. Idia ese ruma badadia bae hadika bona tano bae hapararadia diba. Laḡani ta ta ai ruma badadia bae hadikadia diba tano lagadia na de vara. Ripoti haida ese e hahedinaraimu, laḡani 1900 amo tano laga dainai taunimanima 2 milioni mai kahana e mase. Buka ta na e gwaumu: “Teknoloji e hanamodiamu  karana ese tano laga ai e mase taudia edia namba taina mo e hamaraḡia.”

⁹ “Dai-hanai goreredia bae vara.” (Luka 21:11) Ena be medikol daladia na e hanamomu, to gorere gunadia bona matamatadia ese taunimanima na e hahisidiamu. Ripoti ta na e gwaumu, laḡani 20 eiava 30 gunadiai, momo mai dibadia goreredia 20, heḡereḡere TB, malaria, bona kolera na e vara momo, bona gorere ma haida na muramura ese basie hanamodia diba. Gorere matamatadia 30 heḡereḡerena ma e hedinarai. Idia haida na asi ihanamodia bona momo e hamasedia.

10. Timoteo Iharuana 3:1-5 ese ina nega taudia edia kara be ede e herevalaia toma?

¹⁰ Baibul ese tanobadai bae vara kara badadia na e hahedinarai, bona e peroveta dina gabediai taunimanima edia kara na bae idau. Aposetolo Paulo ese taunimanima edia kara na e herevalai. E gwa: “Dina gabedia ai nega dikadia do bae vara.” (2 Timoteo 3:1-5 ba duahi.) Paulo na ma e gwa taunimanima na

• sibodia bae heura heni

• moni bae mataḡaniḡani heni

• tamadia sinadia bae gwau-edeede henidia

•   basie helaḡa

• lalokau basie diba

• bae lebulebu

• bae daḡedaḡe

• lebulebu karadia bae ura heni bada, Dirava bae ura henia maraḡi

• Dirava ibadinana na koukouna mo bae abia, a anina bae dadaraia

11. Salamo 92:7 ese kara dika taudia ediai be varamu karana be ede e herevalaia toma?

¹¹ Emu gabu ai taunimanima edia kara be unu bamona, eiava? Oibe. Gabu iboudiai taunimanima na mai edia kara dikadia. Una ese e hahedinaraiamu Dirava na kahirakahira kara ta be karaiamu, badina Baibul na e gwaumu: “Ena be kara dika taudia na bae vara rei na heto, ena be kara havara taudia na bae tubu, to bae bua tari hanaihanai.”​—Salamo 92:7.

12, 13. Edena dalai “dokona negana” ai “hereva momokani” na baine bada?

¹² Momokani Baibul ena hereva heḡereḡerena, dina gabediai dika idauidau bae vara. Ina kara havara tanobadanai, Iehova e tomadiho heniamu taudia ediai ḡau namodia momo e varamu.

 ¹³ Baibul bukana Daniel na eto, “lalo-parara [“hereva momokani,” NWT] bae habadaia.” Una be edena negai baine vara? “Dokona negana” lalonai. (Daniel 12:4) Laḡani 1914 amo, Iehova ese mai edia ura ida ia e hesiai heniamu taudia na e durudia edia laloparara Baibul ai bae habadaia. Idia ese ini hereva momokanidia: Dirava ladana bona ena ura, Iesu Keriso ena mauri idavalaina boubouna, mase taudia ediai e varamu karana, bona toreisi lou e lalopararalaidia ḡoevaḡoeva. Iehova e tomadiho heniamu taudia ese mauri dalana namona e dibaiamu bona e badinaiamu dainai Dirava e hanamoamu. Idia ese Dirava ena Basileia ena ḡaukara bona tanobadai hekwakwanai baine haore daladia e lalopararalaidia ḡoevaḡoeva. Una diba be ede e ḡaukaralaia tomamu? Una henanadai ese dina gabediai e ḡuḡurumu peroveta herevana ma ta e hahedinaraiamu.

14. Hari, Basileia sivaraina namona iharorolaina ḡaukarana ena bada be ede bamona, bona daidia ese e harorolaiamu?

¹⁴ “Basileia sivaraina namona na tanobada idoinai bae harorolaia,” una hereva na Iesu Keriso ese “tanobada dokona” e perovetalaia neganai e gwauraia. (Mataio 24:3, 14 ba duahi.) Tanobada heḡeḡemadai, Basileia sivaraina namona​—Basileia anina, baine kara ḡaudia, bona ena hahenamo baita abi dalana​—na tano 230 mai kahana bona gado handred momo ai e harorolaiamu. Iehova ena Witnes taudia milioni momo ese Basileia sivaraina namona na e harorolaia goadagoadamu. Idia na “bese idau-idau bona iduhu idau-idau bona hanua idau-idau bona gado idau-idau” taudia. (Apokalupo 7:9) Witnes taudia na Baibul ena hereva e uramu bae dibaia taudia milioni momo ida Baibul stadi asi davadia e karamu. Ta hoamu badina una peroveta herevana na e ḡuḡurumu, danu Iesu na e gwa Kristen taudia korikoridia na ‘bae inai henidia’!​—Luka 21:17.

15. (a) O abia daemu ita be dina gabediai ta nohomu eiava, bona dahaka dainai? (b) “Dokona” be kaumu neganai Iehova e inai heniamu taudia bona Iena Basileia ena lohia dalana e badinaiamu taudia ediai dahaka be varamu?

¹⁵ Hari Baibul ena peroveta herevadia momo na e ḡuḡurumu dainai, o abia daemu ita be dina gabediai ta nohomu, eiava? Sivarai namona na bae harorolaia ela bona Iehova ena ura baine heḡereḡere, bena “dokona” baine kau. (Mataio 24:14) “Dokona” anina na Dirava ese tanobada amo kara dikadia iboudiai baine kokidia negana. Iehova ese Iesu bona aneru baine ḡaukaralaidia, mai edia ura ida Ia e dadaraiamu taudia baine haoredia. (2 Tesalonika 1:6-9) Satana bona ena demoni ese tanobada taudia na ma basie hakaudia kereremu. Una murinai, Dirava ena Basileia ese hahenamo na iena kara maoromaoro lohia dalana e badinaiamu taudia baine henidia.​—Apokalupo 20:1-3; 21:3-5.

16. Aonega karana be dahaka ba kara?

¹⁶ Satana ena nega oromana na kahirakahira be oremu dainai, namona na siboda baita henanadai, ‘Lau be dahaka baina kara na namo?’ Aonega karana na hanaihanai Iehova bona iena ura baita dibaia. (Ioane 17:3) Baibul ba stadilaia namonamo. Bona hanaihanai Iehova ena ura e tahuamu taudia ba bamodia. (Heberu 10:24, 25 ba duahi.) Baibul istadilaina karana amo Iehova Dirava ba dibaia, bona emu mauri ba haidaua unu amo Dirava ena lalonamo bavabia.​—Iakobo 4:8.

17. Dahaka dainai taunimanima momo na kara dika taudia ihaoredia negana ai be hoamu?

¹⁷ Iesu na e gwa, taunimanima momo na basie laloamu ita na dina gabediai ta nohomu. Kara dika taudia ihaoredia negana na basita laloamu neganai be mai haraḡamu. Taunimanima momo na be hahoadiamu, henaohenao tauna hanuaboi ai e maimu na heto. (1 Tesalonika 5:2 ba duahia.) Iesu na e gwa: “Noa negana na heto, Taunimanima  Natuna ena mai negana ai unu baine heto. Badina be una negana ai utu-utu badana do se utua dae, idia na e anianiva, e inuinuva, e headavava, ema bona Noa lagatoi ai e gui kau dinana; matadia asie kani ema bona utu-utu badana e utua dae, bena iboudiai eha dono mamase. Taunimanima Natuna ena mai danu unu baine heto.”​—Mataio 24:37-39.

18. Edena hereva, Iesu ese e gwauraia na baita laloa bada?

¹⁸ Iesu ese kamonai taudia e hamaorodia: “Nahuamui ba toho, aniani momo bona kekero muramuradia bona tanobada ena lalo-haguhi ḡaudia ese lalomui bae hametaudia na garina; bena una dina ese baine hahoamui, idoa na heto. Badina be una dina na tanobada inoholaina taudia iboudiai ediai baine kau. Taunabunai, ba gima, nega idoinai ba ḡuriḡuri, bena unu dika amo ba roho mauri, Taunimanima Natuna vairanai do ba gini.” (Luka 21:34-36) Iesu ena hereva baita lalodia bada na aonega karana. Dahaka dainai? Badina Iehova Dirava bona “Taunimanima Natuna,” Iesu Keriso, ese bae lalonamo henidia taudia na Satana ena nega oromana dokona amo bae roho mauri bona baine vara nega oromana matamatanai bae mauri hanaihanai!​—Ioane 3:16; 2 Petro 3:13.