“Painia” taudia na ḡaukara o ḡau ta e hamatamaiamu taudia. Iesu na painia ta na heto, badina tanobada ema, hahemauri ḡaukarana eme hamatamaia bona dala eme kehoa taunimanima bae mauri totona. (Mataio 20:28) Ina negai, iena hahediba taudia na ia e tohotohoamu, edia nega bada e henimu taunimanima e durudiamu “hahediba” ai baela totona. (Mataio 28:19, 20) Idia haida na painia ḡaukara e karaiamu.

Painia taudia edia nega bada na e haroromu. Iehova ena Witnes taudia iboudiai na sivarai namona e harorolaiamu taudia. To, haida na edia noho daladia e haidaumu bena regula painia ḡaukara e karamu, anina na hua ta ta iboudiai hora 70 lalodiai e haroromu. Idia momo na pat-taim moni ḡaukara e karamu. Spesol painia ḡaukara e karamu taudia na hua ta ta iboudiai hora 130 lalodiai e haroromu, idia na e abidia hidimu bena Basileia iharorolaina taudia dia momo gabudia e siaidia laomu. Painia taudia na ḡau momo asie tahumu, badina e dibamu Iehova ese edia dabu ḡaudia na baine henidia. (Mataio 6:31-33; 1 Timoteo 6:6-8) A haida na heduru painia ḡaukara e karamu, anina na hua ta lalonai hora 30 eiava hora 50 lalodiai bae haroro diba.

Painia taudia na Dirava bona taunimanima e lalokau henidiamu. Iesu bamona, ai danu a itaiamu momo na e ura dikadikamu Dirava bae dibaia. (Mareko 6:34) To Baibel ena diba namona ese ina negai baine durudia vaira negana ai bae vara ḡau namodia bae lalodia totona. Painia taudia na dekedia taudia e lalokau henidiamu dainai, edia nega bona goada e henimu taunimanima e hadibadiamu. (Mataio 22:39; 1 Tesalonika 2:8) Una ese painia taudia edia abidadama e hagoadaiamu, Dirava e hakahikahiamu, bona e moalemu.—Kara 20:35.

• Painia taudia edia ḡaukara be dahaka?

• Dahaka dainai haida na painia ḡaukara e karaiamu?