“Unu Witnes taudia na dia taunimanima mo e kara namo henidiava, to egu sisia danu e kara namo henidiava. Dina ta, Elaine, haroro troli na badinai e giniva hahinena, ese egu sisia ruaosi biskedi e henidia. Una murinai, egu sisia na hanaihanai una ‘biskedi heni gabuna’ e taku laova.

“Hua momo e ore neganai, egu sisia ese edia biskedi e moalelaiva, bona lau ese Witnes taudia ihereva henidia karana na moalelaiava. To asina ura baina hakahikahidia. Lau laḡanigu na 70 de hahanaia, bona asi dibagu Witnes taudia be dahaka e abi daeva. Protestant dubuna edia hahediba herevadia na asina moalelaiva dainai, na lalo sibogu ese Baibul baina stadilaia na namo.

“Una neganai danu, taoni ena kaha haida ai Witnes taudia ma haida na itadia, edia haroro troli badidiai gigini. Idia danu toadia na nanamo heherea. Nega iboudiai egu henanadai na Baibul amo e haerelaiva, una dainai egu abidadama ediai na e bada.

“Dina ta, Elaine ese e nanadaigu, ‘O laloamu animal be Dirava ena harihari ḡaudia, a?’ Na haero nato, ‘Oibe, idia na Dirava ena harihari ḡaudia!’ Bena Elaine ese Isaia 11:6-9 e duahia. Una ese kudougu na e veria, ena be do asina urava buka o magasin baina abi dae.

“Una dina murina dinadia ai, Elaine bona adavana, Brent ida nega kwadoḡi lalonai Baibul a herevalaiva. Idia ese e noigu Mataio ela Aposetolo Edia Kara bukadia baina duahi, unu amo Keriso baina tohotohoa daladia baina diba totona. Una dainai unu na kara toma. Se daudau, Brent bona Elaine ida Baibul stadi a hamatamaia. Una na laḡani 2016 hua padana kahana ai.

“Nega iboudiai na ura dikadikava pura ta ta ai Baibul baia stadilaia bona Kingdom Hall ai baina hebou. Na moalemu bona na mamiamu Baibul ena hereva momokanidia na dibamu karana na hahenamo badana. Laḡani ta mai kahana murinai, bapatiso Witnes tauna ta ai nala. Hari laḡanigu na da 79, bona na dibamu lau na dala maorona ai na rakamu. Iehova ese e hanamogu badina hari lau na ena gwauhamata ruma bese tauna ta ai e halaogu.”