APOSETOLO EDIA NEGAI Kristen taudia na e ḡaukara goadava taunimanima iboudiai ediai “Basileia sivaraina namona” bae harorolaia. (Mat. 24:14) Haida na idau tanodia e laova. Heḡereḡere, aposetolo Paulo na tano ta ela, hari una tano na e gwauraiamu Turkey, bona ena misinari laolaona ai ia na unuseniai e haroro momova. * Laḡani 2,000 muridiai, laḡani 2014 ai, Turkey ai haroro ḡaukara badana ta ma e karaia. Dahaka dainai una ḡaukara badana e karaia? Daidia be una ḡaukara ai e heduru?

Turkey ai, pablisa iboudiai na 2,800 mai kahana, to una tano ena popiuleisen na 79 milion. Anina na Turkey ai pablisa tamona ese taunimanima 28,000 baine durudia. To mani a laloa, una tano ai pablisa na taunimanima haida mo e haroro henidiava. Una dainai haroro ḡaukara badana e karaia badina e urava taunimanima momo bae haroro henidia. Turkish-gado e herevalaiamu tadikaka bona taihu 550 heḡereḡerena na idau tanodia amo ela Turkey bona unuseniai e nohomu pablisadia ida una haroro ḡaukara badana e karaia. Dahaka namo e vara?

Momo e haroro henidia. Istanbul ai kongrigeisen ta na ini e gwau toma: “Taunimanima na ai e itamai neganai, e henanadai: ‘Iniseniai be hebou badana ta be heabimu, a? Iehova ena Witnes taudia na gabu iboudiai a itadiamu!’” Izmir siti ai kongrigeisen ta na e gwa: “Teksi draiva ta na elda tadikaka ta dekena ela bena e henanadai, ‘Dahaka e varamu? Emui ḡaukara ma o habadaiamu, a?’” Oibe, momo ese una haroro ḡaukara badana na e itaia.

Idau tano amo ela tadikaka bona taihu ese una haroro ḡaukarana na e moalelaia. Denmark amo ela tadikakana, Steffen, na e gwa: “Dina ta ta ai, na haroro henidiava taudia momo ese Iehova sivaraina na nega ta do asie kamonai. Na mamia momokani lau na Iehova ladana na harorolaiava.” France amo ela tadikakana, Jean-David, na e gwa: “Ai na hora momo lalodiai strit tamona ai mo a harorova. Una na mai moalena! Momo na Iehova ena Witnes taudia na asi dibadia. Kahirakahira ruma iboudiai taunimanima a hereva henidiava, eda vidio ta a hahedinaraiava, bona pablikeisen ta a heniva.”

 Tadikaka bona taihu 550 na wiki rua lalodiai pablikeisen iboudiai 60,000 e hariharilai! Oibe, una haroro ḡaukara badana ai taunimanima momo e hereva henidia.

Edia haroro ḡaukara urana e habadaia. Turkey ai una haroro ḡaukara badana ese tadikaka taihu e hagoadadia. Momo na ful-taim hesiai ḡaukara e lalohadailaia matama. Una haroro ḡaukara badana murinai, Turkey ai hua 12 lalonai regula painia edia namba na 24 pesen amo e dae.

Idau tanodia amo ela tadikaka taihu na edia tano e lou lao neganai, una haroro ḡaukara badana ese e durudia dalana na e herevalaiava. Germany taihuna ta, Şirin na e gwa: “Turkey ai tadikaka taihu na mai moaledia ida dala idauidau ai e harorova. Lau na dala idauidau ai haroro ḡaukara ikarana na na hemaraiva. To na moale badina una haroro ḡaukara badana, Turkey ai e nohomu tadikaka taihu edia haheitalai, bona ḡuriḡuri loulou karana ese e durugu egu haroro ḡaukara baina habadaia. Danu trein abi gabudiai na harorova bona pepapepa momo na hariharilaiva! Hari lau na asina hemaraimu.”

Germany tadikakana ta, Johannes na e gwa: “Egu haroro ai baina ḡaukaralai daladia haida na diba. Turkey tadikakadia na e ura dikadikava taunimanima momo ediai hereva momokani bae herevalaia, una dainai dala e hekehova negadiai e harorova. Germany na lou lao neganai lau na unu na kara toma. Bona hari taunimanima momo na haroro henidiamu, dia guna heḡereḡerena.”

France taihuna ta, Zeynep na e gwa: “Ina haroro ḡaukara badana ese egu haroro na e durua bada. E durugu basina gari bona Iehova baina abidadama henia.”

Pablisa edia hebamo heheni karana na e hagoadaia. Tano idauidau amo ela tadikaka taihu bogaraḡidiai lalokau bona lalotamona karana na asie laloaboio. Matamanai ta herevalaia tadikakana, Jean-David na e gwa, “Tadikaka edia heabi dae karana na a ‘mamia’ momokani.” Ma eto: “Idia ese ai na turadia bona edia ruma bese heḡereḡerena e abimai dae. Edia ruma ai danu a noho. Na dibamu tanobada heḡeḡemadai ita na tadikaka oreana, bona nega momo eda pablikeisen ai una na duahiamu.  To hari, lau sibogu ese una na mamiamu. Na moale dikadikamu badina lau na Iehova ena hesiai tauna ta, bona ina hahenamo hereadaena dainai Ia na tenkiu heniamu.”

France taihuna ta, Claire na eto: “Ena be ai na Denmark, France, Germany, bona Turkey amo, to iboumai ai na ruma bese tamona. Una na vaitani Dirava ese tano hetoadia na e kokidia.”

France taihuna ta, Stéphanie danu e gwa: “Una haroro ḡaukara badana amo a diba, ita na dia kastom eiava gado ese e hatamonadamu to Iehova ilalokau henina karana ese e hatamonadamu.”

Idau tano tadikaka taihu momo na e lalomu Turkey baela badina ḡaukara bada na doini mia dainai heduru bae heni. Idia haida na vada ela. Unu tadikaka taihu na pablisa dia momo gabudia e laomu dainai ta moalemu.

Heḡereḡere, gabu ta ai grup maraḡina ta lalonai pablisa iboudiai na 25. Laḡani momo lalodiai, elda tamona mo una grup e nariava. To laḡani 2015 ai, Germany bona Netherlands amo tadikaka taihu 6 na ela una grup bae durua neganai, pablisa na e moale dikadika!

Turkey ela tadikaka taihu ese edia noho dalana be ede e herevalaia toma? Vaia, nega haida hekwakwanai na e varava, to pablisa dia momo gabudia ela na hahenamo badana. Mani idia haida edia hereva aita lalo:

Federico, laḡanina na 40 heḡereḡerena bona ia na headava tadikakana ta Spain amo. E gwa: “Egu kohu na dia momo dainai, lau na mai egu nega ḡau mai anidia baina kara totona.” Ia ese haroro ḡaukarana e moalelaia, a? Ia na e gwa: “Oibe! Bema oi na tano ta bo laomu badina o uramu haida ba durudia Iehova bae dibaia, oi na Ienai o tabekaumu. Iehova ena henari karana na bo mamia momokanimu.”

Rudy, laḡanina na 50 heḡereḡerena bona ia na headava tadikakana ta Netherlands amo. E gwa: “Pablisa dia momo gabudia ala bona guna hereva momokani do asie diba taudia momo ediai  hereva momokani a hadibadiava na mai moalena. Mai moaledia ida hereva momokani e abia daeva neganai, una ese lau na e hamoalegu bada.”

Sascha, laḡanina na 40 heḡereḡerena bona ia na headava tadikakana ta Germany amo. E gwa: “Haroro ḡaukara na laova negadia ai, na hedavari henidiava taudia momo na edia nega ginigunana hereva momokani e kamonai. Iehova bae dibaia totona na durudiava neganai lau na e hamoalegu bada.”

Atsuko, laḡanina na 30 heḡereḡerena bona ia na headava taihuna ta Japan amo. Ia na e gwa: “Guna, lau na hanaihanai na urava Aramagedono na bema mai haraḡa. To Turkey nala murinai, Iehova na tenkiu henia badina Ia ese haheauka karana e hahedinaraia. Iehova ese tanobada heḡeḡemadai haroro ḡaukarana e hakauamu dalana na itaiamu neganai, una ese egu hetura karana Ia ida e hagoadaiamu.”

Russia taihuna ta, Alisa, laḡanina na 30 heḡereḡerena, na e gwa: “Haroro ḡaukara inihetomana amo Iehova ihesiai henina karana ese lau na e durugu ena kara namodia na diba.” (Sal. 34:8) Ia na ma eto: “Iehova na lau Tamagu bona Turagu namona, mauri daladia idauidau lalodiai ia na dibaia namonamo. Egu mauri na na moalelaia, ekspiriens momo na davari, bona hahenamo momo danu!”

Turkey ai haroro ḡaukara badana amo sivarai namona na taunimanima momo ediai e harorolaia. To, teritori momo herea na do asie karadia. Haroro totona Turkey ela tadikaka taihu ese dina ta ta ai e davaridiava taudia na nega ta Iehova sivaraina na do asie kamonai. O uramu teritori unu bamodia ai ba haroro, a? Bema oibe, a hagoadamumu: “A gaga isi, uma ba ita, anidia vada e lo, iutuna negana heḡereḡerena.” (Ioa. 4:35) Uma anina “vada e lo” tanodia ai haroro ḡaukara ba durua diba, a? Bema oibe, hari na nega namona kara haida ba kara una ḡaukara ba durua totona. Namona na ina ba diba: “Tanobada heḡeḡe-madai” sivarai namona iharorolaina ḡaukarana bo habadaiamu neganai hahenamo momo bo abimu!​—Kara 1:8.