1-2. Sadok be daika? (1 Sisiga 12:​22, 26-28)

 MANI ina a laloa. Tatau iboudiai 340,000 mai kahana na e hebou David na Israel ena king ai bae halaoa. Dina toi lalodiai, unu tatau na Heberon ena ororo kahadia ai e noho bona mai moaledia ida e herevaherevava bona Iehova ihanamona anedia e abiva. (1 Sis. 12:39) Eregabe merona ta ladana Sadok danu idia bogaraḡidiai, to momo ese ia na se laloa bada. To, Iehova ese be e itaia, bona e uramu baita diba Sadok danu idia ida. (1 Sisiga 12:​22, 26-28 ba duahidia.) Sadok be daika?

² Sadok na hahelaḡa tauna ta, bona Hahelaḡa Tauna Badana Abiatara ida e ḡaukara hebouva. Dirava ese Sadok na aonega bada e henia Iena ura baine lalopararalaia totona. (2 Sam. 15:27) Taunimanima na heduru sisibadia e urava negadiai Sadok dekena e laova. Ia na boga-auka tauna. Ina atikol ai baita itaiamu edena dala ai Sadok ese boga-auka karana e hahedinaraia.

3. (a) Dahaka dainai Iehova e tomadiho heniamu taudia na bae boga-auka? (b) Ina atikol ai dahaka baita herevalaiamu?

³ Ini dina gabedia lalodiai, Satana ese ena daḡedaḡe karadia Dirava ena taunimanima ediai na e habadaiamu. (1 Pet. 5:8) To namona na baita boga-auka bona mai haheaukada ida Iehova baita naria ela bona ia ese Satana bona ena nega oromana dikana baine haoredia. (Sal. 31:24) Mani Sadok ese boga-auka karana e hahedinaraia daladia toi aita herevalai.

DIRAVA ENA GAVAMANI BAITA DURUA

4. Iehova ena taunimanima ese iena Gavamani bae durua totona, dahaka dainai bae boga-auka na namo? (Laulau danu ba itaia.)

⁴ Ita na Iehova ena taunimanima dainai, mai kudouda idoinai ida iena Gavamani ta duruamu, to unu baita kara toma totona  namo na baita boga-auka. (Mat. 6:33) Heḡereḡere, ina tanobada dikana ai, Iehova ena taravatu baita badina bona iena Gavamani sivaraina namona baita harorolaia totona, baita boga-auka na namo. (1 Tes. 2:2) Danu politikol karadia ai heiriheiri na bada herea, to mai eda boga-auka ida baita gini siri na mai anina bada. (Ioa. 18:36) Iehova ena taunimanima momo na moni ena hekwakwanai e davarimu, bona politikol o tuari lalodiai asie vareaimu dainai, e dadabadiamu eiava dibura ai e atodiamu.

5. Sadok ese David baine durua totona, dahaka dainai baine boga-auka?

⁵ Sadok ela Heberon na dia David king ai ela karana mo baine moalelaia. To ia na mai tuari kohuna ida ela unu amo ia na e heḡaeḡae baine tuari. (1 Sis. 12:38) Ia na mai ena ura ida David e bamoa, unu amo Israel taudia na inaidia amo bae gimadia. Sadok na tuari daladia na asi dibana, bona ia na dia tuari tauna. To baita gwa diba ia na boga-auka tauna.

6. Edena dala ai David ena boga-auka karana ese Sadok e durua? (Salamo 138:3)

⁶ Hahelaḡa tauna Sadok ese boga-auka karana be daika ena amo e dibaia? Ia na tatau goadadia bona boga-auka taudia momo mai dibana. Oibe, edia haheitalai ese ia na e durua bada. Heḡereḡere, David ese boga-auka karana e hahedinaraia dalana na, ia ese ‘Israel e hakaua lasiva bona e hakaua vareaiva,’ una dainai Israel taudia na mai lalodia idoinai ida ia e durua. (1 Sis. 11:​1, 2) David na nega iboudiai Iehova enai e tabekauva. (Sal. 28:7; Salamo 138:3 ba duahia.) Danu Sadok na tatau ma haida edia haheitalai ese e durua, heḡereḡere Iehoiada, Benaia bona iduhu lohiadia 22, idia na tatau goadadia bona iboudiai David ena kaha ai e gini. (1 Sis. 11:​22-25; 12:​26-28) Ini tatau iboudiai na lalodia e hadai David na edia king ai bae halaoa bona bae gimaia.

7. (a) Iseda negai boga-auka karana e hahedinaraia taudia amo dahaka ta dibamu? (b) Vidio ai tadikaka Nsilu ena haheitalai amo dahaka o dibamu?

 ⁷ Iehova ena lohia dalana e badinaiamu taudia edia haheitalai baita haerodiamu neganai, una ese be durudamu baita boga-auka totona. Eda King, Keriso Iesu, guna tanobada ai e nohova neganai, Satana ena politikol karadia lalodiai na se vareai. (Mat. 4:​8-11; Ioa. 6:​14, 15) Ia na hanaihanai Iehova ena heduru ai e tabekauva. Hari iseda nega ai danu, eregabe memero momo na mai lalogoadadia ida tuari eiava politikol karadia amo e gini sirimu. A hagoadamuimu edia ekspiriens na jw.org ai ba duahi. a

TADIKAKAMUI BA DURUDIA

8. Elda taudia ese tadikaka taihu bae durudia totona dahaka dainai bae boga-auka na namo?

⁸ Iehova ena taunimanima na e ura dikadikamu bae heduru heheni. (2 Kor. 8:4) To nega haida, unu bae kara toma totona bae boga-auka na namo. Heḡereḡere tuari e varamu negadiai, elda taudia ese dala bae kara edia tadikaka taihu ese Baibul bona pablikeisin bae abi, bona edia dabu ḡaudia danu ba henidia. Elda taudia ese tadikaka taihu e lalokau henidiamu dainai, dala idauidau ai e durudiamu, ena be edia mauri bae haboio diba. (Ioa. 15:​12, 13) Unu e kara tomamu neganai, idia ese Sadok ena boga-auka karana e tohotohoamu.

9. Samuel Iharuana 15:​27-29 heḡereḡerena, David ese Sadok be e hamaoroa dahaka baine kara? (Laulau danu ba itaia.)

⁹ Mani Sadok ese nega dikadia ai tadikakana e durudia daladia aita lalo. Heḡereḡere, David natuna Absalom na e urava tamana baine alaia unu amo king ai bainela. (2 Sam. 15:​12, 13) David na kara haraḡa Ierusalem e rakatania! Ia ese ena hesiai taudia e hamaorodia eto: “O tore tore isi, aita heau; eiava Absalom imana amo basita roho mauri diba!” (2 Sam. 15:14) Ena hesiai taudia na gabu e rakataniava lalonai,  David na e laloparara namona na Ierusalem ai haida bae noho, unu amo Absalom ese e palanilai ḡaudia na David bae hadibaia. Una dainai David ese Sadok bona hahelaḡa taudia haida e siaidia hanua e lou lao, unu amo spai taudia ai baela. (2 Samuel 15:​27-29 ba duahidia.) To namona na bae henahua toho. David ese unu hahelaḡa taudia e hamaorodia bae karaia karana na auka, badina edia mauri na bae haboioa diba. Absalom na hekokoroku, daḡedaḡe, bona koikoi tauna. Mani a laloa, bema Absalom bema diba Sadok bona hahelaḡa taudia ma haida na David igimana totona ia e spaiava, idia be ede bema tomadia?

10. Edena dala ai Sadok mai bamona ida ese David e gimaia?

¹⁰ David ese Sadok bona Husai, David turana namona ta, e noidia ia bae durua plen ta bae karaia. (2 Sam. 15:​32-37) Una plen na ini bamona: Husai na baine koikoi ia na Absalom ena kaha ai, bona hahekau herevadia baine henia ede bamona David baine tuari henia. Unu amo David na nega baine henia, baine heḡaeḡae. Absalom na Husai ena sisiba e abi daeva neganai, e varava ḡaudia na Husai ese Sadok bona Abiatara e hadibadiava. (2 Sam. 17:​8-16) Unu tatau raruosi ese Absalom ena palani na David e hadibaiava. (2 Sam. 17:17) Iehova ena heduru amo, Sadok bona unu hahelaḡa taudia ese David e gimaia.—2 Sam. 17:​21, 22.

11. Tadikakada ta durudiamu neganai, edena dala ai Sadok ena boga-auka karana baita tohotohoa?

¹¹ Bema dika negadia ai tadikakada idurudia totona, edena dala ai Sadok ena boga-auka karana baita tohotohoa? (1) Hahekau herevadia baita badina. Nega unu bamodia ai, kamonai karana na mai anina bada, unu amo lalotamona baine vara. Emui brens ofis amo e maimu hahekau herevadia ba badina. (Heb. 13:17) Elda taudia ese disasta do se vara ai bona disasta negadia ai bae kara ḡaudia bona orea ese e henimu hahekau herevadia na bae riviulai loulou. (1 Kor. 14:​33, 40) (2) Ba boga-auka to ba aonega. (Her. 22:3)  Ba lalo namonamo guna gabeai kara ta ba karaia. Oi bona ma haida emui seifti ba laloa. (3) Iehova enai ba tabekau. Ba helalotao, Iehova ese oi bona tadikaka taihu emui namo na e laloa badamu. Ia ese be durumumu dala maorona ai tadikakamu ba durudia.

12-13. Viktor bona Vitalii edia ekspiriens amo dahaka ta dibamu? (Laulau danu ba itaia.)

¹² Mani Viktor bona Vitalii edia sivarai aita laloa, Ukraine ai ini tadikaka raruosi ese aniani bona ranu na edia tadikaka taihu dekedia e laohaiva. Viktor na e gwa: “Ai na gabu iboudiai aniani a tahuva. Nega momo ipidi reḡedia a kamonaiva. Tadikaka ta na ena stoa amo aniani haida e heni, unu aniani ese pablisa momo e durudia. Motuka ai aniani a udadiava lalonai, bomu ta e moru, ai a gini gabuna amo na 20 mita heḡereḡerena. Una dina ibounai lalonai Iehova na noiava goada baine henigu unu amo tadikaka taihu baina durudia.”

¹³ Vitalii na eto: “Una nega ai baia boga-auka na mai anina bada. Lau na motuka amo hora 12 na heau, dala ai na heauva lalonai Iehova na ḡuriḡuri heniava.” Ena be Vitalii na e boga-auka, to ia na e aonega danu. Vitalii na ma eto: “Iehova na noia loulouva aonega baine henigu bona baina manau. Gavamani ese gwaumaoro e heni daladia ai mo na heauva. Lau ese tadikaka taihu e ḡaukara hebouva karana na itaia neganai, una ese e hagoadagu. Idia ese dala ai momoru e kokidiava bona heduru ḡaudia heḡereḡere dabua, aniani bona kohu badadia e gogova bena motuka ai e udava. Danu lau bona Viktor amai e heniva bona baia mahuta gabudia e heḡaeḡaelaiva.”

IEHOVA BA BADINAIA

14. Dahaka baita kara bema ta lalokau heniamu tauna ta na Iehova baine rakatania?

¹⁴ Eda lalokau tauna ta eiava turada namona ta ese Iehova e rakataniamu neganai, ita edai una na hahetoho badana ta. (Sal. 78:40; Her. 24:10) Bema Iehova e rakatania tauna enai eda lalokau na goada reana edai na be aukamu una abi hidi baita abia dae. Bema nega ta una na emu ai e vara, Sadok ena haheitalai, Dirava ibadinana karana ai, ese be hagoadadamu.

15. Sadok ese Iehova baine badinaia totona, dahaka dainai baine boga-auka na namo? (1 Hanua Pavapavadia 1:​5-8)

¹⁵ Sadok ese Iehova na dounu e badinaia ena be ia turana namona Abiatara ese Iehova na se badinaia. Una na David ena lohia negana dokona ai e vara. David na kahirakahira baine mase neganai, ia natuna Adonia na e ura sibona king ai baine hahelao, ena be Iehova ese Solomon e abia hidi king ai bainela. (1 Sis. 22:​9, 10) Abiatara na e hegiro bena Adonia e durua. (1 Hanua Pavapavadia 1:​5-8 ba duahidia.) Abiatara na unu e kara toma amo e hahedinaraia ia ese David bona Iehova vada e dadaraidia! Reana Sadok na e lalohisihisi bada herea, ani? Mani a laloa, ia bona Abiatara na laḡani 40 mai kahana hahelaḡa ḡaukaradia ai e ḡaukara hebou. (2 Sam. 8:17) “Dirava ena maua helaḡana” na idia raruosi ese e reḡuava. (2 Sam. 15:29) Matamanai, idia raruosi ese David king ai ela karana e sapotia bona Iehova ena hesiai ḡaukara lalonai ḡau namodia momo e kara.—2 Sam. 19:​11-14.

16. Dahaka ese Sadok e durua dounu Iehova baine badinaia?

¹⁶ Ena be Abiatara na abi hidi kererena e karaia to Sadok na dounu Iehova e badinaia. David na dibana ia ese Sadok na baine abidadama henia diba. Adonia ena koikoi karana e hedinarai neganai, David ese Sadok, Natan, bona Benaia e hamaorodia Solomon bae horoa bona king ai bae halaoa. (1 Han. 1:​32-34) Sadok na Iehova e tomadiho heniava taudia, Natan bona King David ena kahai e giniva taudia,  edia haheitalai ese e hagoadaia. (1 Han. 1:​38, 39) Solomon na king ai ela neganai, ia ese “hahelaḡa tauna Sadok na Abiatara gabuna ai e atoa.”—1 Han. 2:35.

17. Bema emu lalokau tauna ta ese Iehova baine rakatania, edena dala ai Sadok ba tohotohoa?

¹⁷ Edena dala ai Sadok ba tohotohoa? Bema emu lalokau tauna ta na e uramu Iehova baine rakatania, namona na ba hahedinaraia oi na Iehova ena kaha ai o ginimu. (Ios. 24:15) Iehova ese goada be henimumu bo boga-aukamu. Iehova ba ḡuriḡuri henia bona ia e tomadiho heniamu taudia dekedekedia ai ba noho. Iehova bo badinaiamu neganai, ia ese oi na be lalonamo henimumu bona be hanamomumu.—2 Sam. 22:26.

18. Marco bona Sidse edia ekspiriens amo dahaka o dibamu?

¹⁸ Mani Marco bona adavana, Sidse, edia ekspiriens aita laloa. Idia natudia kekeni rarua ese hereva momokani e rakatania. Marco na e gwa: “Oi natumu e varamu dinana amo, emu lalokau idia ediai na bada herea. Una dainai idia sibodia ese Iehova e rakataniamu neganai, lalohisihisina na bada herea. To, Iehova ese ai e durumaimu baia haheauka. Heḡereḡere, lau na manokamu neganai, adavagu ese e hagoadagumu, bona ia e manokamu neganai, lau ese na hagoadaiamu.” Sidse na e gwa: “Bema Iehova ena heduru na lasi, ai na basiama haheauka diba. Na laloava natugu ese Iehova e rakatania na lau egu kerere, una dainai Iehova enai egu hemami na herevalaiava. Se daudau, taihu ta na lau dekegu ema, imana lau paḡagu ai e atoa, bena eto: ‘Sidse, ba helalotao, ina na dia oi emu kerere!’ Momokani, Iehova ena heduru dainai, mai moalegu ida dounu Iehova na hesiai heniamu.”

19. Oi be o uramu dahaka ba kara?

¹⁹ Iehova na e uramu ia e tomadiho heniamu taudia na Sadok bamona bae haheauka. (2 Tim. 1:7) To, ia na se uramu siboda eda goada ai baita tabekau. Ia na e uramu ia enai baita tabekau. Una dainai, bema e varamu ḡauna ta dainai ba boga-auka na namo, Iehova ena heduru ba tahua. Ia ese oi be durumumu Sadok heḡereḡerena ba boga-auka!—1 Pet. 5:10.