1. Edena henanadai baita heni na namo?

NEGA haida vaira neganai bae vara ḡaudia, heḡereḡere tomadiho koikoi baine ore, Gog, Magog tauna ese be tuari henidamu, bona Aramagedono tuarina o lalodiamu neganai o lalohekwarahimu, a? Nega haida sibomu o henanadaimu, ‘Una nega ai, unu hahegari ḡaudia be varamu neganai, lau be egu abidadama ai ba gini goadamu eiava?’ Bema unu o lalo tomamu, ina stadi ena siri badana ai Iesu ese e gwauraia herevana ese baine durumu na namo. Iesu ese ena hahediba e hamaorodia, eto: “Kudoumui basie hetaha; . . . bavabidadama.” (Ioa. 14:1) Abidadama goadana ese be durudamu vairai bae ḡaudia daidiai basita gari.

2. Edena dalai eda abidadama baita hagoadaia diba, bona ina atikol ai dahaka baita herevalaimu?

² Vaira negai bae vara hahetohodia baita haheaukalai totona, namona na hari ina negai eda abidadama e tohoamu ḡaudia baita hanaidia daladia baita lalodia. Hari ta davarimu hahetohodia ihanaidia totona ta karamu ḡaudia baita haerodiamu neganai, eda abidadama ihagoadana daladia baita dibamu. Hahetoho ta hanaidiamu negadia ta ta ai, eda abidadama na e goada e laomu. Una ese be durudamu vairai bae vara hahetohodia baita haheaukalai. Ina atikol ai, Iesu ena hahediba ediai e vara ḡaudia hani baita herevalaimu, una ese e hahedinaraia edia abidadama bae habadaia na namo. Bena baita itaiamu hari ina negai, edena dalai hahetoho unu bamodia baita haheaukalai bona unu ese vaira negana totona baine haheḡaeḡaeda diba.

3. Mataio 6:30, 33 ai, Iesu ese abidadama karana ai edena poin e hahedinaraia?

³ Vaia ruma bese kwarana na be uramu adavana bona natuna edia dabu ḡaudia, aniani, dabua bona ruma baine havara henidia. Ini nega aukadia ai, unu baine kara toma na mai hekwarahina.  Nega haida, tadikaka taihu ese edia moni ḡaukara e haboiomu, bona ena be e hekwarahimu to ḡaukara ta do asie davaria. Haida be Kristen taudia ese basie kara diba moni ḡaukaradia e dadarai. Nega unu bamodia ai, namona na baita abia dae momokani Iehova ese dala ma haida ai eda ruma bese ena dabu ḡaudia na be henimu. Iesu ese ena hahediba ediai una na e hahedinaraia ḡoevaḡoeva ena Ororo Harorona ai. (Mataio 6:30, 33 ba duahi.) Bema baita abia dae momokanimu Iehova ese basine rakatanidamu, una ese be durudamu Basileia iduruna ḡaukaradia baita lalo badamu. Iehova ese tauanina dalanai e durudamu dalana baita itaiamu neganai, baita abia daemu ia na e noho momokanimu bona una ese eda abidadama na be hagoadaiamu.

4-5. Dahaka ese ruma bese ta e durua edia dabu ḡaudia ilalohekwarahilaina karana bae haheaukalaia?

⁴ Venezuela ai, ruma bese ta na edia dabu ḡaudia e lalohekwarahilaiva neganai, Iehova ena heduru e mamia dalana mani aita laloa. Guna, Miguel Castro ena ruma bese ida na edia farm e ḡaukaralaiava dainai tauanina dalanai edia noho na heḡereḡere. Gabeai, tatau haida mai ipididia ida ese edia tano e abia bona e luludia. Miguel na e gwa: “Hari, ai na ta ena tano taina a ḡaukaralaiamu amo emai mauri iduruna ḡaudia a abimu. Dina ta ta ai Iehova na noiamu ia ese una dina ai a dabumu ḡaudia baine heni.” Una ruma bese ediai mauri na auka, to Tamada lalokauna ese dina ta ta ai baine naridia karana na e abia dae momokanimu dainai, hanaihanai kongrigeisin heboudia e laomu bona Iehova e hesiai heniamu. Edia mauri lalonai Basileia e atoa gunamu, bona Iehova ese edia dabu ḡaudia na e henimu.

⁵ Unu nega aukadia ai, Miguel bona adavana Yurai na Iehova ese e naridia dalana e laloa bada. Nega haida, Iehova ese tadikaka taihu e ḡaukaralaidiava tauanina dalanai idurudia ḡaudia e heniva eiava Miguel e duruava moni ḡaukara ta baine davaria. Nega ma haida ai, Iehova ese brens ofes e ḡaukaralaiava edia dabu ḡaudia bae heni totona. Iehova ese se rakatanidia, una dainai edia ruma bese ena abidadama na e goada. Natudia kekeni badana, Yoselin, na Iehova ese e durudia dalana ta e herevalaia murinai, e gwa: “Iehova ese e durumai dalana na itaia neganai una ese e hagoadagu bada. Turagu ta bamona na laloamu bona na diba momokanimu ia ese egu mauri dinadia iboudiai lalodiai be durugumu.” Ma e gwa: “Emai ruma bese ese e davari hahetohodia ese e haheḡaeḡaemaimu, vaira negai bae vara hahetoho aukadia baia haheaukalaidia.”

6. Moni dalanai o hekwarahimu neganai, edena dalai emu abidadama ba hagoadaia diba?

⁶ Moni dalanai o hekwarahimu, a? Bema oibe, ina na nega aukana oiemu ai. Ena be emu noho dalana na e aukamu, to una nega na ba ḡaukaralaia diba emu abidadama ba hagoadaia. Iehova ba ḡuriḡuri henia bona Iesu ena hereva Mataio 6:25-34 ai ba duahia bona ba laloa dobu. Hari ina negai Iehova ese hesiai ḡaukara e goadalaiamu taudia e durudiamu daladia ba lalodia. (1 Kor. 15:58) Unu bo kara tomamu neganai, bo abia dae momokanimu, Tamamu gubai e  nohomu ese o davarimu hekwakwanaidia e davari taudia e durudia heḡereḡerena, oi danu be durumumu. Emu dabu ḡaudia bona baine durumu daladia na mai dibana. Emu mauri lalonai Iehova ena heduru bo mamiamu neganai, emu abidadama na be goadamu dainai, vairai bae vara hahetohodia bo haheaukalai dibamu.​—Hab. 3:17, 18.

7. Mataio 8:23-26 heḡereḡerena, edena dalai lai gubana ta ese hahediba taudia edia abidadama e tohoa?

⁷ Davara ai Iesu bona ena hahediba na lai gubana ta lalonai e vareai neganai, Iesu ese una e vara ḡauna e ḡaukaralaia ena hahediba e durudia bae laloparara edia abidadama bae habadaia na namo. (Mataio 8:23-26 ba duahia.) Lai e bada herea dainai vanaḡi na hurehure ese mokona e hamutua, to una neganai Iesu na mahuta. Hahediba taudia na mai garidia ida ia e haoa bona e noia baine hamauridia neganai, Iesu na mai ena manau ida idia e sisiba henidia, eto: “Abidadama maraḡi-maraḡi taumui e, dahaka dainai o garimu?” Namona na idia na bema laloparara Iehova na heḡereḡere, Iesu bona ia e bamoa taudia na dika amo baine gimadia. Una ese dahaka e hadibadamu? Abidadama goadana ese baine duruda diba lai gubadia korikoridia bona lai gubadia na heto hekwakwanaidia baita haheaukalaidia.

8-9. Anel ena abidadama be edena dalai e tohoa, bona dahaka ese e durua?

⁸ Mani Puerto Rico ai singul taihu ta ladana Anel aita laloa, e davaria hekwakwanai badana baine haheaukalaia totona abidadama goadana baine abia na namo. Ienai lai gubana korikorina ta e vara. Laḡani 2017 ai, Hurricane Maria ese ena ruma e hadikaia. Una lai gubana dainai, ena moni ḡaukara na e haboioa. Anel na e gwa: “Unu metau dinadia ai, na lalohekwarahi bada. To na laloparara ḡuriḡuri amo Iehova baina abidadama henia karana na ḡau badana, bona lalohekwarahi ese basine butugu tao na namo.”

⁹ Anel na ena hekwakwanai ihaheaukalaina ḡauna ma ta danu e herevalaia, una na hereva ikamonaina bona ibadinana karana. Ia na e gwa: “Iehova ena orea ese e halasimu hahekau daladia ibadinadia karana ese e durugu basina lalohekwarahi. Iehova ena heduru lauma dalanai bona tauanina dalanai na tadikaka edia amo na itaia.” Ma e gwa: “Iehova ese dia egu dabu ḡaudia mo, to ḡau momo danu e henigu, una ese egu abidadama na e hagoadaia bada.”

10. Dahaka ba kara diba bema hekwakwanai badana ta ba davaria?

¹⁰ Emu mauri lalonai lai gubana ta e varamu, a? Reana disasta ta dainai o hekwarahimu. Eiava lai gubana ese e laulaulaia ḡauna ta, heḡereḡere gorere badana ta o davaria dainai o lalomanokamu bona asi dibamu dahaka ba kara. Reana nega haida bo lalohekwarahimu, to una ese basine koumu na namo Iehova bavabidadama henia totona. Ḡuriḡuri goadagoada karana amo Ia ba raka henia kahi. Emu abidadama ba hagoadaia totona, Iehova ese e durumu negadia ba lalodia dobu. (Sal. 77:11, 12) Namona na ba diba momokani Ia ese oi na basine rakatanimumu ela bona hanaihanai.

11. Dahaka dainai laloda baita hadai hahekau taudia baita kamonai henidia bona baita badinadia?

 ¹¹ Hahetoho baita haheaukalaidia totona baine duruda ḡauna ma ta be dahaka? Anel ese e gwauraia heḡereḡerena, una na hereva ikamonaina bona ibadinana karana. Iehova bona Iesu ese e abidadama henidiamu taudia bavabidadama henidia na namo. Nega haida, e abidia hidi hahekau taudia ese be henimu hahekau herevadia na basita lalopararalaidiamu. To, Iehova ese hereva e kamonaimu bona e badinamu taudia na e hanamodiamu. Iena Hereva bona abidadama taudia edia ekspiriens amo ta dibamu, hereva e kamonai bona e badina taudia na e mauri. (Eso. 14:1-4; 2 Sis. 20:17) Haheitalai unu bamodia ba lalodia dobu. Unu bo kara tomamu neganai, be hagoadamumu mai emu ura ida hari ina negai bona vaira neganai orea e hakauamu dalana bo badinaiamu. (Heb. 13:17) Una dainai kahirakahira be varamu hisihisi badana garina na basio garimu.​—Her. 3:25.

12. Edena dalai Luka 18:1-8 ese e hahedinaraia, abidadama bona hahemaoro kerere baita haheaukalaia karana baita hahedinarai hebou diba?

¹² Iesu na mai dibana hahemaoro kerere karana ese ena hahediba edia abidadama na be tohoamu. Baine durudia una bae haheaukalaia totona, ia ese parabole ta e herevalaia, una sivarai na Luka bukana lalonai. Iesu ese vabu ta ena sivarai e gwauraia, ia ese asi ena kara maoromaoro hahemaoro tauna ta e noia loulouva hahemaoro maorona baine karaia totona. Mai dibana ena noinoi loulou dainai, hahemaoro tauna ese ia na be duruamu. Gabeai, una hahemaoro tauna ese ena noinoi na e abia dae. Una sivarai amo dahaka ta dibamu? Iehova na dia hahemaoro kerere tauna. Una dainai Iesu na e gwa: “Benaini, Dirava ese e abidia hidi taudia, e tai henia boi tai henia rani taudia, inaidia davadia basine henidia a?” (Luka 18:1-8 ba duahia.) Bena Iesu na ma e gwa: “Taunimanima Natuna bainema negana ai abidadama tanobada ai baine davaria eiava?” Hahemaoro kerere dainai ta hisihisimu neganai, namona na baita haheauka bona basita hesiku, unu amo baita hamomokania eda abidadama na goada una vabu ena heḡereḡerena. Abidadama unuhetomana dainai, baita diba momokanimu Iehova ese ita na be durudamu. Danu, namona na baita abia dae ḡuriḡuri na mai siahuna. Nega haida, eda ḡuriḡuri dainai Iehova ese asita lalomu dalanai be durudamu.

13. Daḡedaḡe e davari ruma besena ta be edena dalai ḡuriḡuri karana ese e durudia?

¹³ Democratic Republic of the Congo ai e nohomu taihu ta ladana Vero, enai e vara ḡauna mani a laloa. Edia hanua na ami oreana ta ese e hadikaia neganai, Vero, adavana dia Witnes tauna, bona natudia kekenina laḡanina 15 ese edia hanua e heautania. Dala amo e laova lalonai, dala e koua ami taudia ese e abidia bona eto bae hamasedia. Vero e tai matama neganai, natuna kekenina na ia ihagoadana totona e ḡuriḡuri badabada, bona Iehova ladana e gwauraia loulou. Ena ḡuriḡuri e hadokoa neganai, ami edia commander ese e nanadaia, “Kekeni, daika ese  ḡuriḡuri dalana e hadibamu?” Ia ese e haere henia eto, “Sinagu ese Mataio 6:9-13 ai ḡuriḡuri dalana e ḡaukaralaia ḡuriḡuri e hadibagu.” Bena commander na e gwa, “Kekeni, tamamu sinamu ida mai mainomui ida aola, bona Iehova emui Dirava ese baine gimamui!”

14. Dahaka ese eda abidadama be tohoamu, bona dahaka ese be durudamu baita haheauka?

¹⁴ Ekspiriens unu bamodia ese e hadibadamu ḡuriḡuri karana ena namo na basita laloa maraḡi. To bema emu ḡuriḡuri haeredia na basio abi haraḡamu eiava basie varamu be ede bamona? Iesu ena parabole ai e gwauraia vabuna heḡereḡerena, ba ḡuriḡuri loulou, bavabia dae momokani eda Dirava ese basine rakatanimumu, bona nega korikori ai bona dala haida ai emu ḡuriḡuri na be haerelaimu. Iehova ena lauma helaḡa totona hanaihanai ba noinoi. (Fili. 4:13) Ba helalotao, kahirakahira Iehova ese hahenamo momo be henimumu, unu amo emu hisihisi gunadia na bo lalodia boiomu. Iehova ena heduru amo hahetoho idauidau bo haheaukalaimu neganai, una ese be hagoadamumu vairai be varamu hahetohodia bo haheaukalaimu.​—1 Pet. 1:6, 7.

15. Mataio 17:19, 20 heḡereḡerena, Iesu ena hahediba taudia be dahaka hekwakwanai e davaria?

¹⁵ Iesu ese ena hahediba e hadibadia abidadama ese baine durudia diba, bae koudia ḡaudia bae hahanaidia. (Mataio 17:19, 20 ba duahia.) Nega ta, demoni ta iluluna karana ai idia na asie heḡereḡere, ena be nega haida demoni na de luludia. Edia hekwakwanai be dahaka? Iesu na e gwa edia abidadama bae habadaia na namo. E hamaorodia bema edia abidadama na goada, ororo hetomadia hekwakwanaidia bae hahanai diba! Hari, ita danu ta davarimu hekwakwanaidia na baita lalomu basita hanaidia dibamu.

16. Edena dalai abidadama ese Geydi e durua adavana ena mase bona daradoko karana e haheaukalai?

¹⁶ Mani Guatemala taihuna Geydi, ena haheitalai aita laloa. Kongrigeisin hebouna ta murinai edia ruma e laova lalonai, adavana Edi na haida ese e alaia. Edena dalai Geydi na ena abidadama karana ese e durua ena daradoko e haheaukalaia? Ia na e gwa: “Ḡuriḡuri karana amo egu maduna na Iehova enai na tahoa kau, una ese lalomaino e henigu. Egu ruma bese bona kongrigeisin ai turagu amo Iehova ese e narigu dalana na na itaia. Iehova ena hesiai ḡaukara ai na bisimu karana ese egu hisihisi e hamaraḡiamu, bona e durugumu dina ta ta ai bae vara ḡaudia baina lalodia bona kerukeru totona basina lalohekwarahi. Egu ai e vara ḡauna amo na dibamu, herevana vaira neganai dahaka hahetoho bae vara, to Iehova, Iesu bona orea edia heduru amo baina haheaukalaidia diba.”

17. Ororo hetomana hekwakwanaidia ta davarimu neganai dahaka baita kara diba?

¹⁷ Emu lalokau tauna ta e mase dainai o lalohisihisimu, a? Nega bavato toreisi lou helarona ai emu abidadama ba hagoadaia totona, Baibul ai toreisi lou sivaraidia ba duahi. O lalohisihisimu badina emu ruma bese tauna ta na orea amo e atoa siri, a? Dirava ena hereva ba stadilaia, unu  amo bavabia dae Dirava ena matahakani dalana na hanaihanai namo e havaraiamu. Ena be edena hekwakwanai emu ai e varamu, to ba ḡaukaralaia emu abidadama ba hagoadaia. Lalomu ai e miamu ḡaudia na Iehova ba hamaorolaia. Sibomu basio noho, to tadikaka taihu ba hakahikahidia. (Her. 18:1, NWT) Bae durumu ba haheauka diba ḡaukaradia ba kara, ena be mai taimu ida bo karadiamu. (Sal. 126:5, 6) Hanaihanai hebou baola, haroro ḡaukara ba karaia, bona Baibul ba duahia. Bona Iehova ese vaira negai be havaramu hahenamo namodia ba lalodia. Iehova ese e durumumu dalana bo itaiamu neganai, emu abidadama ienai na be hagoadaiamu.

18. Bema o dibamu emu abidadama na e manokamu, dahaka ba kara diba?

¹⁸ Bema guna o hari o davari hekwakwanaidia ese e hahedinaraiamu, emu abidadama na manoka, basio lalomanoka. Namona na ba laloa una na emu abidadama ihagoadana ḡauna. Iesu ena aposetolo e noinoi heḡereḡerena, Dirava ba noia, bao gwa: “Emai abidadama ame habadaia.” (Luka 17:5) Danu, ina atikol ai tame herevalai haheitalaidia ba lalodia. Miguel bona Yurai heḡereḡeredia, Iehova ese e durumu negadia ba lalodia tao. Vero natuna kekenina bona Anel heḡereḡeredia, Iehova ba ḡuriḡuri henia goadagoada, hekwakwanai o davarimu negadiai una na mai anina bada. Bona Geydi heḡereḡerena, namona na ba laloparara Iehova ese bavabia heduruna na emu ruma bese bona turamu amo be henimumu. Bema oi na Iehova ena heduru amo hari o davarimu hekwakwanaidia bo hanaidiamu, bo abia dae momokanimu vaira neganai ena be dahaka hekwakwanai bo davarimu, to Ia ese be durumumu bo haheaukalaimu.

19. Iesu be dahaka e abia dae momokani, bona oi be dahaka bavabia dae diba?

¹⁹ Iesu ese ena hahediba edia abidadama bae hagoadaia gabudia na e herevalai, to mai dibana Iehova ena heduru amo vairai bae davari hahetohodia na bae hanaidia diba. (Ioa. 14:1; 16:33) E abia dae momokani abidadama goadana dainai, hutuma bada herea na e maimu hisihisi badana amo bae roho mauri diba. (Apok. 7:9, 14) Oi be idia ta ai bo laomu, a? Iehova ena hariharibada dainai, oi na idia ta ai baola diba, bema hari e hedinaraimu daladia ba ḡaukaralai, emu abidadama ba habadaia bona ba hagoadaia!​—Heb. 10:39.