MANI INA HAHEITALAI A LALOA: Oi na museum ta ai o ha-loaloa, bona unuseniai statue o ima amo e koro ḡaudia na momo herea. Momo na gugunana o kahadia haida na de dika. Idia haida kahadia badadia na e makohi bona lasihidia. To statue tamona mo do se dika, ima amo e koroa heḡereḡerena ai dounu mia. Oi ese e loalaimu tauna o nanadaia: “Ina statue be matamata?” Ia na e gwa: “Lasi, ini ima amo e koro ḡaudia iboudiai padadiai, ina statue sibona mo gunana, bona ta ese se hamatamataia lou.” Oi na ma o henanadai: “Ina statue be gabu metaina ta ai e atoa dainai, dina, lai o medu ese se hadikaia, a?” Ia e haere: “Lasi, ina statue na dina, lai, medu lalodiai e heato. Bona taunimanima momo e ura bae hadikaia.” Reana oi na vada o uramu ba diba, ‘Una statue be dahaka amo e karaia?’

Dala ta ai, Baibul na una statue idau hereana bamona. Baibul sibona mo buka gunana momokani. Vaia, buka gunadia ma haida danu mimia. To, ima amo e koro ḡaudia gunadia heḡereḡeredia, buka gunadia momo danu gabeai e dika. Unu buka lalodiai gunaguna saiens taudia ese e gwaurai ḡaudia na hari ina negai aonega matamatana bona e hahemomokani ḡaudia ese e hakoikoimu. Eiava unu buka lalodiai doctor e gwaurai sisibadia na nega momo taunimanima se durudiamu to bae hamasedia diba. Eiava unu buka gunadia momo kahadia maraḡidia mo mimia, a kaha badadia na vada lasihidia eiava vada e dika.

To, Baibul na idau. Ena be Baibul na laḡani 3,500 mai kahana gunanai e torea, to iena hereva iboudiai na mimia. Bona ena be laḡani momo lalodiai taunimanima e urava Baibul bae hadikaia​—e gabua, e taravatua, bona ena hereva na asie laloa bada​—to Baibul ena hereva ta na se boio. Ena be hari taunimanima ese aonega matamatadia e ha-lasimu, to Baibul ena hereva momo ese e hahedinaraimu Baibul na aonega amo e honu.

Reana bo lalomu, ‘Hari ina negai Baibul ena hahekau herevadia baita badina diba, eiava?’ Haere ba diba totona, sibomu ba henanadai: ‘Hari inai negai, taunimanima be ededia hekwakwanai badadia e davarimu? Ededia hekwakwanai be didika rohoroho?’ Reana bo gwaumu tuari, pollution, raskol karadia, eiava corruption. Mani Baibul ena hahekau herevadia haida aita itadia. Bena sibomu ba henanadai, ‘Bema taunimanima ese ini hahekau herevadia badinamu, tanobada maurina be namo eiava?’

MAINO BA URA HENIA

“Herohemaino taudia be nanamo, badina be idia na Dirava natuna bae gwauraidia.” (Mataio 5:9) “Bema mai dalana, taunimanima iboudiai ida ba noho mai mainomui ida.”​—Roma 12:18.

BA HEBOGAHISI BONA DIKA BA GWAU TAO

“Hebogahisi taudia be nanamo, badina be idia danu do bae bogadia hisi.” (Mataio 5:7) “Ba haheauka heheni. Ta ese bamona baine habadelaia negana ai, emui dika ba hegwau tao heheni; Lohiabada [Iehova *] ese emui dika vada e gwau tao; umui danu unu ba kara toma.”​—Kolose 3:13.

BESE IDAUIDAU IDA BA NOHO HEBOU NAMONAMO

Dirava “ese taunimanima besedia iboudiai vada e karadia, tanobada kopina idoinai bae noho henia.” (Aposetolo Edia Kara 17:26) “Bena Petro vada e hereva matama, eto, Vada name diba momokani Dirava ese taunimanima oromadia se lalomu, a bese iboudiai lalodiai ia garina e garimu bona kara maoromaoro e karamu tauna na ia ese e lalo namo heniamu.”​—Aposetolo Edia Kara 10:34, 35.

TANOBADA BA REḠUA NAMONAMO

“Dirava Iehova ese hari tau e abia, Eden imeana ai e atoa, ia ese baine biru henia bona baine reḡua.” (Genese 2:15.) Dirava ese ‘tanobada ihadikana taudia na be hadikadiamu.’​—Apokalupo 11:18.

MATAḠANIḠANI BONA MATABODAḠA KARADIA IBOUDIAI BA INAI HENIDIA

“Nahuamui ba toho, kohu iura-henina ena lalo-ani garina. Badina be taunimanima na edia kohu momo ese basie hamauridia.” (Luka 12:15) “Heuda-hanai [“matabodaḡa karadia iboudiai,” NWT] bona mata-dika bona mata-ḡaniḡani na bogaraḡimui ai basio herevalai; helaḡa taudia edia dala bunai.”​—Efeso 5:3.

BASIO HENAOHENAO, TO BA ḠAUKARA GOADA

“A uramu ḡau idoidiai baia kara maoromaoro.” (Heberu 13:18) “Henao tauna na basine henao lou; ḡaukara namona ta imana amo baine karaia.”​—Efeso 4:28.

IHAREHA, VABU BONA TAUNIMANIMA IBOUDIAI BA DURUDIA NA ḠAU BADANA

“Lalo-hesiku taudia ba hagoadadia, manoka taudia ba imudadia, taunimanima iboudiai ba haheauka henidia.” (1 Tesalonika 5:14) “Ihareha bona vabu baita igodia ita edia hisihisi ai.”​—Iakobo 1:27.

Baibul lalonai unu hahekau herevadia na se tore kava. To Baibul ese e hadibadamu, unu hahekau hereva na baita lalodia bada bona dina ta ta ai baita badinadia. Bema taunimanima momo ese unu hahekau herevadia be badinamu, taunimanima edia hekwakwanai badadia na be ore dibamu, ani? Una dainai, hari ina negai, Baibul ena hahekau herevadia baita badinadia na namo! To, Baibul ena hahediba herevadia ese oi be ede be durumu tomamu?

Aonega tauna ta na eto: “Aonega ihamomokanina na [kara] amo e hedinaraimu.” (Mataio 11:19) Oi ese una hereva o abia daemu? Aonega korikorina na baine hedinarai diba bema ba badinaia. Una dainai, reana bao gwa diba: ‘Bema Baibul ena hereva ba badinadia bona namo bae vara, anina na egu mauri na baine durua diba, ani? Edena dala ai baine durugu hari na davarimu hekwakwanaidia baina hahanaidia?’ Mani haheitalai ta aita herevalaia.

Delphine * ena mauri lalonai na ḡau idauidau e karava bona ena mauri na e moalelaiava. To gabeai, hekwakwanai idauidau na enai e vara. Ia natuna kekenina (teenage) e mase. Iena headava e dika. Bona moni dalanai hekwakwanai idauidau e davari. Ia na unu lalo bona e gwa: “Asi dibagu lau be vada daika​—asi natugu, asi adavagu, bona asi egu ruma. Lau ese na laloava egu mauri na asi anina, badina asi egu goada ḡau ta baina karaia, bona asi dibagu vaira negana ai be dahaka be varamu.”

Delphine ese e itaia ina Baibul siri ena hereva na e momokani vaitani: “Emai mauri laḡanidia na [70], eiava goada dainai bae [80] readia; to idia na hekwarahi ai bona lalo-hisihisi ai e honu honu daemu; idia na e ore haraḡamu, bena ai na dauha a roho laomu.”​—Salamo 90:10.

Ina metau negana lalonai, Delphine na Baibul amo heduru e abi. Baibul ese e durua bada herea. Taunimanima ma haida danu na metau lalodiai Baibul ena sisiba e badina neganai una ese e durudia. Idia ediai Baibul na sivarai matamanai ta herevalaia statue heḡereḡerena. Ena be buka gunadia be e gunanamu bona basie duruda dibamu, to Baibul ese ita be be duruda dibamu. Badina Baibul be e karaia idau, a? Eiava badina Baibul be dia taunimanima edia lalohadai to Dirava ena lalohadai amo e honu, a?​—1 Tesalonika 2:13.

Reana oi danu o itaiamu mauri na kwadoḡi bona hekwakwanai amo e honu. Emu hekwakwanai daidiai o lalohekwarahi bada hereamu negadiai, namona na Baibul ai tauhalo, heduru, bona sisiba namodia bavabi, ani?