Izai 17:1-14
17 Enn mesaz kont Damas:
“Gete! Damas pou nepli enn lavil,Ek li pou vinn enn pil ros.
2 Bann lavil Aroer pou abandone,Zot pou vinn bann plas kot bann troupo repoze,Pa pou ena personn ki pou fer zot per.
3 Dan Efraim pou nepli ena bann lavil ki antoure ar bann miray,Ek Damas pou nepli ena rwayom;Ek laglwar bann ki’nn reste dan Siri pou disparet,Parey kouma laglwar bann Izraelit,” ala seki Zeova Sef bann larme dir.
4 “Sa zour-la laglwar Zakob pou diminie,Ek so lekor ki an bonn sante pou vinn enn sak lezo.
5 Sa zour-la pou parey kouma kan fer rekolt bann lagrinEk kan rekolte bann zepi dible,Li pou parey kouma kan ramas bann lagrin ki’nn reste dan Vale Refaim.
6 Pou res zis enn tigit frwi mem dan karo,Parey kouma kan tap bann brans enn pie zoliv:
Zis de ouswa trwa zoliv mir ki pou res lor brans ki pli lao,Pou res zis kat ouswa sink frwi lor so bann brans ki raporte,” ala seki Zeova Bondie Izrael dir.
7 Sa zour-la bann zom pou get sa Kikenn Ki’nn Fer zot la, zot lizie pou fixe sa Kikenn Ki Sin dan Izrael la.
8 Zot pa pou get bann lotel, travay ki zot lame inn fer; ek zot pa pou fixe bann travay ki zot ledwa inn fer, ki li bann poto sakre* ouswa bann lotel lansan.
9 Sa zour-la zot bann lavil ki antoure ar bann miray, pou vinn parey kouma bann landrwa ki’nn abandone dan bwa,Parey kouma enn brans ki ti abandone devan bann Izraelit;Li pou vinn enn terin ki’nn abandone.
10 Zot inn bliye Bondie ki’nn sap zot;Zot pa’nn rapel sa Ros ki protez zot la.
Se akoz sa ki zot pe fer bann zoli plantasion,*Ek zot inn met bourzon enn etranze* ladan.
11 Dan lazourne zot bien met baraz otour zot plantasion,Dan gramatin zot fer zot lagrin zerme,Me zour kot ena maladi ek douler ki pa kapav geri, rekolt pou disparet net.
12 Ekoute! Boukou pep pe fer enn ta tapaz,Parey kouma enn lamer ki demonte!
Bann nasion pe fer tapaz,Parey kouma son bann gro delo!
13 Bann nasion pou fer enn son ki parey kouma tapaz boukou delo.
Li pou kriy ar zot, ek zot pou sove zot pou ale,Zot pou sove, parey kouma bann lapay ki lor bann montagn ki divan pouse,Kouma enn touf pikan ki pe roule dan enn siklonn.
14 Aswar ena enn gran laper.
Avan lizour leve bann lennmi inn disparet.
Ala seki pou ariv bann ki pe depouy nou,Ek bann ki pe pran tou seki nou ena.
