“Bann Temwin, pa ti zis zanti avek bann dimounn, zot ti zanti osi avek mo bann lisien. Enn zour, Elaine, ki ti pe debout pre ar so prezantwar, ti donn mo de lisien bann biskwi. Depi sa zour-la, sak fwa ki nou pas pre kot prezantwar, mo bann lisien ti koste kot bann Temwin pou zot gagn zot bann biskwi.

“Apre plizir mwa, mo bann lisien ti ankor bien kontan bann biskwi ki zot ti pe gagne, ek mwa, mo ti bien kontan bann konversasion ki mo ti gagne ar bann Temwin. Me mo pa ti anvi koz tro boukou avek zot. Mo ti ena 70 an, ek mo pa ti tro kone ki kitsoz bann Temwin ansegne. Mo ti fer bann move lexperyans ar Legliz Protestan, ek mo ti panse ki li ti pli bon ki mo etidie Labib par momem.

“Sa lepok-la, mo ti trouv bann lezot Temwin ki ti pe fer prezantwar dan bann lezot plas dan lavil. Zot osi, zot ti bien amikal. Zot ti touletan servi Labib pou reponn mo bann kestion, ek sa ti fer mwa ena plis konfians an zot.

“Enn zour, Elaine ti demann mwa, ‘Eski ou panse ki bann zanimo zot enn kado Bondie?’ Mo ti reponn li, ‘Wi, biensir!’ Lerla, Elaine ti montre mwa Izai 11:6-9. Depi sa zour-la, mo ti anvi aprann plis lor Labib, me mo ti ankor ezite pou pran bann piblikasion ar bann Temwin.

“Pandan plizir zour apre, mo ti gagn bann bon konversasion avek Elaine ek so mari, Brent. Zot ti ankouraz mwa pou lir Matie ziska Zistwar Bann Apot, pou mo konpran ki ete enn vre Kretien. Ek se samem ki mo ti fer. Inpe apre, mo ti aksepte ki Brent ek Elaine etidie Labib avek mwa. Sa ti arive pandan lete lane 2016.

“Sak semenn, mo ti atann mo letid Labib ek bann renion avek inpasians. Mo ti bien kontan seki mo ti pe aprann dan Labib. Apre inpe plis ki enn-an, mo ti pran batem. Asterla, mo ena 79 an, ek mo kone ki mo lor bon sime. Zeova inn beni mwa, parski Li’nn ed mwa pou form parti dan so fami.”