“Par enn zom pese finn vinn dan lemonn, e lamor finn rantre par pese, e lamor finn tous tou dimoun.”​—ROMIN 5:12.

Bondie ti kree nou bann premie paran, Adan ek Ev, avek enn lekor ek enn lintelizans parfe. Li ti osi met zot dan enn paradi lor later, enn zoli zardin ki apel Edenn. Li ti dir zot ki zot ti kapav manz bann frwi lor tou bann pie ki ti ena dan sa zardin-la. Me zot pa ti gagn drwa manz frwi enn sel pie. Kanmem sa, Adan ek Ev ti swazir pou manz bann frwi ki ti lor sa pie-la, ek sa ti enn pese. (Zenez 2:15-17; 3:1-19) Akoz zot ti dezobeir sa lord-la, Bondie ti tir zot depi sa zardin-la, ek lavi ti vinn bien difisil pou zot. Avek letan, zot ti gagn bann zanfan, ek lavi zot bann zanfan osi ti bien difisil. Zot tou ti vinn vie ek zot ti mor. (Zenez 3:23; 5:5) Nou tou nou bann desandan Adan ek Ev, akoz samem ki nou osi nou tom malad, vinn vie ek mor.

“Lemonn antie li dan pouvwar Lemal.”​—1 ZAN 5:19.

“Lemal” se Satan. Li enn anz ki finn rebel kont Bondie. (Zan 8:44; Revelasion 12:9) Avek letan, lezot anz finn swiv Satan ek apel zot bann demon. Sa bann move lespri-la servi zot pouvwar pou anbet bann dimounn ek fer zot dezobeir zot Kreater. Zot inflians boukou dimounn pou fer bann move kitsoz. (Psom 106:35-38; 1 Timote 4:1) Satan ek bann demon kontan pou fer bann dimounn soufer.

“Enn dimoun li rekolte seki li finn seme.”​—GALAT 6:7.

Dan diferan fason, nou tou nou soufer akoz pese ki nou finn erite ek linflians ki Satan ena lor lemond. Me parfwa, se bann dimounn mem ki rann zot prop lavi difisil. Kouma? Souvan, kan zot fer bann move kitsoz ouswa pran bann move desizion, zot rekolte bann move konsekans. Parkont, kan bann dimounn fer bann bon kitsoz, zot rekolte seki bon. Par exanp, enn mari ek enn papa ki onet, ki travay dir ek ki kontan so fami, li pou rekolte boukou bon kitsoz ek so fami pou ere. Me enn kikenn ki zougader, ki bwar boukou, ouswa ki pares, kapav fer so fami tom dan lamizer. Alor nou pou azir avek sazes si nou ekout nou Kreater. Li anvi ki nou rekolte boukou bon kitsoz, ek enn parmi, se ki nou kapav “viv dan lape.”​—Psom 119:165.

“Dan bann dernie zour . . . , bann dimounn pou kontan zotmem, pou kontan kas, . . . pou dezobeir zot paran, . . . Zot pa pou konn kontrol zot, zot pa pou ena okenn pitie, zot pa pou kontan seki bon.”​—2 TIMOTE 3:1-5, NW.

Azordi, boukou dimounn pe azir parey kouma finn predir dan sa bann parol-la. Fason zot azir se enn bann prev ki nou pe viv “bann dernie zour” sa lemond-la. Bann Lekritir sakre finn osi predir ki dan “bann dernie zour” nou pou trouv bann lager, lafaminn, bann gran tranbleman-de-ter, ek bann lepidemi. (Matie 24:3, 7, 8; Lik 21:10, 11) Sa bann kitsoz-la amenn boukou soufrans ek lamor.