1, 2. ‘Ki qualité dimoune nou bizin été’ pou gagne faveur Bondié?

 LA PLUPART dimoune interessé pou koné ki lezot pensé lor zot. Mais, en tant ki Chretien, eski nou pa bizin plis interessé pou koné ki Jéhovah pensé lor nou? Apré tou, Li pli grand Personnage dan l’univers ek Li-mem “la source lavi.”​—Ps. 36:9.

² L’apotre Pierre ti expliké ki pou nou gagne faveur Jéhovah, nou bizin ena ‘bann action ki montré ki nou conduite saint ek ki nou attaché ar Bondié.’ (Lire 2 Pierre 3:11.) Nou “bann action” bizin saint, setadir pur, dan domaine moral, mental ek spirituel. En plis, nou grand lamour ek nou respé pou Bondié bizin pousse nou pou faire bann action ki montré ki ‘nou attaché ar Bondié.’ Sa vedir ki, pou nou gagne faveur Bondié, sa pa concerne zis nou conduite mais sa concerne aussi seki nou été au fond nou-mem. Jéhovah “examine leker,” alors Li koné si nou conduite li saint ek si nou attaché zis ar Li tousel.​—1 Chron. 29:17.

3. Concernant nou bann relation avek Jéhovah, ki bann question nou bizin pose-nou-mem?

³ Satan le Diable pa envie ki nou ena faveur Bondié. En realité, li faire tou seki li kapav pou ki nou perdi nou bann relation avek Jéhovah. Satan pa hesité pou koz menti ek embete nou, pou attire nou ek faire nou arrete adore Jéhovah. (Jean 8:44; 2 Cor. 11:13-15) Alors, li bon ki nou demann-nou-mem: ‘Couma eski Satan embete bann dimoune? Ki mo kapav faire pou protege mo bann relation avek Jéhovah?’

4. Pou essaye detruire nou bann relation avek Bondié, ki Satan visé, ek kifer?

⁴ Disciple Jacques ti ecrire: “Enn dimoune tenté  kan li laisse so prop desir entraine li. Apré, kan sa desir-la inn developpé, sa faire li faire peché; lerla kan li’nn faire peché, sa amenn lamor.” (Jacq. 1:14, 15) Pou essaye detruire nou bann relation avek Bondié, Satan vise place kot nou bann desir né, setadir nou leker.

5, 6. (a) Couma Satan essaye influence nou leker? (b) Ki bann piege Satan servi pou mette bann mauvais desir dan nou leker, ek ki l’experience li ena?

⁵ Couma Satan essaye influence nou leker? La Bible dire: “Le monde entier li dan pouvoir sa kikenn ki mauvais-la.” (1 Jean 5:19) Parmi bann zarme Satan, ena “bann kitsoz ki ena dan le monde.” (Lire 1 Jean 2:15, 16.) Pendant plusieurs millier l’année, Satan le Diable finn controle le monde ki entoure nou. Nou pé vive dan sa le monde-la, alors, nou bizin faire attention ar so bann tactik ki bien sournois.​—Jean 17:15.

⁶ Satan essaye mette bann mauvais desir dan nou leker. L’apotre Jean mentionne trois piege ki Satan servi: (1) “desir la chair,” (2) “desir lizié,” ek (3) ‘faire l’etalage ar seki nou moyen permette nou ena.’ Satan ti servi sa bann piege-la pou tente Jésus dan desert. Sa faire beaucoup l’année ki Satan servi sa bann piege-la, alors, li ena l’experience ek li servi sa dan enn fason efficace. Li koné exactement ki piege pou servi avek chaque dimoune dapré tendance ki dimoune-la ena. Avant ki nou examine seki nou bizin faire pou protege nou-mem, anou guetté couma Satan ti reussi servi certain piege pou embete Ève, mais li pa ti reussi embete Garson Bondié.

7. Couma Satan ti servi “desir la chair” pou tente Ève?

⁷ Tou dimoune bizin mangé pou vive. Nou Createur finn crée later pou produire mangé en abondance. Li possible ki Satan essaye servi nou besoin naturel pou mangé, pou detourne nou ek faire nou desobeir Bondié. Prend l’exemple seki li ti faire avek Ève. (Lire Genèse 3:1-6.) Satan ti dire Ève ki li kapav mange fruit ki ti lor “pié connaissance bon ek mauvais” ek ki li pa pou mor. Li ti dire li, ki jour li mange sa fruit-la, li pou vinn couma Bondié. (Gen. 2:9) Satan ti pretann ki li pa ti necessaire ki Ève obeir Bondié pou li contigne vive. Sa ti enn gros mensonge, pa vrai? Enn fois ki sa l’idée-la ti rente dan la tête Ève, li ti ena enn choix pou faire: Rejette sa l’idée-la, ou-soit, contigne pense lor-la ek laisse so desir pou sa fruit-la grandi. Ève ti kapav mange fruit ki ti ena lor tou lezot pié. Mais, li ti choisir pou contigne pense seki Satan ti dire li concernant pié ki ti trouve au milieu jardin. Lerla, ek li “ti prend so fruit ek li ti mangé.” Alors, sa montré ki  Satan ti crée dan leker Ève enn desir pou enn kitsoz ki so Createur ti defann.

8. Couma Satan ti servi “desir la chair” pou tente Jésus, ek kifer li pa ti reussi?

⁸ Satan ti servi mem tactik avek Jésus. Kan Jésus ti dan desert ek li pa ti mangé pendant 40 jour ek 40 nuit, Satan ti servi so desir pou mangé, pou tente li. Satan ti dire li: “Si to enn garson Bondié, dire sa roche-la vinn di-pain.” (Luc 4:1-3) Jésus ti ena enn choix: Li ti kapav choisir pou servi so pouvoir pou faire mirak pou li gagne mangé, ou-soit li ti kapav decidé pou pa servi sa pouvoir-la. Jésus ti koné ki fodé pa li servi sa pouvoir-la pou bann raison egoïste. Mem si li ti faim, li pa ti faire so desir passe avant so bann relation avek Jéhovah. Jésus ti reponn: “Finn ecrire: ‘Enn dimoune bizin pa vive zis avek di-pain mais avek tou parole ki sorti dan la bouche Jéhovah.’”​—Luc 4:4, note.

9. Ki l’expression “desir lizié” vedir, ek couma Satan ti servi sa piege-la avek Ève?

⁹ Jean ti aussi mentionne “desir lizié” couma enn piege. Sa l’expression-la vedir ki enn dimoune kapav commence ena desir pou enn kitsoz zis kan li guette li. Satan ti servi sa piege-la avek Ève. Li ti dire li: “To lizié pou vrai-mem ouvert.” Plis Ève ti guette sa fruit ki Bondié ti defann-la, plis li ti envie sa. Li ti trouvé ki pié-la “ti enn kitsoz ki so lizié ti envie contigne guetté.”

10. Couma Satan ti servi “desir lizié” pou tente Jésus, ek couma Jésus ti reponn?

¹⁰ Couma Satan ti servi “desir lizié” pou tente Jésus? Satan le Diable “enn sel coute ti montré [Jésus] tou bann royaume ki lor later; ek le Diable ti dire li: ‘Mo pou donne toi tou sa pouvoir-la ek la gloire sa bann royaume-la.’” (Luc 4:5, 6) Jésus pa ti vrai-mem trouve tou sa bann royaume-la avek so lizié, mais li ti trouve zot la gloire dan enn vision. Surement Satan ti pensé ki Jésus ti pou tenté kan li ti trouve sa. Sans okenn la honte, li ti dire Jésus: “Si to adore moi enn sel fois, tousala pou vinn pou toi.” (Luc 4:7) Dan okenn fason Jésus pa ti envie vinn sa qualité dimoune ki Satan ti envie li vini-la. Desuite li ti reponn: “Finn ecrire: ‘C’est Jéhovah to Bondié ki to bizin adoré, ek zis ar Li tousel ki to bizin offert enn service sacré.’”​—Luc 4:8.

11. Couma Satan ti embete Ève?

¹¹ Kan Jean ti cite bann kitsoz ki ena dan le monde, li ti mentionne “enn kikenn ki faire l’etalage ar seki so moyen permette li ena.” Kan Adam ek Ève ti tousel lor later, bien sur ki zot pa ti kapav ‘faire l’etalage ar seki zot ti ena’ devant lezot dimoune. Pourtant, zot ti ena l’orgueil. Kan Satan ti tente Ève, li ti  pretann ki Bondié ti pé prive Ève enn kitsoz extraordinaire. Satan ti dire li ki jour ki li mange fruit dan “pié connaissance bon ek mauvais,” ‘vrai-mem li pou vinn couma Bondié, li pou konn seki bon ek seki pa bon.’ (Gen. 2:17; 3:5) Satan ti faire Ève croire ki li pa ti bizin Jéhovah pou vive. Kitfois c’est l’orgueil ki ti pousse Ève pou croire sa mensonge-la. Li ti mange sa fruit ki Bondié ti defann-la ek li ti croire ki li pa ti pou mor. Li ti faire enn erreur bien grave!

12. Couma Satan ti essaye tente Jésus, ek couma Jésus ti reponn?

¹² Jésus ti bien diferan avek Ève, li ti laisse enn bon l’exemple l’humilité! Satan ti essaye tente li dan enn lot fason, mais Jésus ti refuse pou faire enn kitsoz ki ti pou impressionne lezot ek testé Bondié. Si li ti faire sa, li ti pou montré l’orgueil! Au contraire, Jésus ti reponn dan enn fason clair ek direct: “Finn dire: ‘Fodé pa to testé Jéhovah to Bondié.’”​—Lire Luc 4:9-12.

13, 14. Expliké couma Satan servi certain piege zordi.

¹³ Zordi, Satan servi mem piege ki li ti servi avek Ève ek Jésus. Li servi “desir la chair” pou tente bann dimoune pou faire bann kitsoz immoral ek pou mangé ek boire plis ki bizin. Li servi “desir lizié” pou attire l’attention enn dimoune ki pa prudent ek faire li guette pornographie, surtout lor Internet. Bann dimoune ki ena l’orgueil ek ki ena tendance pou faire ‘l’etalage ar seki zot moyen permette zot ena,’ kapav tombe dan piege materialisme, ek ena desir pou gagne pouvoir ek la gloire.

¹⁴ “Bann kitsoz ki ena dan le monde,” zot couma bann la bouette ki enn pecheur servi. Zot bien attirant, mais dan chaque la bouette ena enn lamson. Satan servi bann kitsoz ki dimoune considere couma normal ek necessaire, pou faire zot envie faire bann kitsoz ki kont la loi Bondié. Mais, sa bann piege bien sournois-la finn faire pou influence nou ek pou mette bann mauvais desir dan nou leker. Sa bann piege-la faire nou croire ki seki nou bizin personnellement ek nou confort, passe avant volonté Bondié. Eski nou pou tombe dan sa bann piege-la?

15. Couma nou kapav imite Jésus ek pa tombe dan bann piege Satan?

¹⁵ Ève ti tombe dan bann piege Satan,  mais pa Jésus. Chaque fois ki Satan ti tente li, Jésus ti donne enn reponse ki ti sorti dan bann l’Ecriture. Li ti dire: “Finn ecrire” ou-soit “Finn dire.” Si nou bann bon etudiant la Bible, nou pou bien konn la Bible ek nou pou rappel bann verset ki pou kapav aide nou kan nou tenté. (Ps. 1:1, 2) Si nou rappel l’exemple bann serviteur ki’nn reste fidele ar Bondié, sa pou aide nou pou imite zot. (Rom. 15:4) Si nou ena enn grand respé pou Jéhovah, setadir nou content seki Li content ek nou detesté seki Li detesté, sa pou protege nou.​—Ps. 97:10.

16, 17. Ki l’effet nou “capacité pou raisonné” kapav ena lor seki nou été?

¹⁶ L’apotre Paul encourage nou pou servi nou “capacité pou raisonné” pou vinn bann dimoune ki pense pareil couma Jéhovah, pa couma le monde. (Rom. 12:1, 2) Li ti mette l’accent lor l’importance pou controle nou bann pensée. Li ti dire: “Nou pé detruire bann raisonnement ek tou kitsoz ki dresse-li avek l’orgueil kont connaissance Bondié; ek nou pé faire tou pensée vinn prisonnier pou amenn li obeir Christ.” (2 Cor. 10:5) Nou bann pensée ena enn grand l’influence lor seki nou été, alors, nou bizin touletan “contigne prend bien compte” bann kitsoz ki faire Bondié plaisir.​—Phil. 4:8.

¹⁷ Nou pa kapav attann pou vinn bann dimoune ki saint si nou ena bann mauvais pensée ek bann mauvais desir. Nou bizin content Jéhovah avek “enn leker pur.” (1 Tim. 1:5) Mais nou leker traitre, ek kitfois nou pa mem realisé ki quantité “bann kitsoz ki ena dan le monde” pé influence nou. (Jér. 17:9) Alors, li important ki nou suive conseil Paul: “Contigne testé-zot-mem pou guetté si zot dan la foi, ek contigne examiné seki zot-mem zot été.” A mesure ki nou etudié la Bible, nou bizin examine-nou-mem ek demann-nou: ‘Eski mo bann pensée ek mo bann desir faire Bondié plaisir?’​—2 Cor. 13:5.

18, 19. Kifer nou bizin faire tou seki nou kapav pou vinn couma Jéhovah envie nou vini?

¹⁸ Enn lot kitsoz ki kapav aide nou pou resisté kont “bann kitsoz ki ena dan le monde” c’est kan nou rappel seki Jean ti dire: “Le monde pé al fini ek so desir aussi, mais enn dimoune ki faire volonté Bondié, pou reste pou toujours.” (1 Jean 2:17) Le monde Satan parette coumadir li pou dure pou touletan. Selman, enn jour li pou disparette. Tou seki le monde Satan kapav offert nou, pou disparette. Si nou rappel sa, sa pou empeche nou tombe dan bann piege Satan.

¹⁹ L’apotre Pierre ti encourage nou pou vinn bann dimoune ki gagne faveur Bondié, pendant ki nou “pé attann ek pé garde presence jour Jéhovah touletan dan [nou] l’esprit. Sa jour-la, le ciel ki pé brulé pou disparette ek bann element ki’nn vinn bien chaud pou fonn!” (2 Pierre 3:12) Sa jour-la pré pou arrivé, ek Jéhovah pou detruire tou bann partie le monde Satan. Mais tant ki sa pankor arrivé, Satan pou contigne servi “bann kitsoz ki ena dan le monde” pou tente nou, pareil couma li ti tente Ève ek Jésus. Fodé pa nou ressemblé Ève ek rod satisfaire nou prop desir. Si nou faire sa, coumadir nou pé faire Satan vinn nou bondié. Nou bizin ressemblé Jésus ek resisté ar sa bann tentation-la mem si Satan faire zot parette extra attirant. Anou faire tou seki nou kapav pou ki sakenn parmi nou vinn couma Jéhovah envie nou vini.