1, 2. (a) Ki arrivé kan nou pense enn dimoune ki nou content ek kan nou koz lor li? (Guette zimage dan commencement lartik.) (b) Ki bann question nou pou examiné?

 KAN nou pense enn dimoune ki nou content ek kan nou koz lor li, nou l’amitié avek li vinn pli fort. Li pareil aussi concernant nou l’amitié avek Jéhovah. David, ki ti enn berger, ti passe beaucoup la nuit pou admire bann zetoile ek pou medite lor zot grand Createur. Li ti ecrire: “Kan mo guette le ciel ek bann travail ki to finn faire avek to la main, la lune ek bann zetoile ki to finn preparé, ki été enn dimoune mortel, pou ki to pense li, ek ki été dimoune ki’nn faire ar la poussiere, pou ki to prend li compte?” (Ps. 8:3, 4) Kan l’apotre Paul ti ecrire lor fason extraordinaire ki Jéhovah ti pé realise so projet pou bann Chretien oint, li ti dire: “Ah, bann benediction Bondié, zot grand, so sagesse ek so connaissance, zot bien profond!”​—Rom. 11:17-26, 33.

² Kan nou participe dan nou ministere, nou pense Jéhovah ek nou koz lor Li avek bann dimoune. Sa faire nou bann relation avek Li vinn pli fort. Beaucoup pionnier finn trouvé ki zot lamour pou Bondié finn vinn pli fort parski zot passe plis le temps dan zot ministere. Si ou enn pionnier ou-soit si ou pé faire zeffort pou vinn enn pionnier, examine sa bann question-la: ‘Couma service pionnier kapav fortifié mo bann relation avek Jéhovah?’ Si ou enn pionnier, demann-ou-mem: ‘Ki pou aide moi garde sa grand privilege-la?’ Si ou pankor vinn enn pionnier, demann-ou-mem: ‘Ki changement mo kapav faire pou commence service pionnier?’ Anou guetté couma service pionnier kapav fortifié nou bann relation avek Bondié.

3. Kan nou koz lor bann benediction ki Royaume Bondié pou amené, ki l’effet sa ena lor nou?

³ Kan nou koz lor bann benediction ki Royaume Bondié  pou amené, sa faire nou vinn pli proche ar Jéhovah. Ki verset ou pli content servi kan ou al preché? Kitfois ou content servi Psaume 37:10, 11; Daniel 2:44; Jean 5:28, 29; ou-soit Révélation 21:3, 4. Chaque fois ki nou koz lor sa bann promesse-la avek lezot, sa rappel nou ki nou Bondié Li genereux ek Li donne “tou joli don ek tou cadeau parfait.” Sa faire nou vinn pli proche ar Li.​—Jacq. 1:17.

4. Kifer sa faire nou ena plis reconnaissance pou bonté Bondié kan nou trouve condition spirituel bann dimoune?

⁴ Kan nou trouvé couma la plupart dimoune malheureux ek pa gagne l’aide lor plan spirituel, sa faire nou reconnaissance pou la verité augmenté. Bann dimoune dan le monde pa gagne l’aide ki zot bizin pou reussi dan zot lavi ek pou konn vrai bonheur. La plupart tracassé pou zot lavenir ek zot pena okenn l’espoir. Zot envie koné kifer zot existé. Mem bann dimoune ki pratik zot religion a fond pa konn beaucoup kitsoz lor la Bible. Zot bien ressemblé bann dimoune ki ti reste dan ancien lavil Ninive. (Lire Yona 4:11.) Plis nou passe le temps dan predication, plis nou trouve difference ki ena entre condition spirituel bann serviteur Jéhovah ek bann dimoune ar ki nou preché. (Is. 65:13) Sa faire nou rappel ki Jéhovah Li bon. Li pa prend soin zis so bann serviteur lor plan spirituel mais Li invite aussi tou dimoune pou gagne enn reconfort ek enn vrai l’esperance.​—Rév. 22:17.

5. Couma nou considere nou bann probleme kan nou enseigne lezot la verité?

⁵ Kan nou enseigne lezot la verité, nou aprann pou pa laisse nou bann probleme accablé nou plis ki bizin. Trisha, enn pionnier permanent, dire ki li ti bien affecté kan so bann parent ti divorcé. Li raconté: “C’est enn parmi bann l’evenement pli triste ki’nn arrivé dan mo lavi.” Enn jour, li ti senti-li bien triste ek li pa ti trop envie al preché. Mais kan-mem li ti al faire enn letid. Li ti faire letid avek trois zenfant. Zot situation dan lakaz pa ti fasil ditou. Zot papa ti quitte lakaz, ek zot pli grand frere ti faire dominere ar zot. Trisha dire: “Mo bann probleme ek mo la peine ti enn nanyé ditou comparé ar seki zot ti pé traversé. Pendant letid, ti ena la joie lor zot figure ek zot ti vrai-mem bien content. Sa bann zenfant-la ti couma enn cadeau ki Jéhovah ti donne moi, surtout sa jour-la.”

6, 7. (a) Couma nou la foi vinn pli fort kan nou enseigne bann verité ki ena dan la Bible? (b) Kan nou trouve nou bann letid ameliore zot lavi kan zot mette en pratik bann principe Biblik, ki l’effet sa ena lor nou?

⁶ Kan nou enseigne bann verité ki ena dan la Bible ar lezot, nou la foi vinn pli fort. L’apotre Paul ti ecrire ki certain Juif dan so lepok pa ti faire seki zot ti enseigne lezot. Li ti dire: “Toi ki enseigne enn lot dimoune, eski to pa enseigne to-mem?” (Rom. 2:21) Mais bann pionnier bien diferan! En general, zot ena beaucoup l’occasion pou enseigne la Bible ek pou faire bann letid Biblik. Pou zot faire sa bien, d’abord zot bizin prepare-zot-mem avant chaque letid ek kitfois faire bann recherche pou reponn bann question. Enn pionnier ki appel Janeen dire: “Chaque fois ki mo enseigne lezot la verité, mo senti ki sa bann verité-la rente bien dan mo l’esprit ek dan mo leker. Lerla, mo la foi pa reste pareil, mais li contigne grandi.”

⁷ Kan nou trouvé couma nou bann letid pé ameliore zot lavi kan zot mette en pratik bann principe la Bible, nou apprecié sagesse Bondié ankor plis. (Is. 48:17, 18) Sa faire nou aussi envie contigne applik sa bann principe-la dan nou prop lavi. Adrianna, enn lot pionnier, dire: “Kan bann dimoune compte lor zot prop sagesse, zot lavi kapav devire enba-la-haut. Mais kan zot commence compte lor sagesse Jéhovah, zot gagne bann bienfait desuite.” Phil aussi dire pareil: “Ou trouvé couma Jéhovah kapav change lavi bann dimoune  ki pa’nn kapav reussi changé par zot-mem.”

8. Kan nou dan ministere avek nou bann frere ek soeur, couma sa aide nou?

⁸ Nou gagne l’encouragement kan nou travail ensam avek nou bann frere ek soeur dan nou ministere. (Prov. 13:20) La plupart pionnier passe beaucoup le temps avek bann frere ek soeur dan zot ministere. Sa donne zot plis l’occasion pou ena “enn l’echange l’encouragement.” (Rom. 1:12; lire Proverbes 27:17.) Enn pionnier ki appel Lisa dire: “Dan travail, souvent bann dimoune jaloux zot camarade ek zot en competition entre zot. Toulé-jour ou tann zot faire palab ek servi enn langage vulgaire. Zot pré pou faire tou pou passe lor la tête zot camarade. Parfois zot sikann ou parski ou ena enn conduite ki Bondié approuvé. Mais kan mo dan predication avek mo bann frere ek soeur, sa vrai-mem encourage moi. A lafin mo la journée, fatigué couma mo fatigué, mo rente lakaz avek la joie.”

9. Ki bienfait nou gagné dan nou mariage kan nou conjoint aussi faire service pionnier ensam avek nou?

⁹ Kan nou conjoint faire service pionnier ensam avek nou, sa faire nou mariage vinn pli solide. (Eccl. 4:12) Madeline, ki faire pionnier avek so mari, dire: “Mo mari ek moi, nou kapav passe le temps pou koz lor nou la journée predication ou-soit lor enn kitsoz ki nou finn lire dan la Bible ki nou kapav mette en pratik dan nou ministere. Chaque l’année ki nou faire pionnier ensam, sa faire nou vinn pli proche.” Trisha aussi dire pareil: “Toulé-deux nou d’accord pou pa faire bann dette, alors nou pa laguerre a cause l’argent. Nou ena mem programme predication ki permette nou al faire bann visite ek bann letid ensam, ek sa aide nou lor plan affectif ek spirituel.”

10. Kan nou mette Royaume Bondié en premier dan nou lavi ek nou trouvé ki Jéhovah soutenir nou, ki l’effet sa ena lor nou confiance en Jéhovah?

 ¹⁰ Nou confiance en Jéhovah augmenté kan nou mette so Royaume en premier dan nou lavi, kan nou trouvé ki Li soutenir nou ek kan Li reponn nou bann la priere. Li vrai ki en general, tou bann Chretien ki fidele ena confiance en Jéhovah. Mais bann pionnier trouvé ki c’est zis kan zot compte lor Jéhovah ki zot kapav contigne faire pionnier. (Lire Matthieu 6:30-34.) Curt, enn pionnier ki parfois remplace surveillant circonscription, ti accepté pou visite enn congregation. Li ti pou prend deux heure temps et demi pou arrive laba. Li ek so madame, ki ti aussi enn pionnier, ti ena l’essence dan zot l’auto zis pou al laba, mais pa pou retourné. Ek Curt ti pou gagne so la paye dan enn semaine. Curt dire: “Mo ti demann moi si mo ti’nn prend enn bon decision pou accepté al visite sa congregation-la.” Zot ti prié ek zot ti decidé pou al visite sa congregation-la, zot ti ena confiance ki Bondié pa ti pou abandonne zot. Zis avant zot ti quitte lakaz, enn soeur ti appel zot ek ti dire zot ki li ti ena enn cadeau pou zot. Li ti donne zot exactement kass ki zot ti bizin pou l’essence. Curt dire: “Kan plusieurs fois ou faire bann l’experience coumsa, li fasil pou trouve la main Jéhovah.”

11. Cite certain parmi bann benediction ki bann pionnier gagné.

¹¹ Oui, souvent bann pionnier dire ki plis zot faire zeffort dan zot ministere ek plis zot vinn proche ar Bondié, sa faire zot gagne beaucoup benediction. (Deut. 28:2) Kan-mem, lavi pionnier li pa toujours fasil. Nou tou nou souffert a cause nou l’imperfection ek parski nou pé vive dan enn mauvais le monde. Parfois, certain pionnier finn bizin arrete zot service pendant enn certain temps. Mais souvent li possible pou releve bann defi ek bann difficulté ki zot gagné. Ki kitsoz kapav aide bann pionnier pou contigne zot service?

12, 13. (a) Ki enn pionnier bizin faire si li ena difficulté pou gagne so ler? (b) Kifer li bien important ki enn pionnier reserve le temps pou lire la Bible toulé-jour, pou faire letid personnel ek pou medité?

¹² En general, bann pionnier bien occupé. Li kapav bien difisil pou faire tou seki zot ena pou faire, alors zot bizin bien organisé. (1 Cor. 14:33, 40) Si enn pionnier ena difficulté pou gagne so ler, kitfois li bizin bien reflechi couma li pé servi so le temps. (Éph. 5:15, 16) Kitfois li kapav demann-li-mem: ‘Eski mo pé passe trop beaucoup le temps dan bann divertissement? Eski mo passe beaucoup le temps pou faire bann kitsoz inutile? Si mo travail, eski mo kapav change mo programme?’ Bann pionnier bizin pose-zot-mem sa bann question-la regulierement ek faire bann changement si bizin. Kifer? Parski en tant ki Chretien, nou reconette ki li trop fasil pou ajoute bann lezot kitsoz lor nou programme.

¹³ Enn pionnier bizin reserve le temps pou lire la Bible toulé-jour, pou faire so letid personnel ek pou medité. Li bizin faire sur ki bann kitsoz ki pa important, pa prend le temps ki li finn reservé pou faire sa bann activité spirituel-la. (Phil. 1:10) Par exemple, mazinn enn pionnier ki’nn faire enn longue journée dan predication. Li decide pou passe so la soirée pou prepare so reunion. Mais avant, li lire bann lettre ki li finn gagné. Apré, li allume so computer pou lire ek pou reponn bann e-mail. Pendant ki li lor Internet, li profité pou guette prix enn kitsoz ki li envie acheté. Avant ki li rann-li compte, preské deux heure temps inn passé ek li pankor mem commence prepare so reunion. Kot probleme-la été? Si  enn athlete professionnel envie faire enn grand carriere, li bizin mange enn mangé equilibré regulierement. Li pareil aussi pou enn pionnier, li bizin ena enn letid personnel regulier pou contigne so service.​—1 Tim. 4:16.

14, 15. (a) Kifer bann pionnier bizin amenn enn lavi simple? (b) Si enn pionnier pé gagne bann difficulté, ki li bizin faire?

¹⁴ Bann pionnier ki reussi dan zot service faire tou zot possible pou amenn enn lavi simple. Jésus ti encourage so bann disciple pou ena enn lizié simple. (Mat. 6:22) Li ti ena enn lavi simple pou li kapav reste concentré lor so ministere. Li ti dire: “Bann renard ena zot place kot zot resté ek bann zoiseau dan le ciel ena zot nik, mais Fils de l’homme pena okenn place pou pose so la tête.” (Mat. 8:20) Bann pionnier ki envie imite l’exemple Jésus bizin rappel ki plis zot ena kitsoz, plis zot bizin prend soin, repare ou-soit remplace sa bann kitsoz-la.

¹⁵ Bann pionnier conscient ki zot ena enn grand privilege pou servi couma pionnier, mais zot pa pensé ki zot pli bon ki lezot. Au contraire, n’importe ki talent nou ena ou-soit privilege ki nou kapav gagné, c’est grace a faveur Jéhovah, faveur ki personne pa merité. Alors, pou contigné dan sa service-la, chaque pionnier bizin compte lor Jéhovah. (Phil. 4:13) Nou bizin attann ki pou ena bann difficulté. (Ps. 34:19) Mais kan sa arrivé, bann pionnier bizin demann Jéhovah so direction ek donne Li l’occasion pou aide zot au lieu ki zot pressé pou arrete zot service. (Lire Psaume 37:5.) Kan zot trouve Jéhovah prend zot soin avek amour, zot vinn pli proche ar Li.​—Is. 41:10.

16. Si ou envie vinn enn pionnier, ki ou bizin faire?

¹⁶ Si ou ti pou content gagne bann benediction pareil couma bann pionnier, koz sa ar Jéhovah dan la priere. (1 Jean 5:14, 15) Koz avek bann ki deja dan sa service-la. Fixé bann l’objectif ki, tigit par tigit pou aide ou vinn enn pionnier. C’est seki Keith ek Erika ti faire. Zot ti travail a plein temps, ek pareil couma beaucoup couple dan zot l’age, zot ti acheté enn lakaz ek enn nouveau l’auto apré zot mariage. Zot dire: “Nou ti pensé ki sa bann kitsoz-la ti pou faire nou heureux, mais jamais sa pa’nn arrivé.” Apré ki Keith ti perdi so travail, li ti commence faire pionnier auxiliaire. Li raconté: “Service pionnier ti rappel moi ki quantité la joie nou gagné kan nou dan service.” Zot ti faire camarade avek enn couple pionnier ki ti aide zot pou comprend couma service pionnier ek enn lavi simple faire gagne beaucoup la joie. Ki Keith ek Erika ti faire? “Nou ti faire enn la liste bann l’objectif spirituel ki nou ti ena. Nou ti colle sa lor nou frigidaire ek chaque fois ki nou reussi realise nou l’objectif, nou ti coupe li lor nou la liste.” Avek le temps Keith ek Erika inn reussi faire pionnier.

17. Kifer li bon ki ou reflechi si ou kapav faire bann changement pou prend service pionnier?

¹⁷ Eski ou kapav prend service pionnier? Si ou pensé ki ou pa kapav prend service pionnier asterla, faire tou ou possible pou vinn pli proche ar Jéhovah. Ou pou reussi faire sa kan ou faire ou maximum dan ministere. Si ou prié Jéhovah ek ou reflechi lor ou situation, kitfois ou pou realisé ki si ou faire certain changement dan ou lavi, ou pou kapav faire pionnier. Si ou commence faire pionnier, ou la joie pou pli grand comparé ar tou bann sacrifice ki ou pou faire. Ou pou heureux parski ou pé mette Royaume Bondié en premier dan ou lavi ek ou pé faire plis pou lezot. (Mat. 6:33) Ou pou gagne plis l’occasion pou pense Jéhovah ek pou koz lor Li, ek sa pou faire ou lamour pou Li vinn pli fort ek ou pou faire Li plaisir.