1. Ki nou bizin faire pou ki nou la foi reste solide?

 BEAUCOUP dimoune dire ki zot croire zis dan bann kitsoz ki zot kapav trouvé avek zot lizié. Couma nou kapav aide sa bann dimoune-la pou ena la foi en Jéhovah? Apré tou, la Bible dire ki “okenn zom jamais pa finn trouve Bondié.” (Jean 1:18) Ki nou kapav faire pou ki nou prop la foi en Jéhovah, nou “Bondié ki invisible,” reste solide? (Col. 1:15) D’abord, nou bizin koné ki bann l’enseignement ki empeche nou pou konn la verité lor Jéhovah. Apré, nou bizin aprann pou bien servi la Bible pou renverse bann l’enseignement ki “kont connaissance Bondié.”​—2 Cor. 10:4, 5.

2, 3. Ki deux l’enseignement ki empeche bann dimoune konn la verité lor Bondié?

² Enn l’enseignement bien populaire ki empeche bann dimoune pou konn la verité lor Bondié c’est doctrine l’evolution. Sa l’enseignement humain-la pa en accord avek seki’nn ecrire dan la Bible ek li empeche bann dimoune pou ena enn l’esperance. Dapré l’evolution, lavi inn commence existé enn sel coup; si nou croire sa, nou pa pou kapav expliké kifer nou lor later.

³ Certain dimoune dan bann religion Chretien enseigné ki l’univers, parmi ena later ek tou lavi ki ena lor later, inn commence existé ena zis deux-trois millier l’année. Bann ki enseigne sa doctrine-la kitfois ena enn grand respé pou la Bible, mais zot dire ki Bondié inn crée tou kitsoz dan six jour 24 heure. Appel sa l’enseignement-la, créationnisme. Zot rejette tou bann preuve scientifik ki pa en accord avek zot croyance. Bann ki enseigne créationnisme faire bann dimoune pena confiance dan la Bible, zot faire la Bible parette deraisonnable ek pa exact. Bann dimoune ki favorise sa l’enseignement-la faire nou pense bann dimoune dan premier siecle ki ti ena zele pou Bondié, “mais pa dapré connaissance exact.” (Rom. 10:2) Couma nou kapav servi Parole Bondié pou renverse bann doctrine “ki’nn  bien enraciné” couma l’evolution ek créationnisme? a Nou kapav faire sa, a condition ki nou-mem personnellement nou travail dur pou gagne enn connaissance exact lor seki la Bible enseigné.

4. Lor ki kitsoz nou la foi bizin basé?

⁴ La Bible enseigne nou ki la connaissance bizin ena enn grand valeur pou nou. (Prov. 10:14) Jéhovah envie ki nou la foi basé lor bann preuve ek lor enn bon raisonnement, pa lor bann philosophie ki bann dimoune inventé ou-soit bann tradition religieux. (Lire Hébreux 11:1.) Pou nou kapav ena enn la foi solide en Bondié, d’abord nou bizin sur ki Jéhovah existé. (Lire Hébreux 11:6.) Nou croire ki Jéhovah existé, pa parski sa faire nou plaisir, mais parski nou finn examine bann preuve ek nou finn servi nou “capacité pou raisonné.”​—Rom. 12:1.

5. Cite enn raison kifer nou kapav sur ki Bondié existé.

⁵ L’apotre Paul donne nou enn raison kifer nou kapav sur ki Bondié existé, mem si nou pa kapav trouve Li. Concernant Jéhovah, l’apotre Paul ti ecrire: “Nou trouve so bann qualité invisible dan enn fason clair depuis creation le monde; parski nou kapav trouve zot a travers bann kitsoz ki Li’nn faire, mem so puissance eternel ek so nature en tant ki Bondié; coumsa bann ki pa croire Bondié pena okenn excuse.” (Rom. 1:20) Couma ou kapav aide enn kikenn ki ena bann doute lor l’existence Bondié, pou croire dan seki Paul finn ecrire? Ou kapav servi certain l’exemple ki ena dan creation ki montré puissance ek sagesse Bondié. Nou pou examine sa bann l’exemple-la asterla.

6, 7. Couma nou trouve puissance Jéhovah dan deux bouclier ki protege nou?

⁶ Nou trouve puissance Jéhovah dan deux kitsoz ki protege nou couma bann bouclier​—l’atmosphere ek champ magnétique ki ena tout autour later. Par exemple, l’atmosphere pa zis donne nou l’air pou nou respiré, mais li aussi protege nou kont bann roche ki traversé dan l’espace. Si sa bann roche-la tombe lor later, zot kapav faire bann grand degat. Mais kan zot traverse l’atmosphere, zot brulé, ek zot vinn bann joli zetoile filante ki nou trouvé a-soir dan le ciel.

⁷ Champ magnétique ki ena autour later aussi protege nou. Dan centre later, ena enn noyau ek autour sa noyau-la ena bann metal ki pé bouilli. Sa crée enn champ magnétique bien fort ki enveloppe later ek li al bien loin dan l’espace. Sa bouclier-la protege nou kont bann rayon soleil dangereux ek bann explosion ki ena dan soleil. Grace a sa champ magnétique-la, sa bann rayon dangereux-la pa brule lavi lor later. Au contraire, li absorbe sa bann rayon-la ek li renvoye zot dan l’espace. Nou kapav trouve bien couma sa champ magnétique-la travail kan ena bann la lumiere plusieurs couleur dan le ciel a-soir dan pole Nord ek pole Sud. Oui, nou kapav dire ki Jéhovah Li vrai-mem “puissant par la force.”​—Lire Isaïe 40:26.

8, 9. Couma nou trouve sagesse Jéhovah dan bann cycle ki permette lavi contigné?

⁸ Nou trouve sagesse Jéhovah dan bann cycle ki permette lavi contigné lor later. Anou prend enn l’exemple: Faire coumadir plusieurs million dimoune vive dan enn lavil ki entouré par enn muraille. Pena okenn de l’eau prop ki rente dan sa lavil-la ek li pa kapav debarrasse bann saleté.  Bien vite lavil-la pou vinn bien sale ek li pa pou possible pou vive ladan. Dan enn certain fason, later ressemblé sa lavil-la. Ena zis enn certaine quantité de l’eau lor later ek nou pa kapav debarrasse bann saleté dan l’espace. Pourtant, mem si ena plusieurs milliard lavi lor later, zot tou gagne seki zot bizin pou vive, generation apré generation. Si sa possible, c’est parski dan enn fason extraordinaire, later recyclé ou-soit ré-servi bann kitsoz important pou ki lavi contigné.

⁹ Prend par exemple cycle l’oxygène. Plusieurs milliard creature respire l’oxygène ek rejette enn gaz ki appel dioxyde carbone. Malgré sa, jamais pa mank l’oxygène dan l’atmosphere ek jamais l’atmosphere trop rempli ar dioxyde carbone. Kifer? Parski ena photosynthèse. Ki été sa? C’est kan bann plante vert servi dioxyde carbone, de l’eau, la lumiere soleil, ek lezot substance pou produire hydrate carbone ek l’oxygène. Kan nou respire l’oxygène nou complete sa cycle-la. Jéhovah servi bann plante ki Li’nn crée pou donne “tou dimoune lavi ek souffle.” (Actes 17:25) Li ena vrai-mem enn grand sagesse, pa vrai?

10, 11. Couma papillon monarque ek laskar dilo montré sagesse Jéhovah?

¹⁰ Nou trouve aussi sagesse Jéhovah kan nou considere sa quantité zanimo ki Li’nn crée lor later-la. Bann recherche finn montré ki ena apepré 2 million a 100 million varieté zanimo. (Lire Psaume 104:24.) Nou trouve sagesse Jéhovah dan fason ki Li’nn crée certain parmi sa bann zanimo-la.

¹¹ Par exemple, enn varieté papillon ki appel monarque ena enn cerveau ki mem grosseur ar pointe enn plume. Pourtant sa papillon-la kapav envole enn distance apepre 3,000 kilometre; li sorti Canada pou al dan enn la foret dan Mexique. Li servi soleil pou dirige li. Couma li faire sa a mesure ki soleil change position dan le ciel? Jéhovah inn crée so ti cerveau avek capacité pou li adapté-li ar mouvement soleil. Anou prend aussi l’exemple lizié enn insecte ki beaucoup dimoune appel laskar dilo (libellule). Dan chaque lizié sa insecte-la ena apepré 30,000 lentille, ki capté bann zimage. Mem si so cerveau tipti, li kapav comprend bann signal ki li gagné ar tou sa bann lentille-la ek li remark ziska pli tipti mouvement ki ena autour li.

12, 13. Ki impressionne ou dan fason ki Jéhovah finn crée bann cellule ki ena dan nou lekor?

¹² Fason ki Jéhovah inn crée bann cellule dan bann creature ki vivant, li vrai-mem extraordinaire. Par exemple, dan nou lekor ena apepré 100 mille milliard cellule. Dan chaque cellule ena enn substance ki appel ADN (acide désoxyribonucléique). Dan l’ADN ena la plupart renseignement necessaire pou forme ou lekor en entier.

¹³ Ki quantité renseignement ena dan l’ADN? Nou kapav compare renseignement ki ena dan enn gramme l’ADN ar  renseignement ki ena lor enn CD. Tou bann l’information ki ena dan enn dictionnaire kapav rente lor enn CD. C’est enn kitsoz extraordinaire kan nou pensé ki enn CD c’est enn disque en plastik bien mince! Pourtant, zis enn gramme l’ADN kapav garde mem quantité renseignement ki ena lor mille milliard CD! Nou kapav explik sa dan enn lot fason aussi: zis enn ti cuillere l’ADN ki’nn sec kapav garde assez renseignement pou crée 350 fois quantité dimoune ki ena lor later zordi!

14. Ki sentiment ou ena pou Jéhovah kan ou examine bann decouverte ki bann scientifik inn faire?

¹⁴ Le Roi David ti dire ki coumadir Jéhovah inn ecrire dan enn livre tou bann renseignement ki bizin pou faire lekor enn dimoune. Concernant Jéhovah, li ti dire: “To lizié ti trouve moi kan mo ti fek formé, ek tou mo bann partie ti ecrire dan to livre kan zot ti formé, ek kan okenn parmi zot pa ti ankor existé.” (Ps. 139:16) Nou kapav comprend kifer David ti envie loué Jéhovah kan li ti reflechi lor fason ki so prop lekor ti crée. Seki bann scientifik finn decouvert lor lekor humain sa bann dernier l’année-la, faire nou ena ankor plis l’admiration pou Jéhovah. Nou d’accord avek seki David ti ecrire lor Jéhovah: “Mo pou loué toi parski to finn faire moi dan enn fason extraordinaire ki faire gagne la crainte. Tou seki to faire, li extraordinaire, ek mo nâme konn sa bien.” (Ps. 139:14) Couma bann dimoune kapav dire ki Bondié pa existé kan zot trouve tou seki ena dan creation?

15, 16. (a) Couma nou bann publication finn aide bann dimoune pou apprecié creation Jéhovah? (b) Cite enn lartik dan “ Hasard ou Conception ? ” ki finn bien impressionne ou.

¹⁵ Pendant plusieurs dizaine l’année, Réveillez-vous ! finn aide plusieurs million dimoune pou aprann konn nou Bondié Tout-Puissant a travers bann kitsoz ki Li’nn crée. Par exemple, titre Réveillez-vous ! Septembre 2006: “ Y a-t-il un Créateur ? ” ti ena l’objectif pou ouvert lizié bann dimoune ki finn laisse-zot aveuglé par doctrine l’evolution ek créationnisme. Concernant sa numero special-la, enn soeur ti ecrire filiale l’Amérique ek li ti dire: “Campagne ki nou finn faire pou sa numero special-la inn bien marché. Enn madame inn demann 20 periodik. Li enn professeur biologie ek li ti envie ki so bann zeleve gagne sakenn enn copie.” Enn frere ti ecrire: “Depuis lafin 1940 mo bien actif dan predication ek mo pré pou gagne 75 an, mais jamais mo finn apprecié predication couma sa mois ki mo finn offert sa numero special Réveillez-vous !-la.”

¹⁶ Depuis 2008, dan la plupart numero Réveillez-vous ! ena enn lartik ki appel “ Hasard ou Conception ? ” Sa bann ti lartik-la montré ki quantité bann kitsoz ki ena dan creation, zot extraordinaire ek couma bann zom finn essaye copié seki nou Grand Architecte finn faire. En 2010, nou ti gagne aussi brochure La vie a-t-elle été créée ? ki aide nou pou donne la gloire nou Bondié. Bann joli zimage ek bann l’encadré ki ena ladan aide nou pou ena ankor plis reconnaissance pou Jéhovah ki’nn crée tou kitsoz. Bann question a lafin chaque partie aide enn lecteur pou raisonne lor bann renseignement ki li fek examiné. Eski sa finn faire ou plaisir pou servi sa brochure-la dan predication porte-en-porte ou-soit dan temoignage informel?

17, 18. (a) Parent, couma ou kapav aide ou bann zenfant pou ena plis l’assurance kan zot defann zot la foi? (b) Couma ou finn servi sa deux brochure-la dan ou l’adoration en famille?

¹⁷ Parent, eski ou finn examine sa brochure-la avek ou bann zenfant dan ou l’adoration en famille? Si ou faire sa, ou pou aide zot pou ena plis la foi en Jéhovah, nou Bondié Tout-Puissant. Kitfois ou ena  bann adolescent ki pé al college. Bann ki enseigne doctrine l’evolution faire tou seki zot kapav pou convaink ou bann zenfant ki pena enn Createur. Bann scientifik, bann professeur, bann documentaire lor la nature, ek mem bann film, enseigné ki l’evolution inn arrivé vrai-mem. Ou kapav aide ou bann adolescent pou defann la verité kan ou servi enn lot brochure, Cinq questions à se poser sur l’origine de la vie, ki ti parette aussi en 2010. Pareil couma brochure La vie a-t-elle été créée ? sa publication-la encourage bann jeune pou developpe zot “capacité pou reflechi.” (Prov. 2:10, 11) Li enseigne zot couma zot kapav koné si seki enseigne zot dan lekol, li logik.

¹⁸ Parfois bann reportage pretann ki bann scientifik finn decouvert bann fossile ki prouvé ki doctrine l’evolution inn arrivé vrai-mem. Ou-soit, kitfois ena bann rapport ki dire ki bann scientifik inn reussi ré-crée lavi dan zot laboratoire. Alors, brochure Origine de la vie, inn faire pou aide bann etudiant jugé par zot-mem si sa bann rapport-la vrai. Parent, si ou servi sa deux brochure-la, ou kapav aide ou bann zenfant pou ena plis l’assurance kan zot expliké kifer zot croire dan enn Createur.​—Lire 1 Pierre 3:15.

19. Ki privilege nou tou nou ena?

¹⁹ Nou kapav aprann beaucoup kitsoz lor bann qualité Jéhovah dan so creation kan nou lire bann publication ki so l’organisation donne nou. Tou sa bann preuve-la pousse nou pou loué Jéhovah avek tou nou leker. (Ps. 19:1, 2) C’est enn grand privilege pou donne Jéhovah, Createur tou kitsoz, l’honneur ek la gloire ki Li vrai-mem bien merité!​—1 Tim. 1:17.