MO PAPA ek mo mama ti zwenn en 1919, dan enn l’assemblée bann Étudiants internationaux de la Bible ki ti faire dan Cedar Point, Ohio, en Amérique. Zot ti marié inpé plitar dan mem l’année. Mo ti né en 1922, ek mo frere Paul, ti né deux an apré. Mo madame ki appel Grace, ti né en 1930. So bann parent, Roy ek Ruth Howell, ti bann Etudiant la Bible depuis tipti, ek so bann grand-parent ti aussi bann Etudiant la Bible ek zot ti bann camarade Frere Charles Russell.

Mo ti zwenn Grace en 1947, ek nou ti marié le 16 Juillet 1949. Avant nou mariage, nou ti gagne enn conversation bien franc lor nou lavenir. Nou ti prend decision pou faire service a plein temps, ek pou pa gagne zenfant. Le 1^er Octobre 1950, nou ti commence service pionnier ensam. Apré, en 1952, ti demann nou pou faire circonscription.

Nou toulé-deux, nou ti rann-nou compte ki nou ti bizin l’aide pou reussi dan sa nouveau service-la. Mo finn aprann beaucoup ar bann frere ki ena bien l’experience, ek mo ti envie ki Grace aussi gagne enn bon formation. Mo ti al koz ar Marvin Holien, enn camarade ki konn nou famille depuis longtemps, ek ki ti ena beaucoup l’experience en tant ki surveillant. Mo ti demann li: “Grace ankor jeune ek li mank l’experience. Eski to kapav dire moi avek kisannla li kapav travail pou gagne enn formation?” Li ti reponn moi: “Oui. Edna Winkle, enn pionnier ki ena bien l’experience, kapav aide li beaucoup.” Plitar, Grace ti dire lor Edna: “Li ti faire moi senti-moi a l’aise devant laport bann dimoune, li ti bien koné couma pou reponn bann objection, ek li ti montré moi couma pou ecoute bann dimoune pou mo kapav koné ki pou dire zot. Li ti vrai-mem sa dimoune ki mo ti bizin-la!”

Grace ek moi, nou ti servi dan deux circonscription dan l’etat Iowa. Dan nou circonscription ti ena enn partie l’etat Minnesota ek Dakota du Sud. Apré, ti demann nou pou visite Circonscription New York 1, kot ti ena certain quartier Brooklyn ek Queens. Jamais nou pou blié ki quantité nou pa ti ena l’experience. Dan nou circonscription,  ti ena Congregation Brooklyn Heights kot ti ena beaucoup Béthélite ki ti ena l’experience. Zot ti faire zot reunion dan la Salle du Royaume dan Béthel. Apré ki mo ti faire mo premier discours service dan sa congregation-la, Frere Nathan Knorr ti vinn koz ar moi ek ti dire moi: “Malcolm, to finn donne nou certain conseil lor bann point ki nou bizin amelioré, ek sa ti bien approprié. Pa blié, si to pa aide nou par bann bon conseil, to pa pou bien utile pou l’organisation. Contigne to bon travail.” Apré reunion, mo ti raconte sa Grace. Plitar, nou ti monte dan nou la chambre dan Béthel, kot nou ti resté pendant nou visite. Nou ti tellement fatigué a cause tou sa stress-la ki nou ti ploré.

Apré deux-trois mois, nou ti gagne enn lettre pou assisté 24^eme classe Lekol Guiléad, ek nou ti pou gagne nou diplome en Février 1955. Avant ki nou ti al sa lekol-la, ti fini dire nou ki kitfois sa formation-la pa pou necessairement prepare nou pou vinn bann missionnaire. Au contraire, sa ti pou aide nou pou vinn pli efficace dan service itinerant. Li ti vrai-mem extraordinaire pou assisté sa lekol-la ek sa ti enseigne nou aussi pou ena l’humilité.

Kan nou ti fini sa lekol-la, mo ti vinn surveillant district. Dan nou district ti ena l’etat Indiana, Michigan, ek Ohio. Apré sa, en Décembre 1955, nou ti etonné kan nou ti gagne enn lettre ki Frere Knorr ti ecrire nou. Li ti ecrire: “Dire moi franc asterla. Faire moi koné si to disposé pou rente Béthel ek pou reste ici . . . ou-soit si to disposé pou vinn Béthel pendant enn certain temps ek apré pou al servi dan enn lot pays. Mo ti pou content koné si to prefere servi dan district ou-soit dan circonscription.” Nou ti dire ki nou ti pou bien content servi n’importe ki coté envoye nou. Pa trop longtemps apré, ti demann nou pou vinn servi dan Béthel!

Pendant bann l’année extraordinaire ki mo ti passé dan Béthel, mo ti gagne privilege pou faire bann discours dan bann congregation ek bann l’assemblée dan beaucoup l’endroit en Amérique. Mo ti aidé pou forme bann jeune frere ki plitar ti gagne bann pli grand responsabilité dan l’organisation Jéhovah. Avek le temps, mo ti secretaire Frere Knorr dan department ki organise predication dan le monde entier.

Mo ti bien content bann l’année ki mo ti passé dan Bureau Service. Laba mo ti travail avek Thomas (Bud) Sullivan. Pendant plusieurs l’année li ti responsable sa departement-la. Mais mo ti aprann beaucoup kitsoz ar lezot frere aussi. Parmi ti ena Fred Rusk ki ti ena responsabilité pou forme moi. Mo rappel ki enn jour mo ti demann li: “Fred, kifer  to faire beaucoup correction dan certain lettre ki mo ecrire?” Li ti riyé ek li ti dire moi enn kitsoz ki ti faire moi reflechi: “Malcolm, kan to dire enn kitsoz, to kapav explik sa avek beaucoup mot, mais kan to ecrire enn kitsoz, surtout kan sa sorti ici, sa bizin bien ecrire ek exact, autant ki possible.” Apré sa li ti dire moi: “Pa gagne tracas​—to pé bien faire, ek avek le temps to pou faire ankor pli bien.”

Pendant bann l’année ki Grace ti passé dan Béthel, li ti faire plusieurs travail. Parmi, li ti faire nettoyage bann la chambre. Li ti bien content so travail. Ziska zordi, kan parfois nou zwenn certain parmi bann frere ki ti jeune dan Béthel dan sa lepok-la, zot dire Grace avek enn sourire: “To ti bien montré moi couma pou arrange mo lili, ek mo kapav dire toi ki mo mama bien content seki to’nn montré moi.” Grace ti bien content pou travail dan bann departement ki ti occupe l’abonnement, bann lettre ek bann enregistrement lor cassette. Sa bann diferan service-la ti aide li pou comprend ki n’importe ki kitsoz nou faire ek n’importe ki coté nou servi dan l’organisation Jéhovah, li enn privilege ek li enn benediction. Apré tou sa bann l’année-la, li ankor ena mem sentiment.

Au milieu bann l’année 1970, nou ti rann-nou compte ki nou bann parent ti pé rente dan l’age ek ti pé bizin plis l’aide. Alors, nou ti bizin prend enn decision bien difisil. Nou pa ti envie quitte Béthel ek nou bann frere ek soeur ki nou ti bien content. Mais selman, mo ti koné ki c’est mo responsabilité pou prend soin nou bann parent. Plitar, nou ti quitte Béthel, mais nou ti esperé pou retourné kan nou situation changé.

Mo ti travail couma enn agent l’assurance pou soigne mo famille. Touletan mo pou rappel seki enn manager ti dire moi kan mo ti pé suive enn formation: “Dan sa travail-la ou bizin rann visite bann dimoune dan la soirée. C’est dan sa bann moment-la ki ou kapav zwenn zot. Pena nanyé ki pli important ki ou visite bann dimoune chaque soirée.” Mo ti reponn li: “Mo sur ki ou pé koz par experience ek mo respecté sa. Mais mo ena aussi bann responsabilité spirituel ki jamais mo finn negligé, ek mo pena l’intention pou commencé asterla. Mo pou faire certain visite dan la soirée, mais dan Mardi ek Jeudi, mo bizin assisté bann reunion ki bien important.” Jéhovah finn bien beni moi parski mo pa finn rate okenn reunion a cause mo travail.

Nou ti avek mo mama kan li ti mor dan enn home en Juillet 1987. Nurse ki ti en charge ti vinn guette Grace ek ti dire li: “Madame Allen, ou kapav al ou lakaz ek repose ou. Tou dimoune koné ki ou ti touletan la pou ou belle-mere. Ou kapav rassure-ou ek ena enn conscience trankil.”

En Décembre 1987, nou ti rempli forme pou ré-servi dan Béthel, sa place ki nou ti bien content-la. Mais deux-trois jour plitar, nou ti aprann ki Grace  ti ena enn cancer colon. Apré so l’operation, li ti ré-gagne so la santé ek li ti nepli ena cancer. Selman pendant sa le temps-la, nou ti gagne enn lettre sorti Béthel ki ti encourage nou pou contigne nou service dan nou congregation. Nou ti bien determiné pou contigne travail dur dan nou service pou Jéhovah.

Plitar, mo ti gagne enn travail dan Texas. Nou ti pensé ki laba nou ti pou bien parski so climat ti pli bon ek nou ti ena raison. Ici dan Texas, pendant 25 an, nou finn entouré ar bann frere ek soeur ki ena beaucoup lamour ek ki’nn vinn nou bann bon camarade.

Pendant beaucoup l’année, Grace finn bien souffert a cause cancer colon ek thyroïde, ek pa trop longtemps li ti gagne cancer du sein. Mais, jamais li pa’nn plaigné a cause so situation, li finn touletan cooperé avek moi ek respecté moi en tant ki chef la famille. Souvent bann dimoune demann li: “Ki finn aide zot pou reussi zot mariage ek pou zot heureux ensam?” Li donne quatre raison: “Nou toulé-deux, nou bann bon camarade. Toulé-jour nou communiké. Nou bien content pou passe le temps ensam toulé-jour. Ek jamais nou al dormi a-soir alors ki nou ankor en colere sakenn ar nou camarade.” Bien sur, parfois li arrivé ki nou enerve nou camarade, mais nou pardonné ek nou blié ek vrai-mem sa marché.

Nou finn aprann plusieurs bon kitsoz a travers bann probleme ki nou finn gagné:

1.  Touletan compte lor Jéhovah ek accepté seki Li permette. Fodé jamais nou fié lor nou prop l’intelligence.​—Prov. 3:5, 6; Jér. 17:7.

2.  Laisse Parole Jéhovah dirige nou lavi n’importe ki arrivé. Li bien important ki nou obeir Jéhovah ek so bann la loi. Nou pa kapav mange dan deux l’assiette​—soit nou obeir, soit nou pa obeir.​—Rom. 6:16; Héb. 4:12.

3.  Ena enn kitsoz ki pli important dan lavi, c’est ena enn bon reputation devant Jéhovah. Mette Jéhovah en premier dan nou lavi, pa bann di-bien materiel.​—Prov. 28:20; Eccl. 7:1; Mat. 6:33, 34.

4.  Prié Jéhovah pou ki Li aide ou pou vinn efficace ek pou faire tou seki ou kapav dan so service. Fixé ou l’attention lor seki ou kapav faire, pa lor seki ou pa kapav.​—Mat. 22:37; 2 Tim. 4:2.

5.  Rappel ki pena okenn lot l’organisation ki Jéhovah beni ek ki ena so faveur.​—Jean 6:68.

Sa faire plis ki 75 an ki Grace ek moi, nou pé servi Jéhovah, ek en tant ki enn couple, nou pé servi Li pendant apepré 65 an. Nou finn vrai-mem passe bann moment extraordinaire pou servi Jéhovah ensam pendant plusieurs dizaine l’année. Nou esperé ek nou prié ki tou nou bann frere ek soeur kapav trouvé zot aussi couma zot kapav gagne bann grand bienfait kan zot compte lor Jéhovah.