ENA environ dix an, Gregorio ek Marilou, enn couple ki ti ena apepré 30 an, ti pé faire pionnier dan lavil Manille, ek en mem temps, zot ti travail a plein temps. Li pa ti toujours fasil, mais zot ti reussi. Plitar, Marilou ti gagne enn promotion, li ti vinn manager la banque kot li ti pé travail. Li raconté: “Nou ti ena enn bon travail, alors nou ti kapav ena enn lavi bien confortable.” En realité, zot ti tellement bien lor plan financier ki zot ti decide pou monte lakaz ki zot ti revé, dan enn joli l’endroit ki ti trouve environ 20 kilometre dan l’est Manille. Zot ti faire enn contrat avek enn compagnie pou range zot lakaz ek zot ti faire bann l’arrangement pou paye zot toulé-mois pendant dix an.

Marilou raconté: “Mo nouveau travail ti tellement prend mo le temps ek mo la force ki mo zele pou bann activité spirituel ti diminué. Mo ti ena l’impression ki mo ti pé kokin Jéhovah.” Li expliké: “Mo ti nepli kapav donne Jéhovah le temps ki mo ti’nn reservé pou so service.” Gregorio ek Marilou pa ti content sa situation-la, alors enn jour, zot ti assizé pou koz lor direction ki zot lavi  ti pé prend. Gregorio raconté: “Nou ti envie faire enn changement mais nou pa ti trop koné ki nou pou faire. Nou ti koz lor-la ek nou ti demann-nou couma nou ti pou kapav servi nou lavi pli bien dan service Jéhovah, surtout ki nou pena zenfant. Nou ti prié Jéhovah pou guide nou.”

Sa lepok-la, zot ti tann plusieurs discours ki ti koz lor l’importance pou al servi kot bizin plis proclamateur. Gregorio dire: “Nou ti senti ki a travers sa bann discours-la, Jéhovah ti pé reponn nou bann la priere.” Gregorio ek Marilou ti prié pou ena plis la foi pou gagne courage pou prend enn bon decision. Enn grand difficulté ki zot ti ena, c’est zot projet construction. Zot ti’nn fini paye trois an pou zot lakaz. Ki zot ti pou faire? Marilou raconté: “Si nou ti cancel sa contrat-la, nou ti pou perdi tou seki nou ti’nn fini payé​—enn gros somme larzan. Mais nou ti considere sa couma enn choix ki nou ti ena devant nou: soit mette volonté Jéhovah en premier, soit mette nou prop desir en premier.” Zot ti rappel ki l’apotre Paul ti “accepté perdi tou,” alors zot ti cancel zot projet concernant zot lakaz. Zot ti quitte zot travail, vann la plupart zot bann kitsoz, ek zot ti demenagé pou al dan enn village eloigné, lor l’île Palawan, apepré 480 kilometre dan sud Manille.​—Phil. 3:8

Avant zot demenagé, Gregorio ek Marilou ti essaye prepare-zot pou amenn enn lavi simple. Mais c’est selman kan zot ti arrive dan l’endroit kot zot ti bizin allé ki zot ti realisé ki quantité zot nouveau lavi ti pou simple. Marilou dire: “Mo ti gagne enn sok. Pa ti ena courant, ni okenn lezot facilité. Au lieu ki nou ti appuye lor enn bouton pou allume enn rice cooker, nou ti bizin al coupe di-bois ek allume difé pou cuit nou mangé. Mo ti chagrin ki mo pa ti kapav al dan bann centre commercial, al mangé dan restaurant ek faire lezot kitsoz ki nou ti pé kapav faire dan enn grand lavil.” Mais, sa couple-la ti contigne rappel zot-mem kifer zot ti demenagé, ek apré enn tipé le temps, zot ti’nn adapté ar zot nouveau lavi. Marilou raconté: “Asterla, mo bien content pou observe beauté ki ena dan la nature, couma par exemple, bann zetoile a-soir. Ek seki mo pli content, c’est trouve la joie lor figure bann dimoune kan nou preche ar zot. Grace a nou service ici, nou finn ‘aprann secret’ pou contente-nou ar seki nou ena.”​—Phil. 4:12.

Gregorio raconté: “Kan nou ti arrive ici, ti ena zis quatre Témoins. Zot ti bien content kan mo ti commence faire enn discours publik chaque semaine ek kan mo ti accompagne zot ar mo la guitare kan nou ti chante cantik.” Dan enn an, Gregorio ek Marilou ti trouve sa ti groupe-la vinn enn congregation 24 proclamateur. Gregorio dire: “Lamour ki bann membre congregation ti manifesté envers nou ti touche nou beaucoup.” Zordi, kan zot guette seki zot finn accompli pendant six an dan sa l’endroit isolé-la, zot dire: “Pena nanyé ki nou kapav comparé ar la joie ki nou ena pou trouve bann nouveau  vinn dan la verité. Asterla nou ena vrai-mem sentiment ki nou lavi ena enn sens.”

Dan Philippines, preské 3,000 frere ek soeur finn demenagé pou al reste dan bann l’endroit kot bien bizin bann proclamateur. Apepré 500 ladan c’est bann soeur celibataire. Anou guette l’exemple Karen.

Karen, ki ena asterla plis ki 20 an, ti grandi dan enn lavil ki appel Baggao, dan Cagayan. Kan li ti ankor enn adolescent, souvent li ti reflechi couma li kapav faire plis dan so ministere. Li raconté: “Mo ti koné ki pa reste beaucoup le temps avant lafin, ek ki beaucoup dimoune bizin tann message lor Royaume Bondié. Mo ti envie al servi kot bizin plis proclamateur.” Mem si certain membre so famille ti encourage li pou faire bann grand letid au lieu ki li al dan enn l’endroit isolé pou preché, Karen ti prié Jéhovah pou koné ki li pou faire. Li ti aussi koz avek bann ki servi dan bann l’endroit isolé. Kan li ti gagne 18 an, li ti demenagé pou al reste dan enn l’endroit isolé, apepré 65 kilometre ar lavil kot li ti grandi.

Karen ti al servi dan enn ti congregation ki ti ena responsabilité pou preche dan enn l’endroit kot ena bann montagne, lor la cote Pacifique. Karen raconté: “Zis pou nou sorti Baggao, pou al dan nou nouveau congregation, nou ti bizin marche trois jour, monté-desann bann montagne, ek traverse bann la riviere plis ki 30 fois.” Li ajouté: “Mo bizin marche six heure temps pou zwenn certain etudiant la Bible, mo reste kot zot a-soir, ek lendemain, mo ré-marche ankor six heure temps pou retourne kot moi.” Eski li vaut la peine faire tou sa bann zeffort-la? Avek enn grand sourire, Karen dire: “Parfois mo lipié fermal, mais, mo finn conduire ziska 18 letid la Bible. Mo finn ‘gouté ek mo finn trouvé ki Jéhovah Li bon’!”​—Ps. 34:8.

Sukhi, enn soeur celibataire ki ti ena 40 an, ti vive en Amérique. Ki ti pousse li pou demenagé pou al Philippines? En 2011, li ti assisté enn l’assemblée circonscription kot ti interview enn couple. Zot ti raconté couma zot ti vann la plupart zot bann kitsoz pou al servi dan Mexique. Sukhi dire: “Sa interview-la ti faire moi commence reflechi lor bann l’objectif ki jamais mo ti pensé avant.” Kan Sukhi, ki ti origine Indien, ti aprann ki ti bizin plis proclamateur pou preche avek bann Penjabi ki vive dan Philippines, li ti decide pou al aide sa bann dimoune-la. Eski li ti gagne bann difficulté?

Sukhi dire: “Mo pa ti attann ki li ti pou difisil pou moi sa quantité-la pou decidé ki bann kitsoz mo ti pou gardé ou-soit vendé. Ek aussi, apré ki mo finn amenn enn lavi confortable pendant 13 an dan mo prop l’appartement, mo ti demenagé pou al reste kot enn mo famille. Mo lavi pa ti confortable couma avant, mais sa ti enn  bon fason pou mo prepare-moi pou amenn enn lavi simple.” Ki bann difficulté li ti gagné kan li al reste dan Philippines? “Mo pli grand difficulté c’est ki mo bien peur bann bebete ki rampé ek aussi mo pays ti bien mank moi. Mo ti aprann pou compte lor Jéhovah plis ki avant!” Eski sa ti vaut la peine? Avek enn sourire, Sukhi dire: “Jéhovah dire nou: ‘Testé moi, guetté si mo pa vide lor zot enn benediction.’ Zordi, mo trouve sa bann parole-la realisé kan enn dimoune dan predication demann moi: ‘Kan eski ou pou ré-vini? Mo ena beaucoup lezot question pou pose ou.’ Sa faire moi gagne beaucoup la joie ek satisfaction pou aide bann dimoune ki faim lor plan spirituel!” (Mal. 3:10) Sukhi ajouté: “Oui, seki ti pli difisil c’est pou prend decision pou demenagé. Mais apré ki mo ti’nn faire sa, li ti extraordinaire pou trouvé couma Jéhovah ti occupe tou kitsoz pou moi.”

Sime, enn frere ki marié ek ki asterla pré pou gagne 40 an, ti quitte Philippines pou al dan enn pays dan sud-ouest l’Asie kot li ti gagne enn bon travail. Kan li ti la-bas, li ti gagne l’encouragement ar enn surveillant circonscription, ek li ti tann discours enn frere College Central. Sa ti pousse li pou mette Jéhovah en premier dan so lavi. Sime dire: “Mais kan mo ti reflechi lor l’idée pou quitte mo travail, sa ti faire moi bien stressé.” Kan-mem, li ti quitte so travail ek li ti retourne Philippines. Zordi, Sime ek so madame, Haidee, pé servi dan Davao del Sur, dan sud Philippines, kot bien bizin bann proclamateur pou couvert sa grand territoire-la. Sime dire: “Kan mo ré-guette le passé, mo bien reconnaissant ki mo ti reussi surmonte mo la peur pou perdi mo travail ek ki mo finn mette Jéhovah en premier dan mo lavi. Pena nanyé ki donne plis satisfaction dan lavi ki kan ou donne Jéhovah seki ou ena pli bon!”

Ramilo ek Juliet, enn couple pionnier ki ti fek gagne 30 an, ti aprann ki enn congregation ki ti trouve zis 30 kilometre apepré ar zot lakaz, ti bizin l’aide. Alors, zot ti porte-zot volontaire pou soutenir sa congregation-la. Toulé-semaine, la pluie-soleil, Ramilo ek Juliet ti faire plusieurs voyage lor zot motocyclette pou al reunion ek pou participe dan predication. Mem si li pa ti toujours fasil pou voyage lor bann chemin casse-cassé ek passe lor certain pont fragile, zot ti heureux ki zot ti faire plis dan zot ministere. Ramilo dire: “Mo madame ek moi, nou toulé-deux ti conduire 11 letid la Bible! Li vrai ki nou ti bizin faire bann sacrifice pou al servi kot bien bizin bann proclamateur, mais nou ti gagne enn grand satisfaction!”​—1 Cor. 15:58.

Eski ou ti pou content pou aprann plis couma ou kapav al servi dan bann l’endroit kot bien bizin bann proclamateur dan ou prop pays ou-soit dan enn lot pays? Si oui, koz avek ou surveillant circonscription, ek lire lartik “ Passe en Macédoine ” dan Ministere du Royaume, Août 2011, en Français.