1, 2. (a) Kisannla “Lerwa leternite,” ek kifer nou kapav dir sa? (Get zimaz dan koumansman lartik.) (b) Kifer nou kontan ki Jéhovah regn lor nou?

 LERWA Swaziland, Sobhuza II, ti regne pandan apepre 61 an. Se enn rekor pou enn lerwa dan nou lepok. Mem si sa inpresionn nou ki enn dimounn kapav regn sa kantite letan-la, ena enn lerwa li, so regn pa limite kouma lavi bann dimounn. An realite, Labib apel li “Lerwa leternite.” (1 Tim. 1:17) Enn ekrivin Psaume ti donn nou nom sa Lerwa-la: “Jéhovah Li Lerwa pou touletan, wi pou touzour.”​—Ps. 10:16.

² Regn Bondie diferan ar regn ninport ki dimounn parski kantite letan ki Bondie regne bien long. Selman, se fason ki Jéhovah regne ki atir nou ar Li. Enn lerwa ki ti regn lor Israël pandan 40 an ti loue Bondie par sa bann parol-la: “Jéhovah ena mizerikord ek konpasion, Li pa ankoler vit ek Li ena lamour fidel an abondans. Jéhovah Li-mem inn fixe so tronn bien solid dan lesiel; ek so rwayote dominn lor tou kitsoz.” (Ps. 103:8, 19) Jéhovah, Li pa zis nou Lerwa, me Li osi nou Papa​—nou Papa ki dan lesiel ek ki ena lamour pou nou. Sa fer nou poz de kestion: Dan ki fason Jéhovah inn azir kouma enn Papa? Kouma Jéhovah inn montre ki Li touzour Lerwa depi rebelion an Éden? Repons sa bann  kestion-la pou fer nou vinn pli pros ar Jéhovah ek pou ador Li avek tou nou leker.

3. Kisannla ti premie manb dan fami iniversel Jéhovah, ek kisannla ankor Jéhovah ti kree kouma so “bann garson”?

³ Sirman Jéhovah ti bien kontan kan Li ti kree so Garson premie-ne! Bondie pa ti tret li kouma enn kikenn ki pena linportans. Okontrer, Li ti kontan li kouma so Garson ek ti invit li pou partisip avek Li pou kree plizir milyon anz parfe. (Col. 1:15-17) Labib dir ki sa bann anz-la, zot ‘bann minis ki fer volonte’ Bondie. Zot servi Jéhovah avek lazwa ek Li donn zot loner kan Li apel zot so “bann garson.” Zot form parti dan fami iniversel Jéhovah.​—Ps. 103:20-22; Job 38:7.

4. Kouma Bondie inn fer so fami iniversel vinn pli gran?

⁴ Kan Jéhovah ti fini kree lesiel ek later, Li ti kree lezot manb dan so fami iniversel. Apre ki Li ti prepar later ek ti fer sa vinn enn zoli landrwa pou viv, Li ti kree premie zom, Adam, dan So resanblans. (Gen. 1:26-28) Antan ki Kreater, Jéhovah ti atann ki Adam obeir Li. Antan ki enn Papa, Jéhovah ti donn so bann instriksion avek amour ek bonte. Dan okenn fason, sa bann instriksion-la pa ti anpes Adam servi so liberte pou swazir.​—Lir Genèse 2:15-17.

5. Ki dispozision Jéhovah ti pran pou ranpli later ar bann imin?

⁵ Jéhovah pa parey kouma bann lerwa imin. Li kontan pou donn so bann serviter boukou responsabilite parski Li ena konfians an zot ek Li konsider zot kouma bann manb so fami. Par exanp, Li ti donn Adam lotorite lor lezot kreatir lor later. Li ti mem donn li enn gran travay ki interesan: donn sak zanimo enn nom. (Gen. 1:26; 2:19, 20) Bondie pa ti kree plizir milyon dimounn parfe pou ranpli later. Okontrer, Li ti swazir pou donn Adam enn fam parfe, Ève. (Gen. 2:21, 22) Apre sa, Li ti donn zot posibilite pou ranpli later avek zot bann zanfan. Adam ek Ève ti viv dan bann kondision ideal ek avek letan zot ti pou kapav fer later antie vinn enn Paradi. Ansam avek bann anz dan lesiel, zot ti pou kapav ador Jéhovah pou touletan kouma bann manb so fami iniversel. Zot ti ena vremem enn lavenir extraordiner! Jéhovah ti montre so lamour kouma enn papa anver zot!

6. (a) Kouma rebelion inn koumanse dan fami Bondie? (b) Kouma nou kone ki Jéhovah ena touzour kontrol antan ki Lerwa?

⁶ Malerezman, Adam ek Ève pa ti aksepte Jéhovah kouma zot Lerwa. Okontrer, zot ti swazir pou swiv Satan, enn anz ki ti rebel kont Bondie. (Gen. 3:1-6) Sa ti fer zot ek zot bann desandan konn lapenn, soufrans ek lamor. (Gen. 3:16-19; Rom. 5:12) Bondie ti nepli ena okenn serviter ki ti obeir Li lor later. Eski sa vedir ki Li ti nepli ena okenn kontrol ek ki Li ti abandonn so lotorite antan ki Lerwa lor later? Non! Li ti montre so lotorite kan Li ti met Adam ek Ève andeor zardin Éden. Pou anpes zot re-rantre, Li ti met bann seribin pou gard lantre zardin. (Gen. 3:23, 24) Anmemtan, Bondie ti montre so lamour kouma enn papa. Li ti konfirme ki so proze pou ena enn fami iniversel avek bann anz ek bann dimounn obeisan, ti pou akonpli. Li ti promet ki enn “desandan” Adam ti pou detrir Satan ek pou repar tou bann ditor ki pese Adam inn fer.​—Lir Genèse 3:15.

7, 8. (a) Ki kantite lemond ti vinn move dan lepok Noé? (b) Ki dispozision Jéhovah ti pran pou netway later ek pou protez bann dimounn?

 ⁷ Dan bann siek apre, sertin dimounn ti swazir pou res fidel ar Jéhovah. Parmi ti ena Abel ek Hénok. Selman, laplipar dimounn ti rezet Jéhovah antan ki zot Papa ek zot Lerwa. Dan lepok Noé, later ti’nn “ranpli ar violans.” (Gen. 6:11) Eski sa vedir ki Jéhovah ti nepli ena okenn kontrol lor later? Ki Labib dir?

⁸ Labib dir nou ki Jéhovah ti donn Noé bann instriksion bien presi ek enn plan bien detaye pou aranz enn gran lars pou sov li ek so fami. Bondie ti osi montre so gran lamour pou tou bann dimounn kan Li ti donn Noé mision pou vinn “enn predikater lazistis.” (2 Pierre 2:5) Pena dout ki Noé ti ankouraz bann dimounn pou repanti ek li ti averti zot lor destriksion ki ti pou vini, me personn pa ti ekout li. Pandan plizir lane, Noé ek so fami ti viv dan enn lemond violan ek bien imoral. Jéhovah, kouma enn bon Papa, ti protez ek ti beni sa wit dimounn ki ti fidel la. Kan Li ti amenn enn Deliz lor later, Jéhovah ti montre ki Li ti ena lotorite lor bann dimounn rebel ek lor bann move anz. Wi, vremem Jéhovah ti ena kontrol lor later.​—Gen. 7:17-24.

9. Ki posibilite Jéhovah ti donn bann dimounn apre Deliz?

⁹ Kan Noé ek so fami ti sorti dan lars, sirman zot ti bien rekonesan anver Jéhovah pou so proteksion. Deswit, Noé ti fer enn lotel ek ti ofer bann sakrifis pou ador Jéhovah. Bondie ti beni Noé ek so fami ek ti dir zot: “Gagn zanfan, vinn boukou ek ranpli later.” (Gen. 8:20–9:1) Ankor enn fwa, bann dimounn ti ena posibilite pou ador Jéhovah dan linite ek pou ranpli later.

10. (a) Apre Deliz, ki kote ek kouma bann dimounn ti koumans rebele kont Jéhovah? (b) Ki Jéhovah ti fer pou ki so volonte akonpli?

¹⁰ Selman, apre Deliz, bann dimounn ti touzour inparfe. Zot ti ankor bizin fer fas ar linflians invizib Satan ek so bann anz rebel. Bien vit bann dimounn ti rekoumans rebele kont dominasion Jéhovah. Par exanp, Nimrod, aryer-tizanfan Noé, ti opoz li ar Jéhovah. Nimrod ti “enn gran saser kont Jéhovah.” Li ti konstrir bann gran lavil, par exanp Babel, ek li ti fer limem vinn lerwa “dan pei Shinéar.” (Gen. 10:8-12) Sa lerwa rebel la ti fer tou pou ki proze Bondie “pou ranpli later” pa realize. Ki Lerwa leternite ti fer kont li? Bondie ti konfonn langaz bann dimounn, ek sa ti fer bann ki ti swiv Nimrod “disperse partou lor later.” Partou kot zot ti ale zot ti amenn avek zot, zot fos relizion ek fason ki zot ti dirize.​—Gen. 11:1-9.

11. Kouma Jéhovah ti montre so fidelite anver Abraham?

¹¹ Mem si apre Deliz boukou dimounn ti ador bann fos bondie, ti ena bann zom fidel ki ti kontign ador Jéhovah. Enn parmi ti Abraham. Li ti obeir Jéhovah, li ti kit enn lakaz konfortab dan lavil Our ek li ti al res dan bann latant pandan plizir lane. (Gen. 11:31; Héb. 11:8, 9) Pandan ki Abraham ti viv kouma enn nomad, souvan li ti res pre ar bann lerwa ek boukou parmi zot ti viv dan bann lavil ki antoure par bann miray. Me Jéhovah ti protez Abraham ek so fami. Konsernan proteksion ki Jéhovah ti donn so bann serviter parey kouma enn Papa, enn ekrivin Psaume dir: “[Bondie] pa ti les okenn dimounn fer dominer ar zot, me akoz zot, Li ti koriz bann lerwa.” (Ps. 105:13, 14) Jéhovah ti fidel anver so kamarad Abraham, alor Li ti promet li: “Bann lerwa pou sorti dan to desandans.”​—Gen. 17:6; Jacq. 2:23.

12. Kouma Jéhovah ti montre so lotorite lor l’Égypte, ek kouma sa ti ed so pep?

 ¹² Bondie ti promet Isaac, garson Abraham, ek Jacob​—so tizanfan​—ki Li ti pou beni zot ek ki parmi zot bann desandan ti pou ena bann lerwa. (Gen. 26:3-5; 35:11) Selman, avan ki sa arive, bann desandan Jacob ti pou vinn esklav an Égypte. Me eski sa vedir ki Jéhovah pa ti pou ranpli so promes ouswa eski Li ti pou abandonn so lotorite antan ki Lerwa lor later? Non. Dan ler ki Li ti fixe, Jéhovah ti montre so pwisans ek osi ki Li ti ena plis lotorite ki Pharaon ki ti enn lerwa bien teti. Bann esklav Izraelit ti ena lafwa an Jéhovah, ek Li ti delivre zot dan enn fason extraordiner kan Li ti fer zot travers La Mer Rouge. Pena dout, Jéhovah ti ankor touzour Lerwa liniver, ek antan ki enn Papa ki ena lamour, Li ti servi so gran pouvwar pou protez so pep.​—Lir Exode 14:13, 14.

13, 14. (a) Dan enn sante, ki bann Izraelit ti dir lor rwayote Jéhovah? (b) Ki Bondie ti promet David?

¹³ Deswit apre ki Jéhovah ti delivre bann Izraelit dan l’Égypte, zot ti sant enn sante pou loue Jéhovah. Sa sante-la trouv dan Exode sapit 15 ek dan verse 18, nou trouv sa deklarasion-la: “Jéhovah pou regne pou touletan, wi pou touzour.” An realite, Jéhovah inn vinn Lerwa lor enn nouvo nasion. (Deut. 33:5) Selman, bann Izraelit pa ti satisfe ki Jéhovah ti zot Lerwa invizib. Apepre 400 an apre ki zot ti kit l’Égypte, zot ti demann Bondie pou donn zot enn lerwa imin, parey kouma bann nasion payin ki ti otour zot. (1 Sam. 8:5) Malgre sa, pandan regn David ki ti deziem lerwa an Israël, li ti kler ki Jéhovah ti touzour Lerwa.

¹⁴ David ti amenn lars lalians dan Jérusalem. Bann Izraelit ti bien kontan sa zour-la, ek bann Levit ti sant enn sante pou loue Jéhovah. Zot ti fer enn deklarasion inportan ki trouv dan 1 Chroniques 16:31: “Bizin dir parmi bann nasion: ‘Jéhovah inn vinn Lerwa!’” Enn dimounn kapav demande: ‘Jéhovah Li Lerwa leternite, kouma eski Li ti vinn Lerwa dan sa lepok-la?’ Jéhovah vinn Lerwa kan Li montre so lotorite ouswa kan Li etabli enn kikenn pou reprezant  Li dan enn lepok an partikilie, ouswa pou azir dan enn sitiasion presi. Li bien inportan ki nou konpran dan ki sans Jéhovah vinn Lerwa. Avan David mor, Jéhovah ti promet li ki so regn ti pou kontigne pou touletan. Li ti dir li: “Mo pou fer to desandans, to prop garson, existe apre twa, ek mo pou fer so rwayom vinn solid.” (2 Sam. 7:12, 13) Sa promes-la ti realize kan “desandans” David ti vinn lor later plis ki 1,000 an plitar. Kisannla sa desandans-la ti ete, ek kan eski li ti pou vinn Lerwa?

15, 16. Kan eski Jéhovah ti donn Jésus lespri sin pou li vinn Lerwa, ek ki dispozision Jésus ti pran an rapor avek so Rwayom kan li ti lor later?

¹⁵ Dan lane 29 Nou Lepok, Jean Baptiste ti koumans anonse ki “Rwayom ki dan lesiel finn koste.” (Mat. 3:2) Kan Jean ti batiz Jésus, Jéhovah ti donn Jésus lespri sin ek li ti vinn Mesi ek osi Lerwa ki ti pou regne dan Rwayom Bondie. Parey kouma enn Papa, Jéhovah ti montre so lamour anver Jésus par sa bann parol-la: “Limem mo Garson ki mo bien kontan ek ki mo finn aprouve.”​—Mat. 3:17.

¹⁶ Pandan so minister, Jésus ti donn laglwar so Papa. (Jean 17:4) Li ti fer sa kan li ti pres Rwayom Bondie. (Luc 4:43) Li ti mem ansegn so bann disip pou priye pou ki sa Rwayom-la vini. (Mat. 6:10) Antan ki Lerwa ki Bondie ti swazir, Jésus ti kapav dir so bann opozan: “Rwayom Bondie parmi zot.” (Luc 17:21) Plitar, dan lasware avan so lamor, Jésus ti fer ‘enn lalians pou enn rwayom’ avek so bann zapot. Li ti donn sertin so bann disip ki fidel, lesperans pou vinn bann lerwa avek li dan Rwayom Bondie.​—Lir Luc 22:28-30.

17. Dan ki fason Jésus ti koumans regne an 33 Nou Lepok, me ki li ti pou bizin atann?

¹⁷ Kan eski Jésus ti pou koumans regne dan Rwayom Bondie? Li pa ti pou kapav fer sa deswit. Landemin, dan lapremidi, so bann lennmi ti touy li ek so bann disip ti disperse. (Jean 16:32) Selman, parey kouma dan lepase, Jéhovah ti touzour pe kontrol bann levennman. Trwaziem zour apre lamor so Garson, Jéhovah ti resisit li, ek zour la Pentecôte 33 Nou Lepok, Jésus ti etabli enn rwayom spiritiel lor kongregasion bann Kretien ki ena lesperans pou al dan lesiel. (Col. 1:13) Me Jésus, “desandans” ki Bondie ti promet ti pou bizin atann pou gagn tou pouvwar antan ki Lerwa lor later. Jéhovah ti dir so Garson: “Asiz dan mo kote drwat ziska ki mo met to bann lennmi kouma enn ti ban pou to lipie.”​—Ps. 110:1.

18, 19. Ki nou santi nou pouse pou fer, ek ki nou pou aprann dan prosin lartik?

¹⁸ Pandan plizir milie lane, bann anz ek bann dimounn finn rebel kont regn Jéhovah. Me zame Jéhovah finn abandonn so lotorite antan ki Lerwa; Li finn touzour kontrol bann levennman. Antan ki enn Papa ki ena lamour, Jéhovah ti protez ek ti pran swin so bann serviter fidel kouma Noé, Abraham ek David. Eski sa pa pous nou pou soumet nou ar nou Lerwa ek pou vinn pli pros ar Li?

¹⁹ Me asterla, nou kapav demann nou: Kouma eski Jéhovah inn vinn Lerwa dan nou lepok? Kouma nou kapav montre ki nou soutenir Rwayom Jéhovah avek fidelite, ek vinn bann garson parfe dan so fami iniversel? Ki vedir priye pou ki Rwayom Bondie vini? Nou pou reponn sa bann kestion-la dan prosin lartik.