SA LANE-LA sa fer 100 an depi ki ti pas pou premie fwa « Photo-Drame de la Création ». Se enn prozeksion zimaz bien inpresionan ki ti ena lobzektif pou ed bann dimounn ena plis lafwa dan Labib ek pou konsider li kouma Parol Bondie. Dan enn lepok kot levolision, bann kritik lor Labib, ek bann dout, ti afebli lafwa boukou dimounn, « Photo-Drame » ti defann Jéhovah kouma Kreater liniver.

Charles Russell, ki ti diriz laktivite bann Etidian Labib, ti touletan rod bann mwayin pli efikas ek pli rapid pou fer konn bann verite Biblik. Bann Etidian Labib ti trouve ki kantite bann liv ki zot ti pibliye ti bien efikas, ek pandan plis ki trant an zot ti pe servi sa. Asterla enn nouvo mwayin ti atir zot latansion​—prozeksion bann fim.

Dan bann lane 1890, ti koumans pas an piblik prozeksion bann fim san bann son. An 1903, ti pas enn fim relizie dan enn legliz, dan lavil New York. Lindistri sinema ti fek koumanse an 1912 kan Frer Russell ti koumans prepar « Photo-Drame ». Li ti rann li kont ki sa mwayin kominikasion la ti pou kapav transmet bann verite Biblik dan enn fason ki bann liv tousel pa ti pou kapav fer.

Prozeksion « Photo-Drame » ti dire wit-er-tan ek an zeneral ti pas sa an kat parti. Ti prezant 96 ti diskour Biblik anrezistre ki enn orater bien popiler ti rakonte. Li ti ena enn bon lavwa ki tou dimounn ti kone dan sa lepok-la. Ti ena bann lamizik klasik ki ti akonpagn bann senn. Bann frer kalifie ti zwe bann fonograf kot ti ena bann lavwa ek bann lanrezistreman lamizik ek zot ti pas sa anmemtan avek bann zimaz ek bann fim an kouler ki ti montre bann zistwar Labib bien popiler.

Laplipar bann sekans sa fim-la ek boukou diapozitiv lor bann vit ti fer par bann stidio komersial. Bann artis profesionel dan Philadelphie, New York, Paris, ek Londres ti penn sa bann diapozitiv-la lor bann vit,  zot ti penn osi bann fim, zimaz par zimaz. Bann lekip Betelit ki ti travay dan departman art ti osi penn boukou zimaz, souvan zot ti penn bann diapozitiv pou ranplas bann ki ti’nn kase. Bann frer pa ti zis aste bann fim, zot ti osi filme bann Betelit dan lavil Yonkers, New York. Sa bann Betelit-la ti zwe bann parti lor Abraham, Isaac ek sa anz ki ti anpes Abraham pou sakrifie so garson la.​—Gen. 22:9-12.

Enn asosie Frer Russell ti dir bann zournalis ki sa metod kominikasion la ti pou “fer plizir milie dimounn interese ar [Labib], plis ki tou seki [ti’nn] fer dan lepase pou la relizion.” Eski bann pret ti montre ki zot ti apresie sa nouvo mwayin ki bann frer ti servi pou tous bann dimounn ki ti fin lor plan spiritiel-la? Non, okontrer bann pret la Chrétienté ti kondann « Photo-Drame », sertin ti mem oze servi bann taktik sournwa pou anpes bann dimounn get sa. Dan enn landrwa, enn group pret ti fer koup kouran.

Malgre sa, bann teat ti ranpli ar bann dimounn ki ti vinn get « Photo-Drame » san peye. Dan l’Amérique, sak zour, ti pas « Photo-Drame » ziska dan 80 lavil. Boukou dimounn ti inpresione pou get zot premie ‘fim ki koze.’ Bann sekans akselere ti permet zot pou trouv enn ti zwazo ki pe sorti dan so dizef ek enn fler ki pe ouver tigit par tigit. Bann ransegnman siantifik dan sa lepok-la ti montre bien sazes Jéhovah. Parey kouma nou ti mansione dan koumansman, kan enn kikenn ti trouv Frer Russell lor lekran pou introdir « Photo-Drame », li ti mem panse ki orater-la ti “resanble plis Frer Russell ki Frer Russell limem!”

Tim Dirks, enn ekrivin ki ti osi enn istorien, ti dekrir « Photo-Drame » kouma “premie fim ki pase lor enn gran lekran kot ti ena anmemtan bann son (bann parol anrezistre), bann ti fim, ek bann diapozitiv an kouler.” Bann fim ki ti ena avan « Photo-Drame » ti servi sertin sa bann teknik-la, me pa tou teknik dan enn sel prezantasion, sirtou enn prezantasion lor enn tem biblik. Ek okenn prezantasion pa ti ena enn lasistans kouma ti ena pou « Photo-Drame »​—kot ti ena antou apepre nef milyon dimounn an Amérique Di-nor, an Europe, an Australie, ek an Nouvelle Zélande, zis dan premie lane!

Ti zwe « Photo-Drame » premie fwa le 11 Zanvie 1914, dan lavil New York. Set mwa apre ti ena enn gran katastrof ki plitar ti apel Premie Lager Mondial. Me dan lemond antie bann lafoul ti kontign rasanble pou get « Photo-Drame ». Zot ti gagn enn gran rekonfor kan zot ti get bann senn ki montre bann benediksion ki Rwayom Bondie pou amene. Pa ti ena nanye an 1914 ki ti kapav konpar avek « Photo-Drame », sa ti vremem enn prezantasion extraordiner!