KATHERINE ti grandi dan l’États-Unis ek ti batize pou vinn enn Temwin Jéhovah laz 16 an. Li ti serye dan so minister, me dan teritwar kot li ti pe prese, bien tigit dimounn ti interese ar mesaz lor Rwayom Bondie. Li dir: “Mo ti lir bann lexperyans kot bann dimounn ti priye Bondie pou avoy enn kikenn ed zot pou aprann konn Bondie. Souvan mo ti anvi zwenn enn dimounn koumsa, me zame sa ti arive.”

Apre ki li ti’nn pres plizir lane dan sa teritwar-la, Katherine ti koumans pans pou al dan enn lot teritwar kot bann dimounn pou plis ekout mesaz lor Rwayom Bondie. Me li ti pe demann limem si li ti pou reisi fer sa. Enn sel fwa dan so lavi li ti’nn kit so fami​—zis pou de semenn​—ek toulezour li ti mank zot. Pourtan, li ti ena dezir pou gout lazwa ki gagne kan ed bann ki pe rod Jéhovah, ek sa dezir-la ti pli for. Apre ki li ti’nn examinn plizir landrwa kot li ti kapav ale, li ti ekrir biro nasional Guam ek ti gagn bann ransegnman ki bizin. An Ziliet 2007, kan Katherine ti ena 26 an, li ti al Saipan, enn lil apepre 10,000 kilomet ar so pei, dan Losean Pacifique. Ki rezilta li’nn gagne?

Enn tipe apre ki li ti’nn ariv dan so nouvo kongregasion, Katherine ti zwenn Doris, enn madam ki ti ena apepre 45 an, ek ki ti aksepte enn letid Labib. Apre trwa premie sapit dan liv Ki la Bible enseigné?, Katherine ti koumans poz limem bann kestion. Li dir: “Doris ti telman enn bon etidian ki mo pa ti anvi ralanti so bann progre. Zame mo pa finn kondir enn letid Labib regilierman ek mo ti panse ki enn ser ki ena plis lexperyans ti bizin fer letid Doris. Kitfwa enn ser dan so laz.” Dan lapriyer, Katherine ti demann Jéhovah ed li pou trouv ser ki bizin pou kontign letid Doris. Apre, li ti desid pou dir Doris ki li ti pe pans pou fer enn lot dimounn kontign so letid.

Katherine rakonte: “Avan ki mo koumans koz lor la, Doris ti dir mwa ki li anvi koz avek mwa lor enn problem. Apre ki mo ti’nn ekout li, mo ti dir li kouma Jéhovah inn ed mwa pou fer fas ar enn sitiasion koumsa. Li ti remersie mwa.” Apre sa Doris ti dir Katherine: “Jéhovah inn servi ou pou ed mwa. Kan premie zour ou ti tap mo laport, ti’nn gagn plizir lertan ki mo ti pe lir mo Labib. Mo ti pe  plore ek mo ti pe demann Bondie avoy enn kikenn pou ed mwa konpran Labib. Lerla ou ti tap mo laport. Jéhovah inn exos mo lapriyer!” Larm ranpli dan lizie Katherine kan li reviv sa moman-la. Li dir: “Bann parol ki Doris ti dir ti enn repons pou mo lapriyer. Jéhovah ti montre mwa ki mo pou kapav kontign so letid.”

An 2010, Doris ti batize, ek azordi li ena so bann prop letid Labib. Katherine dir: “Mo vremem ena rekonesans ki dezir ki mo ti ena depi lontan pou ed enn dimounn sinser pou vinn enn serviter Jéhovah inn realize!” Zordi, Katherine ere ek pe servi kouma pionie spesial lor lil Kosrae dan Pacifique.

Plis ki enn santenn frer ek ser ki sorti lezot pei (ki ena ant 19 ek 79 an) finn servi kot bien bizin led dan Micronésie. Erica, ki ti al Guam an 2006 kan li ti ena 19 an, exprim bien santiman sa bann proklamater zele la. Li dir: “Se enn lazwa pou fer pionie dan enn teritwar kot bann dimounn swaf laverite. Mo remersi Jéhovah ki Li’nn ed mwa pou rant dan sa servis-la. Se meyer fason viv!” Azordi, Erica bien kontan pou servi kouma pionie spesial dan Ebeye, enn parmi bann zil Marshall. Biensir, kan bann frer ek ser servi dan enn lot pei, zot bizin osi fer fas ar bann difikilte. Anou examinn trwa parmi sa bann difikilte-la ek gete kouma bann ki’nn al servi dan Micronésie inn sirmont zot.

Fason viv. Apre ki li ti’nn ariv lor lil Palaos an 2007, Simon, ki ti ena 22 an, pa’nn tarde pou trouve ki li ti pou gagn pli tigit kas ki li ti pe gagne dan so pei, l’Angleterre. Li dir: “Mo’nn bizin aprann pou pa aste tou seki mo anvi. Asterla, mo swazir bien avan mo aste enn manze, ek mo rode kotsa mo kapav gagn kitsoz pli bomarse. Kan enn kitsoz kase, mo al rod bann pies segonnme ek esey rod enn kikenn ki kapav ed mwa pou repar sa.” Ki lefe sa ti ena lor li kan li ti amenn enn lavi sinp? Simon dir: “Sa ti ed mwa pou kone ki kitsoz vremem neseser dan lavi ek kouma mo kapav debrouye avek tigit kitsoz. Plizir fwa mo’nn trouve kouma Jéhovah ti pran mwa bien swin. Pandan set lane ki mo’nn servi isi, touletan mo finn ena kitsoz pou manze ek enn plas pou dormi.” Vremem, Jéhovah soutenir bann ki pe amenn enn lavi sinp parski zot anvi met so Rwayom an premie dan zot lavi.​—Mat. 6:32, 33.

Mank zot fami. Erica dir: “Mo bien atase avek mo fami, ek mo ti trakase tansion mo mank zot ek ki sa afekte mo minister.” Kouma li ti prepar li? “Avan mo demenaze, mo ti lir bann lartik Latour Degard ki koz lor la. Sa ti vremem prepar mwa pou fer fas ar sa difikilte-la. Dan enn lartik, enn mama ti rasir so tifi kan li ti dir li: ‘Jéhovah kapav  pran twa swin pli bien ki mwa.’ Sa lankourazman-la ti vremem fortifie mwa.” Hannah ek so misie Patrick servi dan Majuro, enn bann zil Marshall. Pou pa tro mank so fami, Hannah fer zefor pou res konsantre lor bann frer ek ser dan zot kongregasion. Li dir: “Touletan mo pe remersie Jéhovah pou fami internasional nou bann frer parski zot osi zot mo fami. San zot soutien, zame mo pa ti pou kapav vinn servi kot bizin led.”

Adapte zot. Simon dir: “Kan ou al dan enn lot pei, preske tou kitsoz diferan. Parfwa sa mank mwa ki mo pa kapav fer bann joke parski lezot pa bien konpran mwa.” Erica dir: “O-koumansman, mo ti santi mwa apar, me sa ti ed mwa pou re-examine kifer mo ti vinn dan sa pei-la. Mo pa ti fer sa pou mo lavantaz, me pou fer plis pou Jéhovah.” Li azoute: “Avek letan, mo ti devlop bann bon lamitie ki ena boukou valer pou mwa.” Simon ti fer bann gran zefor pou aprann lang Palo, ek sa ti permet li ‘ouver so leker bien gran’ ar bann frer ek ser dan sa pei-la. (2 Cor. 6:13) Bann zefor ki li ti fer pou aprann sa lang-la ti fer bann frer pli apresie li. Wi, kan bann frer ki al servi dan enn lot pei travay kot-a-kot avek bann frer ki res dan sa pei-la, zot devlop bann bon lamitie dan kongregasion. Ki lezot bienfe zot gagne ankor?

Lapot Paul ti dir: “Ninport kisannla ki sem an-abondans pou rekolte osi an-abondans.” (2 Cor. 9:6) Pena dout ki prinsip ki ena dan sa verse-la aplik ar bann ki fer plis dan zot minister. Ki bann frwi zot pe “rekolte an-abondans” dan Micronésie?

Dan Micronésie, bann frer ankor gagn lokazion pou koumans bann letid Labib ek trouve par zotmem kouma bann ki aprann ek aplik bann verite ki ena dan Parol Bondie fer bann progre lor plan spiritiel. Patrick ek Hannah ti pres osi dan Angaur, enn ti lil kot ena 320 abitan. Apre ki zot ti’nn prese pandan de mwa, zot ti zwenn enn mama ki elve so zanfan tousel. Deswit li ti aksepte enn letid Labib, ti kontan seki li ti pe aprann, ek ti fer bann gran sanzman dan so lavi. Hannah dir: “Sak fwa apre letid, kan nou pe ale lor nou bisiklet nou get nou kamarad ek nou dir: ‘Mersi Jéhovah!’” Hannah azoute: “Mo kone ki Jéhovah ti pou atir sa madam-la ver Li dan ninport ki fason, me parski nou pe servi kot bizin led, nou’nn kapav zwenn sa brebi Jéhovah la ek ed li konn Jéhovah. Se enn bann pli bon lexperyans ki nou’nn fer dan nou lavi!” Parey kouma Erica dir: “Kan ou ed enn dimounn pou aprann konn Jéhovah, ou gagn enn lazwa extraordiner!”

Dan boukou pei, pe bizin pli boukou proklamater. Eski ou’si ou kapav port ou volonter pou al servi kot bizin led? Demann Jéhovah pou ranforsi ou dezir pou fer plis dan ou minister. Koz lor la avek bann ansien dan kongregasion, avek sirveyan sirkonskripsion, ouswa avek bann ki’nn gagn privilez pou servi dan enn pei kot bizin led. Kan ou koumans fer bann plan, ekrir biro nasional ki okip teritwar kot ou ti pou anvi al servi, pou demann plis ransegnman. a Kitfwa ou’si ou kapav trouv ou parmi bann milyon frer ek ser​—zenn ek aze, selibater ouswa marye​—ki port zot volonter ek ki gagn lazwa pou ‘rekolte an-abondans.’