Lamor se enn lennmi ki fer per. Nou fer tou seki nou kapav pou konbat li. Kitfwa nou pa arive aksepte kan enn dimounn ki nou kontan mor. Ouswa, akoz nou ankor zenn, kitfwa nou panse ki sa lennmi-la zame pa pou vinn rod nou​—enn fos lide ar ki nou res atase tanki nou kapav.

Pena boukou dimounn ki ti anvi gagn limortalite parey kouma bann Pharaon. Bann Pharaon ti konsakre enn bon parti zot lavi​—ek osi lavi plizir milye travayer​—pou esey vink lamor. Bann piramid ki zot ti aranze montre zefor ki zot ti fer pou gagn limortalite​—me sa montre osi ki zot pa ti reisi.

Bann lanperer Sinwa osi ti anvi gagn limortalite. Me atraver enn lot mwayin​—gras-a bann posion ki ti pou fer zot viv pli lontan. Lanperer Qin Shi Huang ti demann so bann siantis pou fabrik enn posion mazik ki ti pou anpes li mor. Me dan boukou zot bann preparasion ti ena merkir ki ti toxik, ek li paret ki enn sa bann melanz-la ti touy li.

Dan 16^em siek Nou Lepok, enn lexplorater Espagnol ki ti apel Juan Ponce de León ti travers lamer Caraïbes pou al rod enn lafontenn ki so delo fer revinn zenn. Lor so traze li ti dekouver Floride ki dan l’États-Unis, me de-trwa lane plitar li’nn mor apre enn lager avek bann Inka. Ek zame pa’nn trouv sa lafontenn-la.

Bann Pharaon, bann lanperer, ek bann lexplorater zot tou inn rod vink lamor. Kisannla parmi nou pou dir ki zot pa ti ena enn bon lobzektif, mem si nou pa dakor avek zot bann metod? O-fon, preske nou tou anvi kontign viv.

Kifer nou fer tou pou pa mor? Labib explike kifer. Konsernan nou Kreater, Jéhovah, a li dir: “Li finn fer tou kitsoz zoli dan so letan. Li finn mem met leternite dan zot [bann dimounn] leker.” (Ecclésiaste 3:11) Nou ti pou kontan profit bann zoli kitsoz ki ena lor later pou touletan, pa zis pou  80 an ouswa plis. (Psaume 90:10) Se sa dezir-la ki nou ena dan nou leker.

Kifer Bondie inn met “leternite” dan nou leker? Eski se zis pou irit nou? Inposib. Okontrer, Bondie promet ki nou pou gagn viktwar lor lamor. Plizir fwa Labib dir kouma lamor pou disparet ek koz lor promes ki Bondie fer lor lavi eternel.​—Get lankadre,  “Viktwar lor Lamor.”

Jésus Christ limem ti dir: “Samem ki vedir lavi eternel: Zot bizin aprann konn twa, sel vre Bondie, ek osi Jésus Christ ki to finn avoye.” (Jean 17:3) Alor, lalit kont lamor li pa dan vid. Selman, Jésus konfirme ki se zis Bondie ki pou kapav vink lamor pou nou.