Sa se enn parmi bann verse Labib ki bann dimounn pli kone ek pli servi. Sertin dir ki, an zis de-trwa mo, sa verse-la fer enn rezime lor relasion ki Bondie ena avek bann dimounn ek ki zot bizin fer pou gagn delivrans. Se pou sa rezon-la ki dan boukou pei nou trouv sa verse-la, ouswa referans “Jean 3:16,” lor bann lafis pou bann levennman piblik, bann stickers lor loto, bann miray, ek lezot plas ankor.

An zeneral, bann ki afis sa text-la ena konviksion ki parski Bondie kontan zot, se enn garanti ki zot pou gagn enn delivrans. Me, ki lamour Bondie reprezante pou ou? Ek dapre ou, ki Bondie inn fer pou montre so lamour pou ou?

Boukou dimounn dispoze pou admet ki se Bondie ki’nn kree liniver, lanatir, ek bann dimounn. Bann kreatir vivan zot telman zoli ek telman konplike ki bizin ena enn gran lintelizans deryer tou sa bann kitsoz-la. Enn kantite dimounn remersie Bondie toulezour pou lavi ki Li’nn donn nou. Zot rekonet osi ki zot depann net lor Bondie pou gagn bann kitsoz neseser dan lavi​—kouma ler, delo, manze, ek bann sik natirel. Gras-a sa, zot kapav kontign viv ek apresie seki zot fer.

Li bon nou remersie Bondie pou tou sa bann kitsoz-la parski se Limem ki’nn kree nou ek donn nou seki nou bizin pou kontign viv. (Psaume 104:10-28; 145:15, 16; Actes 4:24) Kan nou pans tou seki Bondie pe fer pou ki lavi posib, sa ed nou pou konpran lamour ki Bondie ena pou nou. Get seki lapot Paul dir lor la: “[Bondie] donn tou dimounn lavi  ek souf ek tou kitsoz. Parski se par Li ki nou ena lavi, nou bouze ek nou existe.”​—Actes 17:25, 28.

Me selman, se pa zis kan Bondie donn nou seki nou bizin lor plan fizik ki Li montre nou so lamour. Li montre so lamour dan boukou lezot fason ankor. Li’nn donn nou dignite ek enn pozision pli elve ki bann zanimo kan Li’nn kree an nou enn dezir pou aprann konn Li ek ed nou pou satisfer sa dezir-la. (Matthieu 5:3) Se akoz sa ki bann ki obeir Bondie kapav gagn posibilite pou vinn enn manb So fami, So bann “zanfan.”​—Romains 8:19-21.

Kouma Jean 3:16 azoute, Bondie finn montre so lamour kan Li’nn avoy so Garson, Jésus, lor later. Pou ki rezon? Pou ki Jésus ansegn nou lor so Bondie ek so Papa, ek pou ki li mor pou nou. Me, boukou pou admet ki zot pa vremem konpran kifer li ti neseser ki Jésus mor pou limanite ek kouma lamor Jésus se enn fason ki Bondie montre so lamour anver nou. Me, dapre Labib, kifer Jésus inn mor ek ki valer so lamor ena?

Tou dimounn tom malad, vinn vie, ek mor. Pourtan, se pa sa kalite lavi-la ki Bondie Jéhovah ti anvi pou nou koumansman. Premie zom ek premie fam ti gagn posibilite pou viv pou touletan dan enn paradi lor later. Me Bondie ti poz enn kondision: Zot ti bizin obeir Li. Bondie ti dir ki si zot swazir pou dezobeir, zot ti pou mor. (Genèse 2:17) Se seki finn arive. Premie zom finn rebele kont lotorite Bondie, koumsa li’nn amenn lamor lor limem ek lor so bann desandan. Lapot Paul dir: “Par enn sel zom, pese finn rant dan lemond ek pese finn amenn lamor, ek alor lamor finn fane parmi tou bann dimounn parski zot tou finn fer pese.”​—Romains 5:12.

Me, Bondie “kontan lazistis.” (Psaume 37:28) Mem si Li pa’nn ferm lizie lor pese ki premie zom inn fer volonterman, Bondie pa’nn kondann limanite antie kan Li les zot soufer ek mor pou touletan zis akoz dezobeisans enn sel zom. Okontrer, kan Li’nn aplik prinsip legal ki dir “lavi pou lavi,” Li’nn re-ekilibre balans lazistis ek fer an-sort ki bann dimounn ki obeir Li regagn posibilite pou viv pou touletan lor later. (Exode 21:23) Me enn kestion ki nou kapav poze se: Kouma kapav regagn lavi parfe ki Adam finn perdi? Repons: Kikenn bizin sakrifie li, bizin donn enn lavi ki ena exakteman mem valer ki lavi Adam, setadir enn lavi imin parfe.

Tou bann desandan Adam ti inparfe. Alor, li kler ki personn pa ti pou kapav pey sa pri-la. Parkont, Jésus li, li ti kapav. (Psaume 49:6-9) Kifer? Parski li’nn ne san okenn tas pese, li ti parfe parey kouma Adam. Alor, kan Jésus inn donn so lavi kouma enn ranson, li’nn delivre tou dimounn ar lesklavaz pese. Kan li’nn fer sa, li’nn donn bann desandan premie koup imin mem posibilite ki zot ti ena koumansman, setadir profit enn lavi parfe.  (Romains 3:23, 24; 6:23) Seki li’nn fer montre so gran lamour pou nou. Me, eski ena kitsoz nou bizin fer pou nou gagn bann bienfe ar sa gran sakrifis-la?

Si nou reget Jean 3:16, nou remark sa bann parol-la: “Ninport kisannla ki krwar an [Jésus] pa detrir, me gagn lavi eternel.” Ki savedir? Nou pou “gagn lavi eternel” akondision ki nou fer enn kitsoz: Nou bizin krwar an Jésus ek obeir li.

Kitfwa ou pe demann oumem: ‘Kouma lobeisans inplike isi? Eski Jésus pa ti dir ki “ninport kisannla ki krwar an li” pou gagn lavi eternel?’ Krwar an Jésus ouswa ena lafwa an li, bien inportan. Me, li bon nou rapel ki dan Labib, lafwa vedir plis ki zis krwar. Dapre Vine’s Expository Dictionary of Old and New Testament Words, bann mo ki lapot Jean inn servi dan lang orizinal vedir “kont lor, pa zis krwar lizie ferme.” Pou ki enn dimounn gagn faver Bondie, fode pa li zis rekonet ki Jésus limem nou Sover, me li bizin osi fer bann zefor sinser pou met an pratik seki Jésus ansegne. Si enn dimounn dir li ena lafwa, me li pa fer okenn aksion, so lafwa dan vid. Labib dir: ‘Lafwa san bann aksion, li mor.’ (Jacques 2:26) Savedir ki sa dimounn ki krwar la bizin manifeste lafwa an Jésus setadir li bizin viv an-akor avek so krwayans ek so lafwa.

Pou explik sa, lapot Paul dir: “Lamour ki Christ ena, met enn lobligasion lor nou, parski nou finn tir konklizion ki enn sel zom [Jésus] finn mor pou tou dimounn . . . Ek li’nn mor pou nou tou, pou ki bann ki viv nepli viv pou zotmem, me pou sa kikenn ki’nn mor pou zot ek ki’nn releve.” (2 Corinthiens 5:14, 15) Enn gran rekonesans pou sakrifis Jésus pous nou fer bann sanzman dan nou lavi. Nou aret viv zis pou nou, me plito pou Jésus ki’nn mor pou nou. Savedir ki dan nou lavi, met an pratik seki Jésus finn ansegne, bizin vinn enn priorite. Pena dout ki sa sanzman-la pou ena enn lefe lor nou bann valer moral, nou bann swa, ek lor tou kitsoz ki nou fer. Me ki rekonpans bann ki krwar ek manifeste lafwa an Jésus, pou gagne?

Dan dernie parti Jean 3:16 nou trouv promes ki Bondie fer ar tou bann ki ena lafwa dan laranson ek ki viv an-akor avek bann prinsip Biblik. Bondie pa anvi ki sa bann fidel-la “detrir,” me plito “gagn lavi eternel.” De diferan lesperans pe atann bann ki gagn bann bienfe gras-a lamour Bondie.

Jésus inn promet pou donn enn group dimounn lavi pou touletan dan lesiel. Li ti dir so bann fidel disip ki li pou al prepar enn plas pou zot pou ki zot kapav regne avek li dan laglwar. (Jean 14:2, 3; Philippiens 3:20, 21) Bann ki pou resisite ek pou al viv dan lesiel “pou vinn pret Bondie ek Christ, ek zot pou regne kouma bann lerwa avek li pandan 1,000 an.”​—Révélation 20:6.

Zis enn ti group parmi bann disip Christ ki pou gagn sa privilez-la. Avredir, Jésus ti dir: “Pa gagn per, ti troupo, parski Bondie kontan pou donn zot so Rwayom.” (Luc 12:32, Nouvo Testaman an Kreol Morisien) Kan pe dir “ti troupo,” ki kantite dimounn pou ena? Révélation 14:1, 4 dir: “Mo’nn trouve, ek gete! ti ena Lagno [Jésus Christ ki’nn resisite] ki ti pe debout lor Montagn Sion [dan lesiel], ek avek li ti ena 144,000; zot ena so nom ek nom so Papa ekrir lor zot fron . . . Finn aste zot parmi bann dimounn, kouma bann premie rekolt pou Bondie ek pou Lagno.” Kan nou konpar kantite milyon dimounn ki finn existe lor later, sa 144,000 dimounn-la zot vremem enn “ti troupo.” Labib dir ki zot pou bann lerwa, me lor kisannla zot pou regne?

Jésus ti koz osi lor enn deziem group dimounn ki pou gagn bann bienfe ar Rwayom Bondie ki dan lesiel. Kouma nou kapav lir dan Jean 10:16, Jésus ti dir: “Mo ena bann lezot brebi, ki pa dan sa lanklo-la; sa bannla osi mo bizin amenn zot, ek zot pou ekout mo lavwa, ek zot pou vinn enn sel troupo, enn sel berze.” Sa bann ‘brebi-la’ pe atann kan zot pou kapav viv pou touletan lor later.  Se sa lesperans lamem ki Adam ek Ève ti ena dan koumansman. Kouma nou kone ki se lor later ki zot pou viv?

Dan Labib, plizir plas li koz lor enn paradi lor later, kot pou ena bann bon kondision. Ou kapav verifie sa par oumem dan ou Labib. Lir sa bann pasaz-la: Psaume 37:9-11; 46:8, 9; 72:7, 8, 16; Isaïe 35:5, 6; 65:21-23; Matthieu 5:5; Jean 5:28, 29; Révélation 21:4. Sa bann verse-la anonse ki lager, lafaminn, maladi, ek lamor pou disparet. Zot koz lor enn lepok kot bann bon dimounn pou kapav ranz zot prop lakaz, kiltiv zot prop later, ek elve zot bann zanfan dan bann bon kondision. a Eski sa lesperans-la pa atir ou? Nou ena bann bon rezon pou krwar ki sa bann promes-la biento pou realize.

Si ou arete ek ou reflesi lor tou seki Bondie inn fer pou ou ek pou limanite an antie, ou pou trouve ki Li’nn deza fini fer boukou. Nou ena lavi, lintelizans, enn ase bon lasante, ek seki nou bizin pou kontign viv. Anplis, kouma nou’nn aprann dan Jean 3:16, Bondie finn donn nou enn kado; Li’nn donn nou so garson an ranson. Gras-a sa, nou kapav gagn ankor plis benediksion.

Mazine ki kantite kontan nou pou kontan ek ki kantite bienfe nou pou gagne kan nou pou viv pou touletan dan lape, dan bann bon kondision, san konn maladi, lager, lafaminn ouswa lamor. Eski ou pou gagn sa bann benediksion-la? Tou pou depann lor ou. Alor, poz oumem sa kestion-la: Ki ou pe fer pou Bondie?